Read Northwest Gbaya GIMA 35 Bible Online

GIMA 35 - Northwest Gbaya bible

GIMA 35

¹Ko David. GASA WAN, ɛ̀nɛ̀ pí̧ wen zu o wi-kur-zu'm; ɛ̀nɛ̀ bá zu'nɛ́ duk nɛ̀ o wi nɛ̀ de ŋmaa in am!

²Ɛ̀nɛ̀ hɛ́r zaŋ‘nɛ́, ɛ̀nɛ̀ bá ŋgee k’ɛ́nɛ́, ɓɛɛ ɛ̀nɛ̀ kúr, ɛ̀nɛ̀ yé ɗoŋ am!

³Ɛ̀nɛ̀ nák sɛ́ɛ̀ k’ɛ́nɛ́ yí o wi nɛ̀ ndak am tɛnɛ'ɛ, ɓɛɛ ɛ̀nɛ̀ dé ha̧‘m mɛ iŋ sɛn kɔ̧ see-am ndé, ɛ́nɛ́ nɛ́ wan-kpas'am.

⁴Foe in ziimɔ a̧ tík zu o wi nɛ̀ kɔ̧ɔ̧ mɛ gbɛ‘m; o wi nɔ‘i nɛ̀ kɔ̧ɔ̧ mɛ de ɗaŋmɔ in am'i, wa a̧ zik tɛ-wa, wa a̧ yak, wa a̧ pɛsi sót-sót!

⁵Betom k’ɛ́nɛ́ a̧ ndak wa yaknɛ hee pumyulu sunu nɛ búk kai yaknɛ'ɛ ga;

⁶betom ko GASA WAN a̧ ndak pata wa, ɓɛɛ yuwar kɔ-wa a̧ duk nɛ́ tum in yɔɔ-mɔ.

⁷Ŋma mɔ n'am dee in wa bo na, nɛ́ mɔ'ɔ nɛ̀ wa tuia pɛ́r ha̧‘m; wa za̧a̧ lim ha̧‘m gbak na mi tika sɛnɛ wó,

⁸ɓɛɛ wa iŋ kɔ-wa bɔnɛ nɛ̀ hai wa tɛnɛ‘i na. Pɛ́r nɛ̀ wa tuia ha̧‘m tɛ ba kànà nɛ́ wa; lim nɛ̀ wa hura'i, kànà nɛ́ wa a̧ tɛ tik sɛnɛ!

⁹Mi tɛ zɔn GASA WAN nɛ̀ nyɛŋɛ bíí nɛ̀ gima-tortɛ wen n'aa kpasa'm,

¹⁰ɓɛɛ kiitɛ‘m tɛ tɔ̧: «GASA WAN, ɛnɛ nɛ́ wan-ba-wi-ɓɔsa yinɛ er o ŋga-wi, ɛnɛ nɛ́ wan-gbo-wisan yinɛ er o wi-nyɔŋ-yí-wa; o'o tɛ nyɛm ŋmaa in'nɛ̀ɛ́ o?»

¹¹O wi-sedaako-ndela kur nɛ zu'm ak nɛ̀‘m tɛ mɔ n'am iŋ na;

¹²wa kifi er ha̧‘m nɛ̀ ɗaŋ-a, zu demɔ n'am de in wa; nɛ́ mɔ‘i a̧ de ha̧ gɛ̧ɛ̧mɔ mɛ ba'm tɛ duka-a kɔ‘m zu nu’ɛ.

¹³Ɓɛɛ kɔ‘m, tɛ ŋgimbi zɛɛ kɔ-wa'i, mi pi̧i̧ laa-zim-mɔ; mi mɔka tɛ‘m si ɗɔɔ, mi zima yì, ɓɛɛ mi kɔfi Sɔ̧ nɛ̀ kɔ̧ see-am

¹⁴hee ŋma sɛm kɔ‘m kóó ŋma nya'm a̧ a̧a̧ tɛ bɔnɛ sa'm kɔfi Sɔ̧ wen-aa ga; ɓɛɛ mi nɛ nɔ̀ nɛ̀ dita-see hee ŋma bíí nɛ̀ kpo er a gba̧a̧-zu gar nɛ̀ fio ko nàà kɔ‘i ga.

