Read Northwest Gbaya GIMA 73 Bible Online

GIMA 73 - Northwest Gbaya bible

GIMA 73

¹Gima ko Asaf. Kpasawen, Sɔ̧ nɛ́ wi-de-demɔ ha̧ o be Israɛl! GASA WAN nɛ́ wi-de-demɔ ha̧ o wi-sa̧a̧-see.

²Oi-aa ɓɔna ŋgɛlɛk ɓɛɛ naŋ-am tɛ̀ɛ́ mbali ŋmaa; ŋma mɔ de'm na, mi tira nɛ́ yɔɔ-mɔ sɔɔ géè

³wen mi dee so wɔ-mɔ ko o wi-ŋmaŋ-tɛ ŋgimbi n'am zɔka so nɛ̀ de duka-a ko o wi-ɗaŋ nɔ‘i.

⁴Yaa-a kɔ-wa nɛ̀ wa ya'i, mɔ ba tɛ-wa na hɔ nɛnɛ ŋgimbi fio kɔ-wa. Wa ya nɛ̀ haya-tɛ nɛ̀ de-a nɛ̀ ŋmaŋa-a sɛn-sɛn nɛnɛ.

⁵Wa zɔk bɔnɛ hee o ŋma bíí ga na; mɔ ba tɛ-wa hee oi o dɔka bíí ga na mbɛt.

⁶Wen hegɔ, gasa-zu kɔ-wa duk hee kísí-pi̧-ger-wa ga; dee ŋgamɔ kɔ-wa duk hee laa-pi̧-tɛ ga.

⁷Sɛnmɔ gbo nɛ̀ sɔnti-wa gboloŋ hee nɔ̧́ ga; taamɔ kɔ-wa lɛŋ nɛ́ ruŋgu.

⁸Wa zɛkɛɗi nɛ o bíí sukuɗi nɛ̀ wen ha̧ wa nɛnɛ; wa ŋmaŋ nɛ tɛ-wa zɔn nɛ̀ ŋgamɔ nɛ̀ wa de.

⁹Kɔ-wa kànà nɛ́ tɔ̧ɔ̧ kpoko-wen si yiwese ha̧ nɛ o zɔm heembea nɔ‘i kɔ-wa'i ha̧ o bíí zu nù.

¹⁰Nɛ́ mɔɔ nɔ‘i a̧ de ha̧ o bíí kɔ‘m mɛ gbin yak sitɛ wa wen wen kɔ-wa baa zer-wa,

¹¹wen wa ta kɔ-wa hee ge ndé: «Sɔ̧ tɛ de héé ge iŋ nɛ̀ ndaa mɔ k’ɛɛ ge? GASA WAN nɛ̀ duk ŋgɔn mɛ iŋa so mɔ lɛŋ?»

¹²O wi-ɗaŋ nɔ'ɔ ɓɔn! O wanmbɔi nɔ'ɔ nɛ̀ mɔ ɓan wa na’ɛ! Zɔ́k wa wo!

¹³Mi pɔkɔsi bɔɔ kɔ‘m tɛ‘m tɛ duka-a nɛ̀ sa̧a̧-see dor nɛ̀ tɛ‘m tɛ dee ɗaŋmɔ wen ge?

¹⁴Yí-mɔ n'am kpa oi-aa kànà nɛ́ gus'am n’ɛnɛ gusi nɛ̀ tuyɛ hegɔ zɛ de nɛnɛ‘i ɓɛɛ. Nɛ̀ tuyɛ lɛŋ k’ɛ́nɛ́ kànà nɛ́ usa bɔnɛ ha̧‘m.

¹⁵Kà bó só ha̧‘m mɛ tɔ̧ wen hee mɔ'ɔ nɛ wa tɔ̧ nɛnɛ‘i ga, mi tɛ̀ɛ́ e so ɗɔra tɛ o bem k’ɛ́nɛ́.

¹⁶Mi taa mɔ tɛ mɔ‘i hegɔɔ ha̧‘m mɛ iŋ mgbara-a wó, ɓɛɛ mɔ-aa ŋgaia gan am.

¹⁷Ɓɛɛ nɛ́ ŋgimbi n'am yee nɛnɛ kɔ sa̧a̧-fara ko Sɔ̧ mɛ‘i a̧‘m kpaa nɛ̀ ndaa mɔ ko o wi nɔ‘i.

¹⁸Kpasawen, ɛ́nɛ́ ee wa mgbák zuma kaya mɛ kaɗi, ɛ̀nɛ̀ sɔ́mgbí wa si ɗaŋ fara mɛ!

¹⁹Ɓɛɛ hee gɔma-yí ga, wa tɛ kifi duk nɛ mɔɔ-gɔn-ɗɛɗɛ-wi; bele tɛ gbɛ wa, ɓɛɛ wa tɛ yɔ lɛŋ.

²⁰Ŋgimbi tuna-a k’ɛ́nɛ́, tɛ‘nɛ́ tɛ bi ɗoŋ wa hee mɔ'ɔ nɛ tɛ-wi bi nɛ ɗoŋ géé tum zu nɛ̀‘i ɔ'ɛ ga.

²¹Ŋgimbi nɛ̀ see-am duka nɛnɛ zɛkɛkɛ‘i, a̧ ŋma mɔ toka nɛ̀ gbaaza'm sar;

²²mi duka so nɛ́ ŋma mgbelewi nɛ̀ iŋ mɔ na hee ŋma saɗi ga ti'nɛ́,

²³ɓɛɛ mi ɓɔn kànà ti'nɛ́‘i, ɓɛɛ nɛ́ mɔ'ɔ n’ɛnɛ baa'm e ŋgɔn;

²⁴ɛ́nɛ́ tɛ mgbɔ‘m nɛnɛ tɔ̧ nɛ̀ mbɔrɔ ha̧‘m, ɓɛɛ sɔŋkur-aa, ɛ́nɛ́ tɛ ba'm e tɛ gasamɔ.

²⁵Ŋma bíí kɔ‘m sɛn yiwese nɛ̀ yaka zu'nɛ́ bo na, ɓɛɛ kà‘m duk katɛ‘nɛ́ kaɗi, wɔ mɔɔ-nù gbɛ‘m ɓɔna;

²⁶see-am baa'nɛ́ nyɛmna wen ɛ́nɛ́ nɛ́ kam-ta kɔ‘m, ɛ́nɛ́ nɛ́ Sɔ̧ kɔ‘m ɓɔnsɛnɛ.

²⁷Wi nɛ̀ tɛ dak zu tɛ‘nɛ́ tɛ yɔ; ɛ́nɛ́ tɛ kum o bíí lɛŋ nɛ̀ e'nɛ́ duk,

²⁸ɓɛɛ kɔ‘m, mgbák mɔ nɛ̀ see-am hoka nɛ́ duka-a katɛ Sɔ̧. GASA WAN, mi hu̧sa̧ tɛ‘nɛ́ ha̧‘m mɛ we ɗoŋ o tom k’ɛ́nɛ́ lɛŋ.