Read Northwest Gbaya GIMA 85 Bible Online

GIMA 85 - Northwest Gbaya bible

GIMA 85

¹Gima ko o bem ko Kore ha̧ wan-duk-zu-gima.

²GASA WAN, ɛ́nɛ́ dee demɔ ha̧ nù'ɛ; ɛ́nɛ́ dee ha̧ o bem ko Jakob nɛ̀ wa kaia so nɛ̀ bara-biro mɛ pii ɗoŋ;

³ɛ́nɛ́ bìì o yɔɔ-kaya ko dukbíí k’ɛ́nɛ́ yinɛ, ɓɛɛ ɛ́nɛ́ kpe zu ɗaŋmɔ kɔ-wa lɛŋ.

⁴Ɛ́nɛ́ dee ha̧ ŋga nyimsea k’ɛ́nɛ́ mɛ ga̧, ɓɛɛ see'nɛ́ ga̧ zu yɛ.

⁵Ɛ̀nɛ̀ mgbɔ́ ɛɛ pii ɗoŋ, Sɔ̧ wan-kpasi-ɛɛ, ɛ̀nɛ̀ dé ha̧ see'nɛ́ mɛ ga̧ zu yɛ.

⁶Nyimsea k’ɛ́nɛ́ tɛ ɓɔn kànà zu yɛ siti hegɔ ɓɔnsɛnɛ nde? Nyimsea k’ɛ́nɛ́ tɛ duk zu yɛ kpoo nɛ kpoo nde?

⁷Bó nɛ́ ɛnɛ'ɛ tɛ pii ɗoŋ mɛ ha̧ ŋgai h’ɛ́ɛ́ ha̧ dukbíí k’ɛ́nɛ́ mɛ de tortɛ ti'nɛ́ na nde?

⁸GASA WAN, ɛ̀nɛ̀ úsí kɔ̧ɔ̧mɔ k’ɛ́nɛ́ h’ɛ́ɛ́, ɓɛɛ ɛ̀nɛ̀ kpásí yɛ!

⁹Ha̧‘m zii a'i! Nɛ́ ge wen ge a̧ GASA WAN tɔ̧‘i ge? A̧ tɔ̧ nɛ wen ga̧a̧mɔ wen dukbíí kɔ̧-a̧ in o sɛm kɔ̧-a̧. Mɔ kpɔk, ká wa si ɗoŋ tɛ dee mɔɔ-mgbele kɔ-wa so'i ɓɔna!

¹⁰A̧ duk dɔ̧ɔ̧ mɛ kpasi o wi nɛ̀ yu kíí a̧, ɓɛɛ gasamɔ kɔ̧-a̧ tɛ duk zu nù k’ɛɛ'ɛ;

¹¹mboozu in kpasawen tɛ kpa ŋmaa, ga̧a̧mɔ in deemɔ nɛ yuwar-a tɛ ye ŋmaa;

¹²kpasawen tɛ gbo nɛ̀ tɛ́ nù, ɓɛɛ deemɔ nɛ yuwar-a tɛ zir kɔ‘i nɛ̀ yiwese mɛ tɛnɛ.

¹³Nɛ́ GASA WAN nɛ̀ tɛ-a a̧ ha̧ demɔ, ɓɛɛ nù k’ɛɛ dɛm kɔ‘i nɛ́ nyɔnɔ.

¹⁴Deemɔ nɛ̀ yuwar-a tɛ yak ti ha̧ a̧, ɓɛɛ ga̧a̧mɔ tɛ ɓa kɔ‘i nɛ́ oi pata naŋ-a nɛnɛ.