Read Northwest Gbaya GIMA 72 Bible Online

GIMA 72 - Northwest Gbaya bible

GIMA 72

¹Gima ko Salomɔŋ. Sɔ̧, ɛ̀nɛ̀ é gɔna kita er wannu, ɓɛɛ ɛ̀nɛ̀ há̧ deemɔ nɛ yuwar-a ha̧ bezaŋ-aa,

²wen ha̧ a̧ mɛ gɔn kita zu o dukbíí k’ɛ́nɛ́ nɛ yuwar-a, ha̧ a̧ mɛ kɛ̧ mgbara wen ko o wi-mɔka-see nɛ̀ de-a mbɛt.

³O gasa kaya in o zu-tɔ̧́, ɛ̀nɛ̀ káí ga̧a̧mɔ tɛnɛ ha̧ dukbíí;

⁴a̧ tɛ gɔn kita zu o wisan nɛ yuwar-a, a̧ tɛ kpasi bem ko o wi-kɔsa, ɓɛɛ nɛ̀ ko o wi-de-ŋgamɔ, a̧ tɛ hɔ̧n zu-wa.

⁵A̧ tɛ duk ɗoŋ-aa nyɛi̧ hee mɔ'ɔ nɛ wese in nyaŋa-zɛ duk nɛnɛ pɛ gɔmŋmaa gɔmŋmaa’ɛ ga;

⁶demɔ kɔ̧-a̧ tɛ duk hee kórò nɛ̀ hɔ a zu mbɔɗi zɔ̧ nɛ̀ gbai mbɛlɛlɛ'ɛ ga, hee kórò nɛ̀ ai mbul-mbul a zu nù mɛ ɓɔ kora-nù'ɛ ga.

⁷Deemɔ nɛ yuwar-a tɛ dɔk tɛ ŋgimbi-wan kɔ̧-a̧, ɓɛɛ ga̧a̧mɔ tɛ duk zu o bíí kɔ̧-a̧ hegɔɔ hɔ nɛnɛ tɛ kaɗa-a ko nù;

⁸nù kɔ̧-a̧ nɛ yiŋga-nù mgbara o gba-tɔp yiitoo’ɛ, nú-wan kɔ̧-a̧ nɛ́ nana-yì Efrat hɔ nɛnɛ nduti-nù mɛ.

⁹O boko-nam tɛ hai nɛ mbɔɗɔnu ti naŋ-a, ɓɛɛ o wi-sɛn-a tɛ gbur zaŋ nɛ̀ nù ti a̧;

¹⁰o wan mɛ nú Tarsis in o wan nɛ ɔ see-kisi mɛ tɛ kai ha̧a̧mɔ-gɔm-er kɔ‘i tɛnɛ ha̧ a̧. O wannu Saba in Seba tɛ kai o ha̧a̧mɔ-gɔm-er kɔ‘i tɛnɛ ha̧ a̧ mbɛt;

¹¹o wannu lɛŋ tɛ gu nù ti naŋ-a, ɓɛɛ o tugun bíí tɛ mbo zu ha̧ a̧.

¹²A̧ tɛ kpasi o wi-kɔsa lɛŋ nɛ tɛ ai nú sitɛ a̧ in o wi-kɔsa nɛ̀ wi-gbak-wa bo na mbɛt;

¹³a̧ tɛ de ko ha̧ o ziɓa-wi in o wi-bɔnɛ, ɓɛɛ a̧ tɛ kpasi o ɓɔsa-wi mbɛt.

¹⁴A̧ tɛ kpasi wa er o wi-nasi-wa in o wi-de-ŋgamɔ in wa; a̧ beka e ha̧ tɔk tɛ-wa mɛ fok a nù géè na.

¹⁵Wannu kànà nɛ́ ɛ́nɛ́ ɓɛɛ! Ɓɛɛ wa a̧ ha̧ lɔr nu Saba ha̧ a̧! Wa a̧ wor Sɔ̧ wen-aa ɓɔnsɛnɛ mbɛt, ɓɛɛ wa a̧ tok de yoŋgo ha̧ a̧ zɛ de nɛnɛ hegɔɔ ɓɔnsɛnɛ!

¹⁶Nyɔnɔ a̧ dɛm nɛ́ kpasa dema-a dam fara lɛŋ hɔ nɛnɛ zu kaya mɛ! O be mboŋgo a̧ gasi hee o be mboŋgo nú Libaŋ mɛ ga. O bɔr nyɔnɔ a̧ dɛm hee zɔ̧ ga!

¹⁷Bíí a̧ zɔn nin wannu hegɔɔ ɓɔnsɛnɛ, nin-a a̧ hur ɗɔɔ yiwese’ɛ kpoo nɛ kpoo! O bíí zaŋnu’ɛ lɛŋ tɛ kpa toka-de-yoŋgo nɛ̀ nin-a, o tugun bíí lɛŋ tɛ tu̧ tɛ-a.

¹⁸Ɛ̀nɛ̀ zɔ́n GASA WAN, Sɔ̧ ko Israɛl! Kànà nɛ́ a̧ kpɔk ɓɛɛ a̧ dee o gasa mɔɔ nɔ'ɔ lɛŋ.

¹⁹Ɛ̀nɛ̀ zɔ́n de nin-a hegɔɔ kpoo nɛ kpoo! Gasamɔ kɔ̧-a̧ a̧ dun zaŋnu’ɛ lɛŋ! Aamɛn! Aamɛn!

²⁰Nduti kɔfa-sɔ̧ ko David, bem ko Jɛse nɛ mɔ‘i.