Read Northwest Gbaya GIMA 66 Bible Online

GIMA 66 - Northwest Gbaya bible

GIMA 66

¹Gima ko wan-duk-zu-gima. Bíí zaŋnu’ɛ lɛŋ a̧ súmbúrí Sɔ̧!

²Ɛ̀nɛ̀ bíí gima zɔn nɛ̀ nin-a, ɛ̀nɛ̀ zɔ́n a̧ tɛ gasamɔ kɔ̧-a̧,

³ɓɛɛ ɛ̀nɛ̀ tɔ̧́ ha̧ a̧ ndé: «GASA WAN, ɛ́nɛ́ de mɔɔ-gɔn-ɗɛɗɛ-wi nyɛmna! «Tom k’ɛ́nɛ́ nyɛma ŋmaa in ŋgai k’ɛ́nɛ́; o wisɛn k’ɛ́nɛ́ kifa duk nɛ́ wi-sumburi'nɛ́.»

⁴O bíí zu nù'ɛ lɛŋ gu nɛ́ nù ti'nɛ́, bíí nɛ̀ gima h’ɛ́nɛ́ zɔn nɛ̀ nin'nɛ́.

⁵Ɛ̀nɛ̀ tɛ́ ɛ̀nɛ̀ zɔ́k deemɔ ko Sɔ̧; tom lɛŋ n'aa dee mgbara bíí nɛ́ mɔɔ-gɔn-ɗɛɗɛ-wi.

⁶Sɔ̧, ɛ́nɛ́ dee ha̧ gba-tɔp mɛ ɔ̧sa̧ ta̧i-ta̧i̧ kifi nɛ́ ŋga nù, ɓɛɛ wa ku nana-yì nɛ̀ naŋ daŋ kur mɛ. Desee k’ɛɛ a̧ dúk tɛ Sɔ̧,

⁷wen a̧ ɔ wan nɛ̀ ŋgai kɔ̧-a̧ ɓɔnsɛnɛ. Yí-a a̧a̧ zu o tugun bíí; ká o wi-ŋgazu ba zu nɛ̀ ŋgɔn na ŋgaɓo!

⁸O dukbíí lɛŋ, ɛ̀nɛ̀ zɔ́n Sɔ̧ k’ɛɛ, ɛ̀nɛ̀ bíí gima gasi nɛ̀ a̧

⁹wen nɛ́ a̧ a̧ de h’ɛ́ɛ́ mɛ ya kpasa, nɛ́ a̧ a̧ pɛm yɛ k’ɛɛ tɛɛ kɔ̧ naŋ yɛ.

¹⁰GASA WAN, ɛ́nɛ́ wee taamɔ k’ɛɛ; ɛ́nɛ́ nɔi̧a ɛɛ hee mɔ'ɔ nɛ‘i nɔ̧́í̧ nɛ̀ boi ha̧ boi mɛ sa̧'ɛ ga.

¹¹Ɛ́nɛ́ dee h’ɛ́ɛ́ mɛ tik yí pɛ́r, ɛ́nɛ́ ee dita tui zu yɛ;

¹²ɛ́nɛ́ ee ha̧ o bíí mɛ i̧si̧ zu yɛ yak nɛnɛ, ɛɛ yee yí wee in ɗɔɔ yì, ɓɛɛ ɛ́nɛ́ mgbɔ yɛ gbonɛ h’ɛ́ɛ́ mɛ kpa demɔ.

¹³Mi tɛ̀ɛ̀ píí kɔ̧ tua k’ɛ́nɛ́ mɛ dɔ kpoo-sɔ̧ h’ɛ́nɛ́; mɔ‘i nɛ́ mɔ n'am baa ha̧ nú sɛnɛ h’ɛ́nɛ́

¹⁴ŋgimbi ŋga bɔnɛ kɔ‘m'i, ɓɛɛ nɛ́ mɔ‘i a̧‘m de h’ɛ́nɛ́ kinii'i.

¹⁵Mi dɔ nɛ kpoo-sɔ̧ h’ɛ́nɛ́, ɓɛɛ zi-wee vala sami n'am dɔ‘i tɛ tur daŋ sitɛ‘nɛ́. Mi dɔ nɛ wiwii-ndai in o vala gbadua h’ɛ́nɛ́ mbɛt.

¹⁶Ɛ́nɛ́ o wi-yu-kíí Sɔ̧, ɛ̀nɛ̀ tɛ́ ha̧‘m we ɗoŋ mɔ n'aa dee ha̧‘m, ɛ̀nɛ̀ zii.

¹⁷Mi saa sara sitɛ Sɔ̧ zɔn nɛ a̧;

¹⁸kà ŋma ɗaŋmɔ a̧ bòò so kɔ̧ see-am gáà, bó nɛ́ GASA WAN tɛ̀ɛ́ zii so sara kɔ‘m zii na.

¹⁹Nɛ́ mɔ'ɔ nɛ̀ GASA WAN zia aia-nú kɔ‘m, ɓɛɛ a̧ kɔ̧ ɗɔɔ kɔfa-sɔ̧ kɔ‘m mbɛt.

²⁰Mi zɔn nɛ́ Sɔ̧ wen a̧ bɛ̧ kɔfa-sɔ̧ kɔ‘m na; a̧ ba kɔ̧ɔ̧mɔ kɔ̧-a̧ yinɛ zu'm na mbɛt.