Read Northwest Gbaya GIMA 50 Bible Online

GIMA 50 - Northwest Gbaya bible

GIMA 50

¹Gima ko Asaf. GASA WAN Sɔ̧ nɛ̀ gana o ŋma sɔ̧ lɛŋ tɔ̧ nɛ́ wen sa nɛ̀ o bíí zaŋnu; nɛ̀ tɛ daŋa-wese hɔ nɛnɛ tɛ yee-wese

²sɔnti Sɔ̧ tok ŋgol-ŋgol nɛ̀ gba de ye Siɔŋ mɛ tɛnɛ.

³Sɔ̧ k’ɛɛ à̧ tɛ́! Ká a̧ duk nɛ oi-nú ɓɔna! Gasa wee-dɔ-wi a̧a̧ ti ha̧ a̧, ɓɛɛ mɔ nɛ̀ duk zik a̧ nɛ́ gba búk-kórò.

⁴A̧ sa nɛ o mɔ mɛ yiwese in o mɔ mɛ zaŋnu mbɛt; Sɔ̧ sa wa mɛ zii gɔna-kita zu dukbíí kɔ‘i.

⁵Ɛ̀nɛ̀ mɔ́í̧ o wi-mbo-zu nɛ̀ nɔɔ so tɔk in am tɛ ɗafa-sɔ̧ kɔ-wa tɛnɛ pii tɛ‘m.

⁶Yiwese a̧ we ɗoŋ deemɔ nɛ yuwar-a ko Sɔ̧, wen wan-gɔn-kita nɛ́ Sɔ̧ kpɔk ɓɛɛ!

⁷Dukbíí kɔ‘m, ɛ̀nɛ̀ yéŋ zer'nɛ́, ɛ̀nɛ̀ zíí mɔ n'am tɛ tɔ̧ h’ɛ́nɛ́‘i! O be Israɛl, nɛ́ wen k’ɛ́nɛ́ a̧‘m tɛ tɔ̧‘i: «Mi nɛ́ Sɔ̧, Sɔ̧ k’ɛ́nɛ́!»

⁸Bó nɛ́ mi tɔ̧ wen a zu'nɛ́ wen ɗafa-sɔ̧ k’ɛ́nɛ́ na, bó nɛ́ dɔɔ kpoo-ɗafi-sɔ̧ k’ɛ́nɛ́ ha̧‘m a̧ ɗaŋ see-am na mbɛt;

⁹bó nɛ́ mi kii nɛ gasa wiwii-ndai k’ɛ́nɛ́ na, kóó vala gbadua k’ɛ́nɛ́ na mbɛt,

¹⁰wen o saɗi zaŋbɛɛ nɛ̀ ya’ɛ lɛŋ nɛ́ mɔ-dai kɔ‘m. O saɗi nɛ̀ gbisi zu o gíí kaya nɛnɛ‘i lɛŋ nɛ́ kɔ‘m.

¹¹Mi iŋa o nɔ̧́í̧ ɗɔɔ yiwese lɛŋ; ŋma mɔ nɛ̀ yar nɛ̀ zaŋbɛɛ nɛ̀ bó nɛ́ kɔ‘m na bo na.

¹²Kóó so nɛ́ wɔ'ɔ gbɛɛ so'm, mi beka tɔ̧ so h’ɛ́nɛ́ na, wen nù in mɔ nɛ ya zaŋ-aa lɛŋ nɛ́ kɔ‘m;

¹³kpoo wiwii-ndai nɔ‘i, mi nyɔŋ so kɔ‘m nyɔŋ, kà bó nɛ̀ nɔɔ tɔk vala gbadua nɔ‘i k’ɛ́nɛ́‘i?

¹⁴Ɗafa-sɔ̧ k’ɛ́nɛ́ a̧ duk nɛ́ dee osoko ɛ̧, ɓɛɛ mɔ n’ɛnɛ ha̧a̧ so nú‘nɛ́ mɛ de ha̧ GASA WAN nɛ̀ duk ŋgɔn mɛ‘i, ɛ̀nɛ̀ dé kànà ŋgaɓo!

¹⁵Ɛ̀nɛ̀ sá‘m wese bɔnɛ k’ɛ́nɛ́; mi tɛ kpasi'nɛ́, ɓɛɛ ɛ́nɛ́ tɛ tu̧ tɛ‘m.

¹⁶Ɓɛɛ nɛ́ mɔ'ɔ nɛ̀ Sɔ̧ tɔ̧ɔ̧ ha̧ wi-ɗaŋ ndé: Mɛ́ we bɔɔ ɗoŋ o tɔ̧ɔ̧-wen kɔ‘m wen ge? Mɛ́ tɔ̧ bɔɔ wen nɔɔ-tɔk kɔ‘m nɛ̀ ndàrá-nú-mɛ sɔɔ géè wen ge?

¹⁷Wen bó nɛ́ mɛ́ zii mbɔrɔ kɔ‘m zii na; bó nɛ́ mɛ́ kasi wen kɔ‘m kasi na mbɛt.

¹⁸Kɔ-mɛ, kà mɛ zɔ́k wi-zuzu, ɓɛɛ mɛ gbama yari in a̧, mɛ́ bá nɛ́ sɛm in o wi-de-dàlà mbɛt;

¹⁹kɔ̧ nú-mɛ duna nɛ̀ ɗaŋ wen, ɓan na ɓɛɛ leɓe-mɛ dee ndela kaɗi.

²⁰Fara nɛ̀ mɛ duk nù sɛnɛ lɛŋ, kɔ-mɛ kànà nɛ́ ɓira wen ndela e nú nya-mɛ, kai nɛ̀ ndaa o gbo-ɗoŋ-mɛ mbɛt.

²¹Mɔ nɛ̀ mɛ de'i, mɛ ta kɔ-mɛ ndé, mi beka tɔ̧ wen á zu mɛ na? Mɛ́ zɔka mi hɔɔ ŋmaa in mɛɛ?

²²Ɛ́nɛ́ nɛ̀ tɛ‘nɛ́ bi ɗoŋ Sɔ̧'ɛ, ɛ̀nɛ̀ bá zu'nɛ́ wen ká‘m tɛɛ gbɔsi'nɛ́ nɛ̀ wi-kpasi'nɛ́ beka bo na.

²³Wi nɛ̀ ɗafi Sɔ̧ nɛ̀ déé osoko gasi nɛ̀‘m, ɓɛɛ bíí nɛ ndak pata yuwar demɔ, mi tɛ de ha̧ wi’ɛi mɛ iŋ ndé, Sɔ̧ nɛ́ wi-kpas'aa.