Read Northwest Gbaya GIMA 40 Bible Online

GIMA 40 - Northwest Gbaya bible

GIMA 40

¹Gima ko David ha̧ wan-duk-zu-gima.

²Mi ee ta nɛ̀ GASA WAN ɗoŋ-aa nyɛi̧, ɓɛɛ kinii a̧ zika tɛ pii tɛ‘m, a̧ zia sara kɔ‘m.

³A̧ daka'm gbonɛ kɔ̧ ɗaŋ gboŋgo, a̧ daka'm gbonɛ ɗɔɔ gba ɓɔtɛ-bin-be-zɔŋa, a̧ baa'm e zu kam-ta, a̧ dee ha̧ naŋ-am mɛ nɔ nù.

⁴A̧ ee mbe gima kɔ̧ nú‘m: gima'i nɛ́ gima zɔna Sɔ̧ k’ɛɛ. Bíí nɛ̀ dɔka-a tɛ zɔk mɔ‘i, kíì tɛ de wa, ɓɛɛ wa tɛ e see-wa tɛ GASA WAN.

⁵O bíí nɛ̀ e ta nɛ̀ GASA WAN, nɛ̀ zik tɛ sitɛ o wi-ŋgazu in o wi-ndela na, ya kɔ‘i nɛ̀ desee.

⁶GASA WAN, Sɔ̧ kɔ‘m, gasamɔ n’ɛnɛ dee h’ɛ́ɛ́ ɔ dɔka nyɛmna; ɛnɛ gbaa war mɔ h’ɛ́ɛ́ nɛ̀ de-a nyɛmna, ŋma bíí nɛ̀ tɛ nyɛm ŋmaa in'nɛ̀ɛ́ bo na. Kóó mi a̧ taa so mɛ we ɗoŋ mɔ ɓɛɓɛt n’ɛnɛ dea, bó nɛ́ mi tɛ̀ɛ̀ tɔr so tɔr pi̧ nù na.

⁷Nɛ́ mɔ'ɔ n’ɛnɛ hu̧i̧a̧ zer-am ha̧‘m mɛ iŋ ndé, bó nɛ́ ɛ́nɛ́ kɔ̧ɔ̧ nɛ́ ɗafa-sɔ̧ in ha̧a̧mɔ na, bó nɛ́ ɛ́nɛ́ kii nɛ́ ɗafa-sɔ̧ in dɔɔ-kpoo-sɔ̧ wen ea ɗaŋmɔ h’ɛɛ na mbɛt.

⁸Ɓɛɛ sa'm tɔ̧: «Mi'i tɛ‘i ha̧‘m mɛ de mɔ n’ɛnɛ kɔ̧a̧ hee mɔ'ɔ nɛ̀ yɔra zaŋ kara kalata k’ɛ́nɛ́ ga.»

⁹Mi kɔ̧a̧ mɛ de nɛ́ mɔ n’ɛnɛ kɔ̧a̧, Sɔ̧ kɔ‘m, heembea k’ɛ́nɛ́ nɛ́ dua-see-am.

¹⁰Mi wee ɗoŋ deemɔ nɛ yuwar-a k’ɛ́nɛ́ ti mɔi̧a-a ko gba gíí bíí, mi kpe nú‘m na, GASA WAN, ɛ́nɛ́ iŋa hegɔ mbɛt.

¹¹Mi hu̧si deemɔ nɛ yuwar-a k’ɛ́nɛ́ kɔ̧ see-am na; mi wee ɗoŋ demɔ k’ɛ́nɛ́ in gbakamɔ k’ɛ́nɛ́; mi hu̧si yora-ɗoŋ-wen in kpasawen k’ɛ́nɛ́ ti mɔi̧a-a ko gba gíí bíí na.

¹²Ɓɛɛ GASA WAN, ká demɔ k’ɛ́nɛ́ nyaŋ am na; yora-ɗoŋ-wen in kpasawen k’ɛ́nɛ́ tɛ kpas'am ɓɔnsɛnɛ.

¹³Bɔnɛ nɛtɛ nɛtɛ nɛ‘i nyɛm mɛ tɔr na zika'm e see-a, dɔka yɔɔ-kaya kɔ‘m tika zu'm, ɓɛɛ yí‘m zɔk mɔ ɓɔna, wen ɗaŋmɔ kɔ‘m dɔka gan mu̧i̧-zu'm; ŋgai bo tɛ‘m ɓɔna.

¹⁴Ɛ̀nɛ̀ dé ko ha̧‘m, GASA WAN, ɛ̀nɛ̀ kpás'am! K’ɛ́nɛ́ nik naŋ‘nɛ́ tɛ gbaka'm na, GASA WAN, ɛ̀nɛ̀ gbák am wa!

¹⁵GASA WAN, foe a̧ ba o wi nɛ kii mɛ gbɛ‘m yinɛ‘i, búù a̧ ba wa!

¹⁶O wi nɛ tɔ̧ ha̧‘m, hi̧i̧ye, hi̧i̧ye, mɔ'ɔ ba tɛ‘m hegɔ wó‘i, bele'e zar wa wen taamɔ-saka-yí kɔ-wa'i!

¹⁷O wi-kii-sɔnti'nɛ́ a̧ ya nɛ desee! Tortɛ a̧ ba wa ti'nɛ́, ɓɛɛ é ha̧ o wi nɛ̀ e see tɛ‘nɛ́‘i mɛ tɔ̧ ɓɔnsɛnɛ: «GASA WAN ɔ gasa!»

¹⁸Ɓɛɛ kɔ‘m kinii, mi nɛ́ wi-kɔsa in wi-bɔnɛ, GASA WAN, ɛ̀nɛ̀ tɛ́ bee! Wi-gbak-am in wi-kpas'am nɛ́ ɛnɛ kpɔk ɓɛɛ. Sɔ̧ kɔ‘m, k’ɛ́nɛ́ nik naŋ‘nɛ́ na!