Read Northwest Gbaya GIMA 48 Bible Online

GIMA 48 - Northwest Gbaya bible

GIMA 48

¹Gima ko o bem ko Kore.

²GASA WAN nɛ́ zɔm mɔ, ɓɛɛ nyɛma so kànà ha̧ o bíí nɛ̀ ya saaye ko Sɔ̧ k’ɛɛ mɛ̀ mɛ́ zɔn a̧;

³ye'i duk zu sa̧a̧ kaya Siɔŋ nɛ̀ yora zɔŋa nyɛmna. Nɛ́ kaya'i a̧ ha̧ desee ha̧ bíí zaŋnu lɛŋ. Siɔŋ nɛ́ kaya ko Sɔ̧, ɓɛɛ ye ko GASA WAN a̧a̧ zu kaya'i.

⁴Sɔ̧ duk kɔ̧ tua-wan kɔ‘i nɛ̀ a̧a̧ saaye'i, ɓɛɛ a̧ nɛ́ fara-hu̧si ko o bíí ye'i.

⁵Ɛ̀nɛ̀ zɔ́k, o wannu mɔi̧a ŋmaa, ɓɛɛ nɔsi ŋmaa tɛnɛ mɛ bi ye'i;

⁶wa hɔa zɔk ye'i ŋmɛk, ɓɛɛ ɗɛɗɛ-wa gɔn! Bele zara wa, ɓɛɛ wa gbin gɔɗɛ̧ɛ̧ yu mɔ yak.

⁷Tɛ-wa naka, ɓɛɛ wa bi nɛ̀ mbɔɗɔnu hee nàá-zaŋ nɛ̀ de mɛ ko bem ga.

⁸Ɓɛɛ kànà nɛ́ búk-daŋa-wese nɛ̀ mbaŋ o gasa kombon Tarsis ɓɔnsɛnɛ‘i a̧ dee ŋmaa in wa.

⁹Mɔ n’ɛɛ zia so nɛti, nɛ́ mɔ‘i ɛɛ zɔka nɛ̀ yí-ɛɛ mbɛt. Mɔ‘i dea sɛn gasa ye ko Sɔ̧ k’ɛɛ, ye ko GASA WAN ko o gíí wi-biro. Sɔ̧ tɛ de ha̧ ye'i mɛ yor keŋ ɓɔnsɛnɛ.

¹⁰GASA WAN Sɔ̧, k’ɛ̀ɛ̀ yá kɔ̧ tua k’ɛ́nɛ́ ɓɛɛ tɛ-ɛɛ mbaŋa ɗoŋ kɔ̧ɔ̧mɔ k’ɛ́nɛ́.

¹¹Sɔ̧, nin'nɛ́ nɛ́ mɔ nɛ̀ hura dam zaŋnu lɛŋ; o bíí tɛ gasi kànà ɛnɛ hegɔ hɔ nduti-nù mɛ mbɛt. Wii-er'nɛ́ duna nɛ̀ deemɔ nɛ̀ yuwar-a.

¹²Kaya Siɔŋ nɛ́ fara nyɛŋɛ; o boko-bem ko Juda ya nɛ̀ tortɛ tɛ gɔna kita k’ɛ́nɛ́.

¹³Ɛ̀nɛ̀ zík Siɔŋ, ɛ̀nɛ̀ yár zík ɗoŋ-aa lɛŋ, ɛ̀nɛ̀ tɔ́r o kusa ŋgárá-pɛm-mɔ.

¹⁴Ɛ̀nɛ̀ zɔ́k o garo nɛ̀ zika ye'i, ɛ̀nɛ̀ mbáɗí o tua-wan nɛ̀ a̧a̧ saaye'i mbɛt, ɓɛɛ ɛ̀nɛ̀ wé ɗoŋ o mɔɔ nɔ‘i ha̧ o bezaŋ‘nɛ́ mɛ ɗoŋ.

¹⁵Ɛ̀nɛ̀ tɔ̧́ ha̧ wa ndé: Sɔ̧‘i nɛ́ Sɔ̧ k’ɛɛ, wan nɛ̀ duk kɔ‘i kpoo nɛ kpoo; a̧ nɛ́ wi-duk-ti k’ɛɛ.