Read Northwest Gbaya GIMA 71 Bible Online

GIMA 71 - Northwest Gbaya bible

GIMA 71

¹GASA WAN, fara-hu̧si kɔ‘m nɛ́ tɛ‘nɛ́, k’ɛ́nɛ́ e ha̧ ziimɔ mɛ ba'm na.

²Tɛ deemɔ k’ɛ́nɛ́ nɛ yuwar-a, ɛ̀nɛ̀ yé ɗoŋ-am, ɛ̀nɛ̀ gbák am. Ɛ̀nɛ̀ yéŋ zer'nɛ́ pii tɛ‘m, ɛ̀nɛ̀ kpás'am!

³Ɛ́nɛ́ duk nɛ́ ta-ɛk-tɛ‘m in fara-hu̧si kɔ‘m wen ɛ́nɛ́ nɛ́ kam-ta kɔ‘m in ŋga fara-hu̧si kɔ‘m mbɛt.

⁴Sɔ̧ kɔ‘m, ɛ̀nɛ̀ gbó‘m er o wi-ɗaŋ yinɛ, ɓɛɛ ɛ̀nɛ̀ kpás'am er o wi-ɔr-wi in o wi-de-ŋgamɔ nɔ'ɔ,

⁵wen mi e ta nɛ̀ ɛ́nɛ́ ɓɛɛ, GASA WAN. Nɛ̀ bem mɛ hɔ nɛnɛ kinii, mi e ta nɛ̀ ɛ́nɛ́,

⁶nɛ̀ tɛ koa-a kɔ‘m mɛ tɛnɛ, mi ɛk tɛ‘m nɛ̀ ɛnɛ; nɛ̀ kɔ̧ zaŋ naa kɔ‘m mɛ tɛnɛ hɔ nɛnɛ kinii, nɛ́ ɛ́nɛ́'ɛ ha̧ ŋgai ha̧‘m, ɓɛɛ mi tɛ bìì gima zɔn nɛ̀ ɛnɛ hegɔ ɓɔnsɛnɛ.

⁷O bíí nɛ̀ ya’ɛ iŋ kɔ-wa mgbara duka-a kɔ‘m n'am duk’ɛ na, ɓɛɛ k’ɛ́nɛ́, ɛ́nɛ́ nɛ́ ŋga fara-hu̧si kɔ‘m nɛ mbetɛ;

⁸mi bíí nɛ gima zɔn nɛ̀ ɛnɛ, mi zɔn nɛ gasamɔ k’ɛ́nɛ́ hegɔ zɛ de nɛnɛ.

⁹K’ɛ́nɛ́ pi̧‘m taŋ tɛ sɔki kɔ‘m na; ŋgimbi nɛ̀ ŋgai tɛ‘m ku̧u̧ naŋ kaɗa-a’ɛ, k’ɛ́nɛ́ e'm duk na

¹⁰wen kinii o wisɛn kɔ‘m ɗaŋ nɛ wen tɛ‘m nɛnɛ; o wi-kii-am gbɛgbɛri kii nɛ‘m e nɛ̀ ɗɔra tɛ‘m mbɛt,

¹¹ɓɛɛ wa tɔ̧ ha̧ o ŋmaa: «Sɔ̧ ea a̧ duk kaɗi, ɛ̀ɛ̀ násí a̧ ŋgaɓo! Ɛ̀ɛ̀ bá a̧, ŋma wi-gbak a̧ bo kɔ‘i na!»

¹²GASA WAN, ɛ̀nɛ̀ tɛ́ɛ̀ dúk katɛ‘m bee! Ɛ̀nɛ̀ gbák am!

¹³Foe a̧ tik zu o wi nɔ‘i nɛ̀ kɔ̧ɔ̧ mɛ gbɛ‘m'i, wa a̧ kum kum lɛŋ! Ziimɔ'ɔ ba o bíí nɛ̀ kɔ̧ɔ̧ mɛ de ɗaŋmɔ in am, búù a̧ ba wa lɛŋ!

¹⁴Ɓɛɛ kɔ‘m, mi e ta nɛ̀ ɛnɛ ɓɔnsɛnɛ, ɓɛɛ ha̧a̧nú kɔ‘m nɛ́ mɔ'ɔ: mi tɛ bìì gima zɔn nɛ̀ ɛnɛ gan kuti-a;

¹⁵mi tɛ we ɗoŋ deemɔ k’ɛ́nɛ́ nɛ yuwar-a, tɛ̀ kpas'am n’ɛnɛ kpasa'i hegɔ zɛ de nɛnɛ.

¹⁶Mi tɛ zɔn ŋgai k’ɛ́nɛ́, GASA WAN, ɓɛɛ mi tɛ we ɗoŋ dee demɔ k’ɛ́nɛ́, wen demɔ nɛ́ k’ɛ́nɛ́ kpɔk ɓɛɛ.

¹⁷Sɔ̧, nɛ́ ɛnɛ'ɛ usa so mɔ ha̧‘m ŋgimbi n'am biti so nɛ̀ bem mɛ, ɓɛɛ hɔ kinii mi we kànà nɛ́ ɗoŋ gasamɔ n’ɛnɛ dea.

¹⁸Kóó nɛ̀ oi sɔki in mbui zu'm'i, Sɔ̧, k’ɛ́nɛ́ e'm duk na; ɛ̀nɛ̀ é ha̧‘m mɛ we ɗoŋ o gasamɔ nɛ̀ er'nɛ́ dea ha̧ o bíí in ŋgai k’ɛ́nɛ́ ha̧ o bezaŋ mɛ ɗoŋ.

¹⁹Deemɔ k’ɛ́nɛ́ nɛ yuwar-a ɔ gasa, Sɔ̧; o mɔ n’ɛnɛ dea nɛ́ o zɔm mɔ; nɛ́ o a̧ tɛ nyɛm ŋmaa in'nɛ̀ɛ́ o?

²⁰Ɛ́nɛ́ dee ha̧‘m mɛ duk nɛ̀ dita-see, in ha̧‘m mɛ zɔk bɔnɛ mbɛt; ɓɛɛ kànà nɛ́ ɛnɛ'ɛ tɛ kpas'am, nɛ́ ɛnɛ'ɛ tɛ dak am gbonɛ kɔ̧ ɗuka kɔ̧-fio zaŋnu’ɛ;

²¹nɛ́ ɛnɛ'ɛ tɛ de ha̧‘m mɛ duk siti, nɛ́ ɛnɛ'ɛ tɛ ga̧ see-am mbɛt.

²²Ɓɛɛ Sɔ̧ kɔ‘m, zu mɔ‘i lɛŋ, mi tɛ mbɛr kunde de nɛ̀ osoko h’ɛ́nɛ́ tɛ yora-ɗoŋ-wen k’ɛ́nɛ́‘i; mi tɛ kuli koloŋ zɔn nɛ̀ ɛnɛ, Sa̧a̧ Wi ko Israɛl.

²³Mi tɛ de nyɛŋɛ ɔli nɛ̀ gima h’ɛ́nɛ́ wen nɛ́ ɛnɛ'ɛ kpasa'm;

²⁴mi tɛ we ɗoŋ deemɔ nɛ yuwar-a k’ɛ́nɛ́ hegɔ zɛ de nɛnɛ, ɓɛɛ foe in ziimɔ a̧ tik zu o bíí lɛŋ nɛ̀ yeŋ nɛ̀ bɔnɛ kɔ‘m!