Read Northwest Gbaya GIMA 69 Bible Online

GIMA 69 - Northwest Gbaya bible

GIMA 69

¹Gima ko David ha̧ wan-duk-zu-gima. Ger gima’ɛ nɛɛ nɛ́ ɗoŋ gima: Gba-dɛŋ.[16]

²Sɔ̧ kɔ‘m, ɛ̀nɛ̀ kpás'am! Yì daŋa'm hɔ tiger-am kaɗi!

³Mi yee ɓɔtɛ-bin-be-zɔŋa, fara-e-naŋ-am bo na; mi yee nɛ́ zɔm ɗuka yì yak zu'm lɛŋ, ɓɛɛ kin-yì ba'm yaknɛ.

⁴Tɛ‘m mbɔia tɛ saa sara sitɛ Sɔ̧, ger-am fara kaɗi; yí‘m ɗuka tɛ pɛma Sɔ̧, gbakna a̧ tɛɛ kpas'am.

⁵O wi nɔ'ɔ nɛ̀ sɛn am géè'ɛ, dɔka wa gana mu̧i̧-zu'm; o wi nɛ̀ kɔ̧ɔ̧ ha̧ mɔ mɛ ba tɛ‘m sɔɔ géè‘i ya mgbiɗiɗi; mɔ n'am ba er wa na, nɛ́ mɔ‘i a̧ wa ak er-am.

⁶Sɔ̧, mɔɔ-mgbele n'am dee so'i, ɛ́nɛ́ iŋa; o yɔɔ-kaya kɔ‘m lɛŋ a̧a̧ ti'nɛ́.

⁷GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ, k’ɛ́nɛ́ e ha̧ foe mɛ de o wi-e-ta nɛ̀ ɛnɛ wen zu'm na; Sɔ̧ ko Israɛl, k’ɛ́nɛ́ e ha̧ ziimɔ mɛ ba o wi-kii'nɛ́ na mbɛt.

⁸Mɛ̀ nɛ́ wen zu'nɛ́ a̧‘m zɔk nɛ̀ bɔnɛ dara’ɛ; dara nɔ‘i pi̧ nɛ foe tɛ‘m nyɛmna.

⁹Mi kifa gɔni bem mgbara o nya'm, ɓɛɛ o mgbák bem ko nàà kɔ‘m iŋ yí‘m ɓɔna.

¹⁰Wɔ duka-a kɔ̧ tua k’ɛ́nɛ́ gbɛ‘m gbɛɛ lɛk-lɛk, ɓɛɛ dara nɛ̀ wa da̧ nɛ̀ ɛnɛ‘i pii ɗoŋ tik nɛ́ zu'm.

¹¹Kà‘m tɔ̧‘e ha̧‘m de bɔnɛ nɛ̀ tɛ‘m nɛ̀ zima-yì wó, wa puta'm kpút-kpút gu zu te;

¹²kà‘m tɔ̧‘e ha̧‘m pi̧ laa-zim-mɔ tɛ‘m ha̧ wa zɔk wó, ɓɛɛ wa zɛkɛɗa'm mɛ fe e sɛnɛ.

¹³O wi nɛ̀ ya bee-gara saaye zɔk am hee mɔɔ-de-zɛŋ kɔ-wa ga; ko o wi-nɔ-dɔ̧ɔ̧ kànà nɛ́ ea'm nɛ̀ gima ɓɔnsɛnɛ ɗaŋ nɛ̀ nin-am.

¹⁴GASA WAN, mi ai nɛ nú h’ɛ́nɛ́ tɛ de ŋgimbi’ɛ, ɛ̀nɛ̀ kífí nú ha̧‘m tɛ gasa kɔ̧ɔ̧mɔ k’ɛ́nɛ́ nyɛm nɛ̀ ɗoŋ ha̧a̧nú-kpas‘am n’ɛnɛ ha̧a̧ so'i.

¹⁵Ɛ̀nɛ̀ kpás'am ɗɔɔ gba ɓɔtɛ'ɛ ká‘m tɛɛ ye yak nɛ̀ oi zu'm; ɛ̀nɛ̀ kpás'am er o wisɛn kɔ‘m, ɛ̀nɛ̀ kpás'am ká‘m tɛɛ fe yì.

¹⁶Ká o pɛŋa-yì kpe zu'm na, ká‘m tik kɔ̧ gboŋgo na, ká wa gbɛ‘m nɛ̀ zu-kpasa na.

¹⁷GASA WAN, ɛ̀nɛ̀ kífí nú ha̧‘m tɛ kɔ̧ɔ̧mɔ k’ɛ́nɛ́ nɛ̀ dee nyɛmna'i; ɛ̀nɛ̀ zɔ́k mɔ pii tɛ‘m tɛ gasa dee demɔ k’ɛ́nɛ́.

