Read Northwest Gbaya GIMA 62 Bible Online

GIMA 62 - Northwest Gbaya bible

GIMA 62

¹Gima ko David ha̧ wan-duk-zu-gima Yedutun.

²Fara-ɔm-tɛ kɔ‘m kànà nɛ́ katɛ Sɔ̧ kpɔk ɓɛɛ, a̧ nɛ́ wi-kpas'am;

³a̧ nɛ́ kam-ta kɔ‘m, a̧ a̧ kpás'am; a̧ nɛ́ ŋga fara-duk kɔ‘m, naŋ-am beka mbali ŋmaa na.

⁴Ɓɛɛ k’ɛ́nɛ́, o wi-sɛn-am nɔ'ɔ, kɔ‘m n'am wɛra wɔkdɔk hee gbina garo ga’ɛ, n'am duk hee gbina ŋgeŋ ga’ɛ, ɛ́nɛ́ tɛ e bɔɔ nas'am duk mɛ gese ge?

⁵Ee-zu-mɔ kɔ-wa nɛ́ géé ɔramɔ, ɔra bíí nɛ́ desee kɔ-wa; toka-de-yoŋgo kɔ-wa nɛ́ ndela géè ɓɛɛ nɛ̀ kɔ̧ see-wa mɛ wa fom nɛ́ bíí.

⁶Sɔ̧-tɛ‘m, mɛ̀ ɛ́k tɛ-mɛ nɛ Sɔ̧ wen a̧ nɛ́ mɔɔ-e-nɛ-ta kɔ‘m;

⁷a̧ nɛ́ kam-ta kɔ‘m, nɛ́ a̧ a̧ kpas'am; a̧ nɛ́ ŋga fara-duk kɔ‘m, naŋ-am beka mbali ŋmaa na;

⁸a̧ ha̧a̧ gasamɔ ha̧‘m ɓɛɛ a̧ kpas'am, a̧ nɛ́ kam-ta-ha̧-ŋgai ha̧‘m. GASA WAN nɛ́ fara-hu̧si kɔ‘m,

⁹Ɛ́nɛ́ dukbíí lɛŋ, ɛ̀nɛ̀ é ta nɛ̀ a̧; ɛ̀nɛ̀ tɔ̧́ mɔ nɛ̀ a̧a̧ kɔ̧ see'nɛ́ ha̧ a̧; wen a̧ nɛ́ fara-hu̧si k’ɛɛ.

¹⁰O bem ko Adam nɛ́ geemɔ géè hee buk ga, o bem ko bíí nɛ́ géé faɓa mɔ géè; kóó wi ga̧i̧a̧ so wa mɛ zɔk dita wa, búk nɛ̀ yu’ɛ dita gan wa.

¹¹K’ɛ́nɛ́ e tɛ‘nɛ́ tɛ dee ŋgamɔ na, k’ɛ́nɛ́ pɔkɔsi tɛ‘nɛ́ tɛ zu̧u̧ mɔ géè na; k’ɛ̀nɛ̀ nɛ́ kpaa mɔ, k’ɛ́nɛ́ e see'nɛ́ tɛ mɔɔ nɔ‘i na.

¹²Mi zia wen nɛ̀ Sɔ̧ tɔ̧a̧ war yiitoo; gba̧a̧ wen'i nɛ́ mɔ'ɔ: ŋgai nɛ́ ko Sɔ̧.

¹³GASA WAN, kɔ̧ɔ̧mɔ nɛ́ k’ɛ́nɛ́, ɓɛɛ k’ɛ́nɛ́, ɛ́nɛ́ nɛ́ wan-ha̧-mɔɔ-oi-tom ha̧ o bíí nyɛm nɛ̀ ɗoŋ tom kɔ-wa.