Read Northwest Gbaya GIMA 77 Bible Online

GIMA 77 - Northwest Gbaya bible

GIMA 77

¹Gima ko Asaf ha̧ wan-duk-zu-gima Yedutun.

²Mi ai nú sa nɛ̀ sara sitɛ Sɔ̧; kà‘m sa mɔ ai nɛ̀ nú ɓɛɛ a̧ zia tiger-am.

³Mi kia GASA WAN wese nɛ̀ mɔ baa so nɛ tɛ‘m, mi nyɛi̧a er-am sitɛ a̧ nɛ̀ zɛ hegɔ mɔ sa̧ nɛnɛ, mi mbɔi na. Kóó hegɔ mbɛt, see-am kɔ̧ mɛ ga̧ na.

⁴Tɛ‘m mbaŋa ɗoŋ Sɔ̧ ɓɛɛ mi gɔfi mɔ; mi taa mɔ mbɛt ɓɛɛ see-am gɔn.

⁵Sɔ̧, ɛ́nɛ́ dee ha̧ saŋa-seŋge mɛ ba'm, see-am dita nyɛmna ɓɛɛ wen bu̧i̧ nú‘m yak.

⁶Mi taa mɔ zu ŋgimbi nɛ̀ yaka, tɛ‘m mbaŋa ɗoŋ o gba̧‘a̧ pɛ nɛ̀ yaka so ɓeemɛ mbɛt.

⁷Mi ku̧i̧a mɔ nɛ̀ kɔ̧ see-am ta nɛ̀ mɔ hegɔɔ mɔ sa̧ nɛnɛ; mi kia mɔ ɓɛɛ mi ak tɛ‘m nɛ̀ tɛ‘m ndé:

⁸GASA WAN pi̧a'm pi̧i̧ taŋ wɔsɔsɔ kaɗi nde? A̧ beka de demɔ ha̧‘m ɓɔna?

⁹Kɔ̧ɔ̧mɔ kɔ̧-a̧ kaɗa zu'm ɓɔn ndó-ndó-ndó nde? Ha̧a̧nú kɔ̧-a̧ kaɗa zu'm hɔ tɛ o bezaŋ-am mɛ lɛŋ nde?

¹⁰Tɛ́ Sɔ̧ mbaŋ ɗoŋ dee ko kɔ‘i ɓɔna? Kóó nɛ́ nyimsea a̧ ŋgaia see-aa yak zale hegɔ‘i nde?

¹¹Ɓɛɛ sa'm tɔ̧: «Mgbák yí-mɔ nɛ ba tɛ‘m’ɛ nɛ́ mɔ'ɔ: er-deemɔ nɛ̀ Dáà wan nɛ̀ duk ŋgɔn mɛ de so in am'i kpaia».

¹²Ɓɛɛ tɛ‘m mbaŋ ɗoŋ gasamɔ nɛ̀ GASA WAN dee so, tɛ‘m mbaŋa ɗoŋ o mɔɔ-kifi n'aa dee so nɛti ɓeemɛ,

¹³ɓɛɛ mi we ɗoŋ tom kɔ̧-a̧ lɛŋ sɛn kɔ̧ see-am, ɓɛɛ mi ta mɔ zu o gasa mɔɔ nɔ‘i n'aa dee so'i.

¹⁴GASA WAN Sɔ̧, yuwar k’ɛ́nɛ́ duk nɛ̀ sa̧a̧-a̧ nyɛmna, ŋma sɔ̧ nɛ nyɛma ŋmaa in'nɛ̀ɛ́ so bɔɔ sɛnɛ?

¹⁵Ɓaa Sɔ̧ kànà nɛ́ ɛ́nɛ́ kpɔk ɓɛɛ, wan-de-gasamɔ lɛŋ. Ɛ́nɛ́ dee mɔɔ-gɔn-ɗɛɗɛ mgbara o dukbíí;

¹⁶ɛ́nɛ́ gɔna zu dukbíí k’ɛ́nɛ́, o bezaŋ Jakob in Jozɛf, nɛ̀ ŋga er'nɛ́.

¹⁷Géé zɔka'nɛ́ nɛ̀ nana-yì zɔka, soɓee, a̧ zika tɛ si zu pata-a tɔmiyɔ̧ɔ̧, ɗuka dir gba-tɔp ŋmai̧a buka̧i̧;

¹⁸o bu-zan nɛ́ yeli a nù, aŋgasa nɛ́ pi̧ ger nù, o góò k’ɛ́nɛ́ nɛ́ gɔm pamyala;

¹⁹gba-ìì k’ɛ́nɛ́ nɛ́ mgbimgbi, kórò nɛ́ pi̧ yí gɔm ti-zan lɛŋ, ɓɛɛ nù nak ɗirr.

²⁰Yuwar k’ɛ́nɛ́ ɓira yak nɛ̀ see gba-tɔp, gba-war k’ɛ́nɛ́ yaka nɛ̀ zu o nana-yì nɛ̀ ŋma bíí beka iŋ oi pata naŋ‘nɛ́ na.

²¹Ɛ́nɛ́ daia dukbíí k’ɛ́nɛ́ nɛ̀ er Moisɛ in Arɔŋ hee gíí sami ga.