Read Northwest Gbaya GIMA 42 Bible Online

GIMA 42 - Northwest Gbaya bible

GIMA 42

¹Gima ko o bem ko Kore ha̧ wan-duk-zu-gima.

²Hee mɔ'ɔ nɛ̀ wɔ yì gbɛ nana zambɛrɛ ɓɛɛ ká a̧ kia yì mɛ nɔ'ɛ ga, nɛ́ hegɔ a̧‘m de nɛ̀ wɔ‘nɛ́, Sɔ̧ kɔ‘m.

³See-am de wɔ Sɔ̧ dee nyɛmna; Sɔ̧, wan nɛ̀ dúk kpasa, mi tɛ nɛ̀ɛ́ zɔk bɔɔ sɔnti'nɛ́ mɛ gese ge?

⁴Nyɔŋmɔ kɔ‘m zɛ nɛ̀ wese nɛ́ mi̧i̧kɔ̧a̧. O wisɛn kɔ‘m ŋgii nɛ̀‘m nɛ̀ wen ak nɛ̀‘m ɓɔnsɛnɛ ndé: «Sɔ̧ kɔ-mɛ‘i duk kɔ‘i si déè?»

⁵Tɛ‘m mbaŋa ɗoŋ de duka-a kɔ‘m nɛti, ɓɛɛ tɛ‘m ga̧ zíŋ-zíŋ ŋgimbi n'am taa mɔ hɔ fara nɛ̀ o giiwi mɔi̧ so sɛnɛ, ɓɛɛ mi gɔma duk ti ha̧ wa daŋ nɛnɛ si kɔ̧ tua ko Sɔ̧ nɛ̀ gima-tortɛ in zɔnamɔ gbaŋa ko giiwi nɔ‘i.

⁶Ɓɛɛ sa'm ak tɛ‘m nɛ̀ tɛ‘m ndé: kinii mi tɛ duk bɔɔ nɛ̀ dita-see siti wen ge? Mi tɛ pɛ bɔɔ see-am zu ge mɔ ge ɓɔ ge? Mi tɛ e Sɔ̧ nɛ̀ mɔɔ-e-nɛ-ta kɔ‘m; mi tɛ zɔn a̧ woyo wen a̧ nɛ́ wi-kpas'am, a̧ nɛ́ Sɔ̧ kɔ‘m mbɛt.

⁷Mi duka zu Jurdɛn mgbara kaya Hɛrmɔŋ in Mitsar nɛ dita-see, ɓɛɛ tɛ‘m mbaŋ ɗoŋ‘nɛ́.

⁸Dir-yì sa nɛ ŋmaa, wi zii nɛ giti som-yì nɛnɛ; ɗaŋsee kɔ‘m duka zu'm hee mi a̧a̧ ɗɔɔ yì ɓɛɛ nɛ́ mɔ'ɔ nɛ̀ pɛŋa-yì in kin-yì k’ɛ́nɛ́ yaka zu'm ga.

⁹GASA WAN a̧ usi kɔ̧ɔ̧mɔ kɔ̧-a̧ ha̧‘m nɛ̀ wese, ɓɛɛ nɛ̀ zɛ a̧ a̧ usi gima-bìì ha̧‘m mɛ bìì zɔn nɛ̀ a̧, ha̧‘m mɛ iŋ kɔfa a̧ wen nɛ́ a̧ a̧ de ha̧‘m mɛ duk kpasa!

¹⁰Sɔ̧ nɛ̀ kam-ta kɔ‘m; mi tɛ ak a̧: «Tɛ‘nɛ́ bi bɔɔ ɗoŋ am wen ge? A̧‘m dúk nɛ́ duka-a nɛ̀ ɗaŋsee nɛnɛ tɛ mɔɔ-nyɛr nɛ o wisɛn kɔ‘m de in am'i nde?»

¹¹Zɛkɛɗ‘am nɛ̀ o wi-kur-zu'm zɛkɛɗi'i duk tɛ‘m hee wi wɔŋga nɛ̀‘m ga. Wa gɔm nɛ ɗálá zu'm ɓɔnsɛnɛ tɔ̧ nɛnɛ ndé: «Sɔ̧ kɔ-mɛ‘i duk kɔ‘i si déè?»

¹²Kinii mi tɛ duk bɔɔ nɛ́ dita-see siti wen ge? Mi tɛ pɛ bɔɔ see-am zu ge mɔ ɓɔ ge? Mi tɛ e nɛ́ Sɔ̧ nɛ̀ mɔɔ-e-nɛ-ta kɔ‘m; mi tɛ zɔn a̧ woyo wen a̧ nɛ wan-kpas'am, ɓɛɛ a̧ nɛ́ Sɔ̧ kɔ‘m mbɛt.