Read Northwest Gbaya GIMA 34 Bible Online

GIMA 34 - Northwest Gbaya bible

GIMA 34

¹Zɔnamɔ ko David ŋgimbi n'aa dee nɛ̀ mɔ hee wi-dawa ga ti Abimɛlɛk, ɓɛɛ Abimɛlɛk siŋ kɔ‘i a̧ pi̧ nù, ɓɛɛ a̧ wɛr tɛ yu mɔ yak.

²Mi tɛ de osoko ha̧ GASA WAN ɓɔnsɛnɛ; nú‘m beka bɛr tɛ zɔna a̧ na.

³Nɛ́ GASA WAN a̧‘m duk nɛ̀ tɛ‘m; o wi-mɔka-see a̧ zii, wa a̧ de nyɛŋɛ!

⁴Ɛ̀nɛ̀ zɔ́n nin GASA WAN in am! Ɛ̀ɛ̀ gásí nin-a, ɛ́ɛ́ in'nɛ̀ɛ́ mbɛt!

⁵Mi kia so GASA WAN ɓɛɛ a̧ kifi nú ha̧‘m; a̧ kpasa'm tɛ o mɔɔ-kíì nɛtɛ nɛtɛ nɛ̀ hɛra'm.

⁶Wi nɛ̀ e yí sitɛ Sɔ̧, sɔnti wi’ɛi tɛ tok lak-lak, foe beka de a̧ na;

⁷ŋma wi-kɔsa aia so nú ɓɛɛ GASA WAN zii aia-nú kɔ̧-a̧, ɓɛɛ kpas'a tɛ bɔnɛ kɔ̧-a̧ lɛŋ.

⁸Betom mɛ yiwese pɛm nɛ o wi-yu-kíí Sɔ̧, kpasi nɛ̀ wa nɛnɛ mbɛt.

⁹Ɛ̀nɛ̀ wé GASA WAN ɓɛɛ ɛnɛ tɛ zɔk a̧ nɛ́ de-wi nyɛmna; o wi nɛ̀ hu̧si ɗoŋ GASA WAN duk kɔ‘i nɛ desee.

¹⁰Ɛ̀nɛ̀ yú kíí GASA WAN, ɛ́nɛ́ o sa̧a̧-bíí kɔ̧-a̧, wen o wi nɛ yu kíí a̧, mɔ ɓan wa na;

¹¹kóó nyɔŋmɔ nyɛma so mɛ ɓan o daŋa-dila, ɓɛɛ war ko o wi nɛ̀ kii GASA WAN, mɔ beka ɓan wa na.

¹²O bem kɔ‘m, ɛ̀nɛ̀ tɛ́ɛ̀ zíí wen nú‘m! Ɛ̀nɛ̀ tɛ́ ha̧‘m usi ɗoŋ yuu kíí GASA WAN h’ɛ́nɛ́.

¹³Mɛ́ nɛ́ kɔ̧ɔ̧ mɛ́ duk zu nù'ɛ ɗoŋ-aa nyɛi̧, mɛ́ nɛ́ kɔ̧ɔ̧ ha̧ sɔnti-mɛ mɛ de,

¹⁴ɓɛɛ mɛ̀ dór leɓe-mɛ tɛ tɔ̧ɔ̧ ɗaŋ wen ŋgaɓo! Mɛ dór ndàrá-nú-mɛ tɛ tɔ̧ɔ̧ géé wen-ɔr-mɔ!

¹⁵Mɛ̀ yú ɗaŋmɔ ɓɛɛ mɛ̀ dé nɛ́ demɔ; mɛ̀ kíí nɛ́ ga̧a̧mɔ a̧ mɛ̀ ndák ɗoŋ-aa mbɛt.

¹⁶GASA WAN gɔna nú deemɔ ko o wi-de-ɗaŋmɔ ha̧ tɛ-wi mɛ bi ɗoŋ wa zu nù'ɛ, ɓɛɛ yí-a a̧a̧ zu o wi-de-mɔ nɛ yuwar-a, zer-aa zii nɛ́ saa-sara kɔ-wa.

¹⁸Kà wa sá mɔ, ɓɛɛ GASA WAN zia sara kɔ-wa, ɓɛɛ a̧ kpasa wa tɛ bɔnɛ kɔ-wa lɛŋ.

¹⁹GASA WAN a̧a̧ katɛ o wi-dita-see; a̧ nɛ́ wi-kpasi o wi nɛ̀ see ŋmana mbɛt.

²⁰Bɔnɛ ko wi-de-mɔ nɛ yuwar-a ɔ dɔka, ɓɛɛ GASA WAN tɛ kpasi kànà a̧ tɛ bɔnɛ nɔ‘i lɛŋ;

²¹GASA WAN pɛm nɛ wi-de-mɔ nɛ yuwar-a wen ká ŋma gba̧a̧-tɛ-a gbin.

²²Ɗaŋ tɛ gbɛ wi-ɗaŋ; ŋgamɔ tɛ kpa o wi-sɛn o wi-de-mɔ nɛ yuwar-a.

²³GASA WAN tɛ kpasi o wi-de-tom kɔ‘i, ɓɛɛ wen beka bo zu wi nɛ̀ hu̧si tɛ ɗoŋ-aa na.