Read Northwest Gbaya GIMA 33 Bible Online

GIMA 33 - Northwest Gbaya bible

GIMA 33

¹O wi-de-mɔ nɛ yuwar-a, ɛ̀nɛ̀ híɗí mɔ nɛ̀ desee sitɛ GASA WAN! Zɔnamɔ baa nɛ̀ o wi nɛ̀ see ɔ tana.

²Ɛ̀nɛ̀ zɔ́n nin GASA WAN nɛ̀ mɔɔ-mbɛr, ɛ̀nɛ̀ mbɛ́r kunde nɛ̀ a̧a̧ nɛ̀ nyak-aa ɓu ha̧ a̧!

³Ɛ̀nɛ̀ bíí mbe gima ha̧ a̧, ɛ̀nɛ̀ díkíɗí kunde sumburi nɛ̀ a̧!

⁴Wen ko GASA WAN ɔ tana, o tom kɔ̧-a̧ lɛŋ nɛ́ kpasamɔ;

⁵a̧ kɔ̧ɔ̧ kɔ̧-a̧ nɛ́ deemɔ nɛ yuwar-a in gɔna-kita nɛ̀ de-a. Kɔ̧ɔ̧mɔ ko GASA WAN duna zaŋnu.

⁶A̧ tɔ̧ɔ̧ wen ɓɛɛ yiwese de tɛ̀ nɛ̀ tɛ̀; a̧ dee o mɔ nɛ̀ ya sɛnɛ lɛŋ nɛ̀ wen mɛ kɔ̧ nú-a.

⁷A̧ mɔi̧a yì e kpɔk fara hee mɔ'ɔ nɛ‘i ɗu nɛ̀ yi a kɔ̧ dak’ɛ ga; a̧ mɔi̧a o gba-tɔp kpe hee gba-zu ga e nɛ̀ war-a.

⁸O bíí zu nù lɛŋ a̧ yu kíí GASA WAN, o bíí nù'ɛ a̧ ya nɛ naka-tɛ ti a̧;

⁹kà a̧ tɔ̧ wen laŋ, ɓɛɛ wi zɔka mɔɔ-oi-aa. Kà a̧ tɔ̧‘e mɔ'ɔ dé wó, ɓɛɛ mɔ‘i dea.

¹⁰GASA WAN nɛ́ wi-yai ee-zu-mɔ ko o dukbíí, ɓɛɛ a̧ dora mɔ nɛ̀ bíí kɔ̧ɔ̧ mɛ de mbɛt.

¹¹Ee-zu-mɔ ko GASA WAN duk ɓɔnsɛnɛ; o deemɔ nɛ yuwar-a kɔ̧ see-aa duk kɔ‘i nɛnɛ hegɔ kpoo nɛ kpoo.

¹²Tugun bíí nɛ̀ GASA WAN duk nɛ́ Sɔ̧ kɔ-wa ya nɛ̀ desee; dukbíí n'aa hoka nɛ̀ mɔɔ-oi kɔ̧-a̧ duk nɛ̀ desee mbɛt.

¹³GASA WAN oŋgi nɛ̀ ŋgɔn ɓíì zɔk nɛ̀ mɔ pii zu o bezaŋ Adam;

¹⁴a̧ duk nɛ́ fara kɔ̧-a̧ mɛ zɔk nɛ̀ o bíí zu nù'ɛ lɛŋ;

¹⁵nɛ́ a̧ a̧ dee see bíí lɛŋ, nɛ́ a̧ a̧ zɔk tom ko o bíí kpɔk kpɔk.

¹⁶Bo nɛ tɛ ŋgai ko o dɔka wi-biro a̧ wannu tɛ kpasi nɛnɛ na; ŋga-wi beka kpasi tɛ ŋgai-tɛ na.

¹⁷Ee-ta nɛ̀ nyaŋa bó nɛ́ kpasa ŋgai na, wen kóó nyaŋa'i ŋgaia so héé ge, a̧ beka kpasi wan-aa na.

¹⁸Yí GASA WAN a̧a̧ zu o wi nɛ yu kíí a̧; a̧ zɔk nɛ o wi nɛ̀ e ta nɛ̀ kɔ̧ɔ̧mɔ kɔ̧-a̧

¹⁹ha̧ a̧ mɛ kpasi wa tɛ fio in tɛ ŋgimbi kaɓa mbɛt.

²⁰Ɛ̀ɛ̀ é yí-ɛɛ si tɛ GASA WAN; a̧ nɛ́ wan-gbak-ɛɛ, a̧ nɛ́ ŋgee k’ɛɛ.

²¹Desee mɛ kɔ̧ see yɛ tɛ́ nɛ̀ tɛ-a; ɓɛɛ ee-ta k’ɛɛ mɛ̀ nɛ́ wen zu sa̧a̧ nin-a.

²²GASA WAN, yora-ɗoŋ-wen k’ɛ́nɛ́ a̧ dúk in yɛɛ hee mɔ'ɔ n’ɛɛ e nɛ̀ ta nɛ̀ ɛnɛ ga.