¹⁸K’ɛ́nɛ́ hu̧si sɔnti'nɛ́ nɛ̀ wi-de-tom k’ɛ́nɛ́ na. Mi a̧a̧ tɛ ŋga bɔnɛ! Ɛ̀nɛ̀ kífí nú ha̧‘m bee!

¹⁹Ɛ̀nɛ̀ ɗɔ́ŋ pii katɛ‘m, ɛ̀nɛ̀ kífí er oi nú‘m, ɛ̀nɛ̀ kpás'am er o wisɛn kɔ‘m.

²⁰Ɛ́nɛ́ zɔka da̧a̧‘m nɛ̀ wa da̧‘i! O wi-nukur'am nɔ‘i lɛŋ, ɛ́nɛ́ iŋa wa. Dara nɛ̀ wa da̧ nɛ‘m'i gbina gba̧a̧-tɛ‘m lɛŋ. Ŋma nyina nɛ̀ tɛ kpas'am tɛ foe in ɗaŋsee kɔ‘m'i bo na. Mi taa so kɔ‘m ndé, mi tɛ̀ɛ́ kpa ŋma wi-de-ko ha̧‘m wó, ɓɛɛ bo na, ŋma wi-ga̧-see-am bo na kóó kpɔk.

²²War nyɔŋmɔ kɔ‘m nɛ̀ wa ha̧‘m nɛ́ ɔ̧nɔ̧; wɔ-yì gbɛa'm ɓɛɛ wa ɗu nɛ́ kpa̧i̧a̧-dɔ̧ɔ̧ e nú‘m.

²³Fara-nyɔŋ-mɔ kɔ-wa a̧ dúk nɛ́ lim ha̧ wa; kpaamɔ kɔ-wa a̧ dúk nɛ́ sak nɛ̀ tɛ tik wa.

²⁴Yí-wa a̧ bá tum, ká wa zɔk mɔ na, ɗoŋ-wa a̧ bír ɓɔn kpoo nɛ kpoo.

²⁵Nyimsea k’ɛ́nɛ́'ɛ tík zu wa, a̧ dɔ wa hee wee ga;

²⁶ye kɔ-wa a̧ kifi nɛ́ ŋga-gbárà, o tua kɔ-wa a̧ ya nɛ́ o gɛ̧ɛ̧ tua,

²⁷wen wa nukuri kɔ-wa nɛ́ bíí n’ɛnɛ gusa kaɗi. Wa usi nɛ́ bɔnɛ ha̧ wi n’ɛnɛ dee mɔ ba tɛ-a kaɗi.

²⁸Ɛ̀nɛ̀ ɓá ɗoŋ yɔɔ-kaya kɔ-wa lɛŋ; k’ɛ́nɛ́ de mɔ in wa nɛ yuwar-a ɓɔna.

²⁹Ɛ̀nɛ̀ bí nin-wa yinɛ zaŋ kalata duka-kpasa; k’ɛ́nɛ́ tɔr wa mgbara o wi-de-mɔ nɛ yuwar-a na.

³⁰Ɓɛɛ Sɔ̧, kɔ‘m yaa-bira-ɗoŋ'ɛ, mi wan-da̧i̧'ɛ, ɛ̀nɛ̀ kpás'am, ɛ̀nɛ̀ bá‘m e ŋgɔn.

³¹Mi tɛ zɔn nin GASA WAN nɛ̀ gima, mi tɛ zɔn nin-a nɛ̀ dee osoko

³²wen mɔɔ nɔ‘i dee tɛ-a gan wiwii-ndai nɛ̀ a̧a̧ nɛ̀ zak in gbaa sara-naŋ.

³³O wi-mɔka-see zɔka mɔ‘i ɓɛɛ wa de nyɛŋɛ. Ɛ́nɛ́ o wi nɛ̀ kii Sɔ̧, ɛ̀nɛ̀ nɔ ŋgiɗi!

³⁴GASA WAN zii aia-nú ko o wisan zii, a̧ e o bíí kɔ̧-a̧ nɛ̀ wa kaia nɛ̀ bara tɛ geemɔ na.

³⁵Yiwese in nù a̧ súmbúrí a̧! Gba-tɔp in mɔ nɛ̀ a̧a̧ ɗɔɔ-aa lɛŋ a̧ súmbúrí a̧!

³⁶Wen GASA WAN tɛ kpasi Siɔŋ; a̧ tɛ ba nù ko Juda e ŋgɔn woyo, nɛ́ fara'i a̧ dukbíí kɔ̧-a̧ tɛ ba fara ye kɔ‘i sɛnɛ,

³⁷ɓɛɛ o bezaŋ o wi-de-tom kɔ̧-a̧ tɛ ɔ ye nɔ‘i nɛ̀ ɗoŋ, o wi-kɔ̧-ɗɔɔ nú-a tɛ ya hi̧i̧.