Read Northwest Gbaya GIMA 7 Bible Online

GIMA 7 - Northwest Gbaya bible

GIMA 7

¹Gima nɛ David bia ha̧ Sɔ̧ wen Kus, bezaŋ Bɛnjamin.

²GASA WAN, fara-hu̧si-tɛ‘m nɛ́ tɛ‘nɛ́; ɛ̀nɛ̀ kpás'am er o wi nɛ nukur'am, ɛ̀nɛ̀ gbó‘m er-wa yinɛ,

³ká wa tɛɛ ba'm yaknɛ mɛ a̧k am pɛ́sɛ́-pɛ́sɛ́ hee mɔ'ɔ nɛ dila a̧k nɛ mɔ ga, ɓɛɛ wi-kpas'am beka bo na.

⁴GASA WAN, Sɔ̧ kɔ‘m, kà‘m nɛ́ ɔra bíí mɛ kai mɔ er wa ndé,

⁵kà‘m nɛ́ kifa er ɗaŋmɔ ha̧ o wi nɛ de demɔ in am ndé, kà‘m nɛ́ ee ŋma wi-kur-zu'm mɛ yak géè ndé,

⁶ɓɛɛ nɛ̀ wisɛn kɔ‘m a̧ ndak am ba, a̧‘a̧ i̧sa'm nɛ̀ zu kpasa, ɓɛɛ mɔɔ-duk-tɛ kɔ‘m a̧ zakati fuunu.

⁷GASA WAN, ɛ̀nɛ̀ kúr nɛ nyimsea! Sɔ̧ kɔ‘m, ɛ̀nɛ̀ tún! Ɛ̀nɛ̀ gɔ́n ti o wi-kur-zu'm, ɛ̀nɛ̀ dúk katɛ‘m, h’ɛ́nɛ́ mɛ gɔn gɔna kita.

⁸O dukbíí nɛ ya zaŋnu’ɛ a̧ zik'nɛ́, ɓɛɛ sɛn zu damti k’ɛ́nɛ́, ɛnɛ ɔ wan zu wa.

⁹GASA WAN, nɛ́ ɛnɛ'ɛ gɔn kita zu o tugun bíí. GASA WAN, ɛ̀nɛ̀ gɔ́n kita zu'm nyɛm nɛ ɗoŋ deemɔ nɛ yuwar-a in duka-a kɔ‘m zóóŋ.

¹⁰Ɛ́nɛ́ nɛ̀ zɔk mɔ gbo kɔ̧ see-wi, nɛ̀ mbaɗi taamɔ ko bíí mbɛt’ɛ, Sɔ̧ wi-de-mɔ nɛ yuwar-a, ɛ̀nɛ̀ dé ha̧ kóó-ta ko o wi-de-ɗaŋmɔ mɛ kaɗi; ɓɛɛ ɛ̀nɛ̀ há̧ nɔɔ-ŋgiɗi ha̧ wi-de-mɔ nɛ yuwar-a!

¹¹Sɔ̧ nɛ́ ŋgee-kpe-ɗoŋ-am, a̧ nɛ́ wan-kpasi o wi nɛ see ɔ tana.

¹²Sɔ̧ gɔn kita nɛ yuwar-a, a̧ de nyimsea nɛ haya-a na, ɓɛɛ mɔ kpɔk, o wi nɛ pii ɗoŋ tɛ a̧ na, ɓan na see-aa nyima zu wa kaɗi. Wisɛn a̧ bɛŋ nú gba-paa kɔ‘i, a̧ a̧ ŋgaŋ kusaa kɔ̧-a̧, a̧ a̧ dak góò e ɗoŋ kusaa'i,

¹⁴ɓɛɛ o boi-gbɛ-wi nɔ‘i kɔ̧-a̧‘i lɛŋ tɛ gbɛ kànà nɛ a̧. O góò kɔ̧-a̧‘i tɛ kifi nɛ́ géé kan-du-wee.

¹⁵Zɔ́k a̧ wo! Duk hee a̧ baa nɛ zaŋ-ɗaŋmɔ ga; a̧ baa nɛ zaŋ-bɔnɛ ɓɛɛ ko nɛ ɗaŋmɔ pi̧ nù.

¹⁶Kɔ̧ n'aa za̧a̧, nɛ́ lim a̧ a̧ gɔna; zɔk a̧ n'aa tɛ tik lim kɔ̧-a̧‘i!

¹⁷Gbɛɛ-zu kɔ̧-a̧ tɛ pii kànà ɗoŋ zu a̧ woyo; dee ŋgamɔ kɔ̧-a̧ tɛ tik kànà bɛɗɛ zu-a.

¹⁸Mi tɛ de osoko ha̧ GASA WAN wen deemɔ kɔ̧-a̧ nɛ yuwar-a; mi tɛ bìì gima zɔn nɛ̀ nin GASA WAN nɛ̀ duk ŋgɔn mɛ.