Read Northwest Gbaya GIMA 65 Bible Online

GIMA 65 - Northwest Gbaya bible

GIMA 65

¹Gima ko David ha̧ wan-duk-zu-gima.

²Sɔ̧, o bíí a̧ zɔn'nɛ́ nɛ̀ Siɔŋ mɛ; mɔ nɛ̀ wa ha̧a̧ so nú sɛnɛ h’ɛ́nɛ́ kaɗi, wa a̧ dé kànà ŋgaɓo,

³wen ɛ́nɛ́ nɛ́ wan-zii-kɔfa-sɔ̧ ko bíí. O bíí lɛŋ tɛ tɛ tɛ‘nɛ́,

⁴nɛ̀ oi ɗaŋmɔ kɔ-wa lɛŋ; o yɔɔ-kaya k’ɛɛ dɔka gan zu yɛ, ɓɛɛ wi-bia-a yinɛ nɛ́ ɛ́nɛ́ kpɔk ɓɛɛ.

⁵Wi n’ɛnɛ hoka mɛ duk nɛ́ bíí k’ɛ́nɛ́ duk kɔ‘i nɛ̀ desee nú zala k’ɛ́nɛ́; ɛ̀nɛ̀ dé h’ɛ́ɛ́ mɛ sur nɛ o demɔ mɛ kɔ̧ sa̧a̧ tua k’ɛ́nɛ́ mɛ.

⁶Sɔ̧, wi-kpasi-ɛɛ, kifa-nú k’ɛ́nɛ́ h’ɛ́ɛ́ nɛ́ gasamɔ n’ɛnɛ de tɛ deemɔ nɛ yuwar-a k’ɛ́nɛ́; o wi nɛ ya nduti-nù in o wi nɛ ɔ nɛ nyɛi̧a-a si see-kisi mɛ e ta nɛ̀ ɛ́nɛ́.

⁷Ŋgai k’ɛ́nɛ́ nɛ́ zɔm gasamɔ wen nɛ́ ŋgai k’ɛ́nɛ́‘i a̧ kasi o kaya mɛ́ ya kpɔk oi;

⁸nɛ́ ɛnɛ'ɛ de ha̧ kura-a ko gba-tɔp in zɔm pɛŋa-yì lɛŋ mɛ ga̧. Nɛ́ ɛ́nɛ́ a̧ gai giti foomɔ ko dukbíí mbɛt.

⁹Tɛ zɔka o gasamɔ n’ɛnɛ dea, kíì dee o bíí hɔ nduti-nù mɛ; ɓɛɛ nɛ̀ daŋa-wese gɔm yee-wese mɛ, tortɛ ba nɛ wa.

¹⁰Kà dé, ɓɛɛ ɛnɛ tɛɛ zɔk nù; ɛ́nɛ́ ha̧a̧ kórò, ɓɛɛ ɛnɛ duna nù nɛ̀ demɔ, yì k’ɛ́nɛ́ foka a gun nyɔnɔ dɛm nɛnɛ yaknɛ.

¹¹Ɓɛɛ tom-dee k’ɛ́nɛ́ nɛ́ mɔ'ɔ: Ɛ́nɛ́ a nɛ yì tɛ o mbùkù-nyɔnɔ, ɛ́nɛ́ gba nɛ kii-nù, ɓɛɛ ɛnɛ dee ha̧ kórò mɛ hɔ ha̧ nù mɛ mɔk nɛ̀ de-a, ha̧ bɔr-mɔ mɛ dɛm nɛ̀ dɔka-a.

¹²Ɛ́nɛ́ de ha̧ nyɔnɔ mɛ dɛm dam ɗoŋ pɛ kpɔk kpɔk; mɔ dɛm oi pata naŋ‘nɛ́ nɛ̀ dɔka-a.

¹³Zɔ̧ fara-nyɔŋ-mɔ ko ndai ŋga-gbárà mɛ ɓɔɔ lɛŋ, ɓɛɛ ká̧ naŋ o kaya nɛ́ fara-de-ɓɔlɔ in fara-kpiɗi-zaŋgule ko o saɗi.

¹⁴O mɔ-dai hura fara-dai-wa, o bɔkɔ-nù kpee nɛ̀ alkamaari ɓɛɛ o bíí lɛŋ ya nɛ̀ tortɛ bíí nɛ̀ gima.