Read Northwest Gbaya GIMA 53 Bible Online

GIMA 53 - Northwest Gbaya bible

GIMA 53

¹Gima ko David ha̧ wan-duk-zu-gima, ŋgimbi dita-see.

²O wi nɛ̀ bó nɛ̀ kpasa taamɔ na ta kɔ‘i ndé, Sɔ̧ bo na. Ɗaŋ taamɔ kɔ-wa ɗaŋa wa lɛŋ; ŋma wi-de-demɔ bo géé boa-a ɓɔna.

³Sɔ̧ duk yiwese mɛ pi̧ nɛ̀ yí pii zu o bezaŋ Adam ha̧ a̧ mɛ zɔk kà ŋma wi-iŋ-mɔ nɛ̀ kii Sɔ̧ nɛ́ bòó sɛnɛ wó,

⁴ɓɛɛ kóó kpɔk bo na. Wa lɛŋ a̧ra̧, deemɔ kɔ-wa lɛŋ ɗaŋa, ŋma wi-de-demɔ bo géé boa-a kpɔk na.

⁵O wi-de-mɔ de na nyɔŋ kɔ‘i nɛ dukbíí kɔ‘m hee brɛt-nyɔŋ kɔ-wa ga. Wa sa nin GASA WAN na. Wa iŋ mɔ na nde?

⁶Bele tɛ zar wa nɛ̀ wa beka iŋ zu-a na, wen Sɔ̧ tɛ pɛsi gba̧a̧-tɛ o wi-kɛr-am nɔ‘i; o bíí tɛ zɛkɛɗi wa wen Sɔ̧ siŋa wa a nù kaɗi.

⁷O'o tɛ tɛ nɛ̀ Siɔŋ mɛ kpasi o be Israɛl o? Ŋgimbi nɛ̀ GASA WAN tɛ gbo dukbíí kɔ‘i yinɛ tɛ bara, tortɛ tɛ ba Jakob ɓɛɛ o be Israɛl tɛ ya nɛ̀ desee.