Read Northwest Gbaya GIMA 49 Bible Online

GIMA 49 - Northwest Gbaya bible

GIMA 49

¹Gima ko o bem ko Kore ha̧ wan-duk-zu-gima.

²Ɛ̀nɛ̀ zíí wen’ɛ, ɛ́nɛ́ o dukbíí lɛŋ! Ɛ́nɛ́ o bíí zaŋnu,

³o gasawi in o géé bíí, ɛ́nɛ́ o wanmbɔi in o wisan, ɛ̀nɛ̀ yéŋ zer'nɛ́!

⁴Mi a̧a̧ nɛ̀ ŋma iŋa-mgbara-mɔ mɛ tɔ̧ h’ɛ́nɛ́ wen ŋma gasa iŋamɔ a̧a̧ kɔ̧ see-am'i,

⁵n'am tɛ tɔ̧ h’ɛ́nɛ́ nɛ̀ tua-wen; mi tɛ tɔ̧ gba̧a̧ sumgba h’ɛ́nɛ́ nɛ̀ gima-kunde.

⁶Ŋgimbi-bɔnɛ tɛ‘m tɛ nak bɔɔ wen ge? Ŋgimbi nɛ̀ sɛnmɔ ko bíí tɛ ndak am mɛ kɛr am e see-a, tɛ‘m tɛ nak wen ge?

⁷O wi nɔ‘i e ta nɛ̀ mbɔi kɔ-wa; wa ŋmaŋ tɛ zu dɔka mbɔi kɔ-wa,

⁸ɓɛɛ wi beka ha̧ mɔ mɛ gɔn nɛ̀ zu-wi nɛ̀ tɛ-wi na. Wi beka gɔn zu duka-kpasa er Sɔ̧ nɛ̀ mbɔi na mbɛt,

⁹wen mɔ nɛ̀‘i tɛ ha̧ gɔn nɛ̀ zu duka-kpasa er Sɔ̧ bó kóó kpɔk na; mɔ nɛ‘i tɛ ha̧ ha̧ Sɔ̧ lɛŋ beka nyɛm yí-a na.

¹⁰Ŋma ɓɔn-zan-bíí so sɛnɛ? Bíí beka fe so na?

¹¹O wi-iŋ-mgbara-mɔ nɛ́ mɔ'ɔ nɛ̀ fe mbɛt’ɛ! O wi nɛ̀ bó nɛ̀ kpasa taamɔ na in o ŋga-wi nɛ́ mɔ'ɔ nɛ̀ fe kànà fee mbɛt’ɛ! Ɓɛɛ wa ee mbɔi kɔ-wa ɓɔn ha̧ o bíí mɛ ɗoŋ.

¹²O pɛsi kɔ-wa tɛ ya nɛ́ fara-duk kɔ-wa ɓɔnsɛnɛ. Kóó wa gbara so nin ye kɔ-wa nɛ̀ nin-wa, sɔŋkur fara-duk kɔ-wa tɛ duk nɛ́ kɔ̧ pɛsi kpoo nɛ kpoo!

¹³Kà bíí nɛ́ ku̧u̧ naŋ kpaa mɔ kaɗi, ɓan na, ɓɛɛ wa ee iŋa-mgbara-mɔ duk. O wi nɔ‘i hɔɔ ŋmaa in mɔ-dai nɛ‘i ba nɛnɛ mɛ gɔn;

¹⁴hegɔ mɔ kɔ-wa nɛ́ ee ta nɛ̀ mɔ nɛ̀ wa de. Kà wa tɔ̧́ be wen laŋ, ɓɛɛ o bíí ndaka pata wa kaɗi.

¹⁵Fio tɛ dai wa hee o sami nɛ̀‘i kai nɛnɛ mɛ gbɛ ga; kà mɔ sá̧ kaɗi, wi zɔk oi-wa ɓɔna. Fara-duk kɔ-wa kànà nɛ́ ye ko o fio mɛ, ɓɛɛ o wi-de-mɔ nɛ yuwar-a tɛ gan wa.

¹⁶Ɓɛɛ war kɔ‘m, Sɔ̧ tɛ kpas'am sɛn ɗɔɔ ŋga er fio; a̧ tɛ kpɛk am.

¹⁷Kà ŋma bíí nɛ́ kpaa dɔka mbɔi, ɓɛɛ nɛ́ mɔ'ɔ nɛ̀ nyɛrɛ mbɔi kɔ̧-a̧‘i hura yaknɛ mbɛt, ká ɗɛɗɛ‘nɛ́ gɔn na!

¹⁸Ŋgimbi fio wi’ɛi beka ba ŋma mɔ nɛnɛ si fara-a mɛ na, gasamɔ kɔ̧-a̧ beka zir si ɗɔɔ mɛ in a̧ na mbɛt.

¹⁹A̧ duka so mɛ tɔ̧ ndé: wi tɛ zɔk kɔ‘i tɛ-wi nɛ de-a ha̧ o bíí mɛ zɔn wi wó, tɛ-a n'aa zɔna so ŋgimbi duka-a kɔ̧-a̧‘i

²⁰tɛ yak kànà sóróm si ɗoŋ o zɔmdáa kɔ̧-a̧ mɛ nɛ̀ wa beka zɔk kɔ-wa wese nɛ̀ yí-wa woyo ɓɔna!

²¹Kà bíí nɛ́ ku̧u̧ naŋ kpaa mɔ kaɗi, ɗoŋ-aa nyɛi̧ na, ɓɛɛ wa ee iŋa-mgbara-mɔ duk. O wi nɔ‘i hɔɔ ŋmaa in mɔ-dai nɛ̀‘i ba nɛnɛ mɛ gɔn.