Read Northwest Gbaya GIMA 81 Bible Online

GIMA 81 - Northwest Gbaya bible

GIMA 81

¹Gima ko Asaf ha̧ wan-duk-zu-gima. Ger gima’ɛ nɛɛ nɛ́ ɗoŋ tiger gima ko Gat.

²Ɛ̀nɛ̀ gáí gima nɛ̀ desee ha̧ Sɔ̧, wi-ha̧-ŋgai h’ɛ́ɛ́'ɛ! Ɛ̀nɛ̀ súmbúrí Sɔ̧ ko Jakob!

³Ɛ̀nɛ̀ díkíɗí bi̧ɔ̧! Yɔyɛ a̧ bá dik! Er'nɛ́'ɛ wii zu kunde in koloŋ!

⁴Ɛ̀nɛ̀ dɔ́m mbia gbaŋa Mbe yí-zɛ! Ɛ̀nɛ̀ dɔ́m mbia tɛ toka mgbal-mgbal nyaŋa-zɛ gbaŋa k’ɛɛ'ɛ!

⁵Mɔ'ɔ nɛ́ heembea sɛn mgbara o be Israɛl, ɓɛɛ nɛ́ tɔ̧ɔ̧-wen ko Sɔ̧ ko Jakob mbɛt

⁶nɛ̀ duk nɛ́ geŋa n'aa gɔna so ha̧ Jozɛf ŋgimbi n'aa gboo so mɛ́ bi o bíí Egiptɛ. Mi zia ŋma gɔni-nú n'am tɛ zii so nɛti na, ɓɛɛ gba̧a̧ wen-aa nɛ́ mɔ'ɔ:

⁷Mi baa dita tui zu kóŋgó-ɓaa-mɛ yinɛ, mɛ gboo ɗɔɔ bara kaɗi.

⁸Mɛ saa'm ŋgimbi bɔnɛ nɛ tika zu mɛ, ɓɛɛ mi kpasi mɛ. Mi duka ɗɔɔ tum-kórò kifi nɛ̀ nú ha̧ mɛ, mi wee mɛ nú yí Mɛriba.

⁹Israɛl, mɛ̀ zíí wen n'am mbaŋ tɛ-mɛ sɛnɛ‘i, mɛ́ nɛ́ dukbíí kɔ‘m! Mɛ̀ zíí wen nú‘m!

¹⁰Ká mɛ́ ba ŋma géé-sɔ̧ tɛnɛ e mgbara mɛ na. Ká mɛ́ ɗafi ŋma gɔni sɔ̧ na mbɛt!

¹¹Mi nɛ GASA WAN Sɔ̧ kɔ-mɛ; nɛ̀ baa mɛ gbonɛ nɛ̀ nú Egiptɛ mɛ. Mɛ̀ ɓá nú-mɛ nɛ̀ pɛsa-a ha̧‘m a mɔ sɛnɛ dun.

¹²Ɓɛɛ dukbíí kɔ‘m zii wen nú‘m na, kóó ŋma be Israɛl kpɔk mbo zu ha̧‘m na;

¹³ɓɛɛ sa'm e wa tɛ dee mɔɔ-ŋga-see kɔ-wa'i nɛnɛ. Wa ndak nɛ́ ɗoŋ ɗaŋ ee-zu-mɔ kɔ-wa.

¹⁴Dukbíí kɔ‘m a̧ bo so nɛ́ wi-zii-wen nú‘m, ha̧ o be Israɛl mɛ ba so nɛ́ yuwar kɔ‘m gáà,

¹⁵mi tɛ̀ɛ́ gbɛ so o wisɛn kɔ-wa a nù hee geemɔ ga, ɓɛɛ mi tɛ̀ɛ́ kifi er ha̧ o wi-nasi-wa mbɛt.

¹⁶Ɓɛɛ o wi-sɛn-am tɛ̀ɛ́ de ko nɛ̀ tɛ̀ pii ká̧ naŋ-am, bó nɛ́ bɔnɛ kɔ-wa tɛ̀ɛ́ kaɗi so kaɗi na kpoo nɛ kpoo.

¹⁷Ɓɛɛ ko o be Israɛl, mi tɛ ha̧ nɛ́ de kam-gɔrɔ in nɔ̧́-gɔrɔ yaa-bu-sap ha̧ wa mɛ nyɔŋ zaŋ-wa sur.