Read Northwest Gbaya GIMA 84 Bible Online

GIMA 84 - Northwest Gbaya bible

GIMA 84

¹Gima ko o bem ko Kore ha̧ wan-duk-zu-gima. Ger gima’ɛ nɛɛ nɛ́ ɗoŋ tiger gima ko Gat.

²GASA WAN, Sɔ̧ ko gíí wi-biro, fara-duk k’ɛ́nɛ́ dee tɛ‘m nyɛmna.

³GASA WAN, mi de wɔ‘nɛ́ nyɛmna wen mi kɔ̧ɔ̧ mɛ duk bee-gara k’ɛ́nɛ́; see-am in kiitɛ‘m sa nɛ sara nɛ̀ tortɛ sitɛ kpasa Sɔ̧.

⁴Kóó nɛ́ soŋdɔya nɛ̀ bó nɛ́ kpasamɔ na a̧a̧ nɛ̀ tua-ɔɔ kɔ‘i, gbiiwara in o be-a mbɛt a̧a̧ nɛ̀ fara-ɔ kɔ‘i; wa de tua nɔ‘i ká̧ fara-ɗafi'nɛ. GASA WAN ko gíí wi-biro, ɛ́nɛ́ nɛ́ wannu kɔ‘m in Sɔ̧ kɔ‘m mbɛt.

⁵O wi-ɔ-kɔ̧ tua k’ɛ́nɛ́ ya kɔ‘i nɛ̀ desee, wa zɔn nɛ ɛnɛ kpoo nɛ kpoo;

⁶o wi nɛ̀ kpa ŋgai tɛ‘nɛ́ ya kɔ‘i nɛ̀ desee tɛ̀ éé see-wa tɛ daŋa-a si Siɔŋ mɛ.

⁷Wa gboa nɛ̀ war ɗɔŋgɔ-yì nɛ̀ kora kútú-kútú,[21] ɓɛɛ yì kok sɛn oi naŋ-wa luŋgum; kuti kórò dee ha̧ mɔ mɛ ɓɔ fara'i.

⁸Ŋgai kɔ-wa tɛ dɔk dɔk siti siti hɔ nɛnɛ ti Sɔ̧ sɛn Siɔŋ mɛ.

⁹GASA WAN, Sɔ̧ ko gíí wi-biro, ɛ̀nɛ̀ zíí wora'nɛ́ n'am wor’ɛ, ɛ̀nɛ̀ yéŋ zer'nɛ́, Sɔ̧ ko Jakob.

¹⁰GASA WAN, ɛ́nɛ́ nɛ́ ŋgee k’ɛɛ, ɛ̀nɛ̀ zɔ́k mɔ pii tɛ yɛ, ɛ̀nɛ̀ dé ko ha̧ wi nɛ̀ wa tɛna nɔ̧́ a zu-a.

¹¹Duka-a fara k’ɛ́nɛ́ zɛ kpɔk gana duka-a ŋma géé fara zɛ booro, ɓɛɛ kɔ‘m, mi hoka nɛ́ duka-a nú zala-tua k’ɛ́nɛ́ gan duka-a kɔ̧ tua ko wi-ɗaŋ;

¹²wen GASA WAN nɛ́ ŋga fara-duk kɔ‘m in ŋgee kɔ‘m. A̧ usi nɛ kɔ̧ɔ̧mɔ in gasamɔ kɔ̧-a̧ h’ɛ́ɛ́. GASA WAN bɛ̧ ha̧a̧ mɔ ha̧ o wi-de-mɔ nɛ yuwar-a na.

¹³GASA WAN, Sɔ̧ ko gíí wi-biro, wi-e-ta nɛ ɛnɛ duk kɔ‘i nɛ̀ desee.