Read Northwest Gbaya GIMA 45 Bible Online

GIMA 45 - Northwest Gbaya bible

GIMA 45

¹Gima ko o bem ko Kore ha̧ wan-duk-zu-gima. Gima-kɔ̧ɔ̧mɔ. Ger gima’ɛ nɛɛ nɛ́ ɗoŋ gima: O gba-dɛŋ[8].

²See-am he nɛ yílí wen gba de wen; mi tɛ bìì de gima kɔ‘m ha̧ wannu. Leɓ‘am tɛ bìì gima kinii nɛ haya-a hee mɔɔ-yɔr-mɔ ga.

³Ɛ́nɛ́ yora ŋgaiwi gan o bem ko o bíí zu nù lɛŋ; kɔ̧ nú‘nɛ́ duna nɛ̀ de ɔ̧ɔ̧-nyɔ̧ɔ̧-wen, wen Sɔ̧ toka de yoŋgo kpoo nɛ kpoo zu'nɛ́.

⁴Gbin-biro, ɛ̀nɛ̀ hɛ́r gba-paa guntir'nɛ́ tɛ gasamɔ in ŋgayamɔ k’ɛ́nɛ́,

⁵ɛ̀nɛ̀ dáŋ nyaŋa k’ɛ́nɛ́, ɛ̀nɛ̀ nɛ́ɛ̀ gbín biro wen zu kpasawen in kɔ̧ɔ̧ɗɔɔwen in deemɔ nɛ yuwar-a. Ɛ̀nɛ̀ ŋgáŋ kusaa k’ɛ́nɛ́ wen ŋgai k’ɛ́nɛ́ nɛ́ góò k’ɛ́nɛ́;

⁶nú-góò k’ɛ́nɛ́ ɔ tɔ̧a̧ pɛ́ɗɛ́ŋ-pɛ́ɗɛ́ŋ. O dukbíí tɛ tik nù ɗɔɔ naŋ‘nɛ́, o wisɛn ko wannu bó nɛ̀ ŋgai ɓɔna.

⁷GASA WAN Sɔ̧, damti k’ɛ́nɛ́ tɛ duk hegɔɔ ɓɔnsɛnɛ kpoo nɛ kpoo; dɔ́rá-wan k’ɛ́nɛ́ tɛ duk nɛ́ dɔ́rá-tanamɔ.

⁸Ɛnɛ kɔ̧ɔ̧ k’ɛ́nɛ́ nɛ́ deemɔ nɛ yuwar-a, ɓɛɛ ɛnɛ sɛna gɔɔmɔ; nɛ́ wen mɔ‘i a̧ GASA WAN, Sɔ̧ k’ɛ́nɛ́, tɛna nɛ́ nɔ̧́-tortɛ a zu'nɛ́, ɓɛɛ ŋma bíí nɛ tɛ nyɛm'nɛ́ bo na.

⁹Laa k’ɛ́nɛ́ lɛŋ nun nɛ de pɛr nyama nɛtɛ nɛtɛ;[9] o wi-mbɛr-kunde ya kɔ̧ tua-nin-fɔrɔ bíí nɛ̀ gima-desee h’ɛ́nɛ́.

¹⁰O boko-bem ko wannu a̧a̧ mgbara o wi nɛ̀ ɛnɛ kɔ̧a̧; kóò ko wannu ɗafa tɛ̀ nɛ̀ de goe-lɔr mɛ Ofir zar-zar, ɓɛɛ yor kɔ‘i nɛ̀ war wii-er'nɛ́.

¹¹Mɛ̀ zii, boko-bem kɔ‘m, mɛ̀ yéŋ zer-mɛ, tɛ-mɛ'ɛ bi ɗoŋ dukbíí kɔ-mɛ in nutua ko dáà kɔ-mɛ mbɛt,

¹²ɓɛɛ wannu tɛ de wɔ tɛ-mɛ. A̧ nɛ wan kɔ-mɛ kinii, mɛ̀ gú nù ti a̧.

¹³O bíí Tir, o gasa wanmbɔi nɔ‘i, tɛ ha̧ o ha̧a̧mɔ ha̧ mɛ wen ha̧ mɛ mɛ kɔ̧ wa.

¹⁴Boko-bem ko wannu ɗafa tɛ nɛ̀ de-a nyɛmna, a̧ aa o gba de kísí-lɔr tɛ a̧;

¹⁵a̧ pi̧ nɛ de sa̧a̧ laa ndáká-ndáká, ɓɛɛ wa mgbɔ nɛ a̧ si kɔ̧ kira ha̧ wannu; o gbama-zɔŋa kɔ̧-a̧ nɛ́ ɗoŋ-aa mgbɔ nɛ̀ a̧ nɛnɛ tululu sitɛ‘nɛ́;

¹⁶wa nɛ́ nɛ̀ desee in tortɛ si kɔ̧ kira ko wannu mɛ.

¹⁷O bezaŋ‘nɛ́ tɛ ya oi o zɔmdáa k’ɛ́nɛ́; ɛnɛ tɛ e wa nɛ̀ o be-wan dam zaŋnu fara lɛŋ.

¹⁸Mi tɛ de ha̧ nin'nɛ́ mɛ hur hɔ tɛ o bezaŋ‘nɛ́ nɛ tɛ ko ɗoŋ ŋmaa ɗoŋ ŋmaa nɛnɛ, ɓɛɛ o dukbíí tɛ gasi'nɛ́ hegɔ kpoo nɛ kpoo.