¹⁵Ɓɛɛ ɛ̧ɛ̧ kinii’ɛ, wa mɔi̧ nɛ ŋmaa mam nɛ̀ tika-a kɔ‘m, wa mɔi̧ nɛ ŋmaa zɛkɛɗi nɛ̀‘m; o ŋma gɛnɛ n'am iŋ so nɛti na gai nɛ mɔ a zu'm.

¹⁶Wa we nɛ‘m mam nɛnɛ nin-wa nyɛr, wa nyɔŋ nɛ goko-wa zu'm.

¹⁷GASA WAN, ɛ́nɛ́ yor bɔɔ nɛ̀ ɗoŋ e nɛ‘m ɛ̀n'am’ɛ héé ge? Ɛ̀nɛ̀ kpás'am er o ŋga-wi nɔ'ɔ nɛ̀ de mɔ in am hee dila ga’ɛ!

¹⁸Mi tɛ de osoko h’ɛ́nɛ́ ti gba gíí bíí, mi tɛ gasi'nɛ́ ti giiwi.

¹⁹K’ɛ́nɛ́ e ha̧ o wi-sɛn-am nɔ‘i nɛ̀ ndela kɔ-wa nyɛmna'i mɛ mam am na; o wi nɔ‘i nɛ̀ sɛn am géè‘i a̧ ká'í nyɔŋ yí ha̧ ŋmaa na mbɛt.

²⁰Bó nɛ́ wa tɔ̧ nɛ ga̧a̧ wen zu o ga̧a̧-wi nɛ̀ ya zu nu’ɛ na; mɔ kɔ-wa kànà nɛ́ tɔ̧ɔ̧ ndiŋ wen zu bíí nɛ̀ tum nɛnɛ géè ɓɛɛ.

²¹Wa ɓa nɛ zɔm nú ɓir nɛ̀ wen ndela e nú‘m sɔɔ géè tɔ̧ nɛnɛ ndé: «Hee heyei! Ɛɛ zɔka mɛ! Ɛɛ zɔka mɔ nɛ̀ mɛ dea'i!»

²²GASA WAN, bó nɛ́ ɛnɛ zɔka mɔ‘i nɛ̀ wa de in am'i na? K’ɛ́nɛ́ duk nɛ̀ oi-nu'nɛ́ na! GASA WAN, k’ɛ́nɛ́ duk nyɛi̧ nɛ̀‘m na!

²³Ɛ̀nɛ̀ tún! Ɛ̀nɛ̀ kúr bee! Ɛ̀nɛ̀ yé ɗoŋ wen kɔ‘m! GASA WAN, Sɔ̧ kɔ‘m, ɛ̀nɛ̀ yé ɗoŋ am!

²⁴Ɛ̀nɛ̀ gɔ́n kita zu'm nɛ yuwar-a, Gasa Wan, Sɔ̧ kɔ‘m, ká o wi nɔ‘i tɛɛ mam am,

²⁵tɔ̧ nɛnɛ‘e: «Kinii a̧ a̧a̧ kɔ̧ er yɛ!» In ká wa tɛɛ tɔ̧ mbɛt'e: «Ɛɛ gana a̧ kaɗi!»

²⁶Foe in ziimɔ a̧ tik zu o bíí nɛ̀ kpa desee tɛ bɔnɛ kɔ‘m; o wi nɔ‘i nɛ ŋmaŋ tɛ zu'm'i, búù a̧ bá wa! Zu-wa a̧ dítí!

²⁷Ɓɛɛ ko o wi-ye-ɗoŋ-am nɛ́ yaa-a nɛ̀ desee wèn wen nɛ̀ ba'm na'i; wa a̧ mam mami nɛ̀ desee, tortɛ'ɛ bá wa, wen kɔ-wa, kànà nɛ́ tɔ̧a̧-a̧ ɓɔnsɛnɛ ndé: «Sɔ̧ nɛ́ gasamɔ! A̧ duk nɛ desee tɛ de duka-a ko wi-de-tom kɔ̧-a̧».

²⁸Ɓɛɛ nú‘m tɛ we ɗoŋ deemɔ nɛ yuwar-a k’ɛ́nɛ́; mi tɛ zɔn'nɛ́ hegɔ wese lɛŋ.