Read Northwest Gbaya GIMA 86 Bible Online

GIMA 86 - Northwest Gbaya bible

GIMA 86

¹Kɔfa-sɔ̧ ko David. GASA WAN, ɛ̀nɛ̀ yéŋ zer'nɛ́ pii tɛ‘m; ɛ̀nɛ̀ kífí nú ha̧‘m wen mi nɛ́ wi-kɔsa in wisan.

²Ɛ̀nɛ̀ pɛ́m am wen mi nɛ́ sɛm k’ɛ́nɛ́; ɛ̀nɛ̀ kpásí wi-de-tom k’ɛ́nɛ́ nɛ̀ e ta nɛ̀ ɛnɛ.

³Ɛ́nɛ́ nɛ́ Sɔ̧ kɔ‘m, ɛ̀nɛ̀ dé ko ha̧‘m, GASA WAN. Nɛ́ ɛ́nɛ́ a̧‘m sa zɛ nɛ̀ wese.

⁴Mi gɔm er h’ɛ́nɛ́, GASA WAN, ɛ̀nɛ̀ dé ha̧ wi-de-tom k’ɛ́nɛ́ mɛ duk nɛ̀ desee.

⁵GASA WAN, ɛ́nɛ́ nɛ̀ wan-e-ɗaŋmɔ in wan-de-demɔ ha̧ bíí; dee demɔ k’ɛ́nɛ́ ha̧ o wi nɛ̀ sa'nɛ́ ɔ gasa.

⁶GASA WAN, ɛ̀nɛ̀ zíí kɔfamɔ kɔ‘m, ɓɛɛ ɛ̀nɛ̀ yéŋ zer'nɛ́ tɛ aia-nú kɔ‘m mbɛt.

⁷Ŋgimbi nɛ̀ mɔ ba tɛ‘m, ɓɛɛ mi saa mɔ sitɛ‘nɛ́, wen nɛ́ ɛnɛ'ɛ kifi nú ha̧‘m, GASA WAN.

⁸Mgbara o sɔ̧ lɛŋ, ŋma sɔ̧ nɛ̀ nyɛma ŋmaa in'nɛ̀ɛ́ bo na; ŋma deemɔ nɛ̀ hɔɔ ŋmaa in tom n’ɛnɛ dea bo na.

⁹Tugun bíí n’ɛnɛ dea lɛŋ tɛ tu̧ tɛ‘nɛ́, GASA WAN, wa tɛ tɛ mɛ zɔn nin'nɛ́

¹⁰wen ɛnɛ ɔ gasa. Kànà nɛ́ ɛ́nɛ́ kpɔk ɓɛɛ a̧ de gasamɔ.

¹¹GASA WAN, ɛ̀nɛ̀ úsí yuwar k’ɛ́nɛ́ ha̧‘m wen ha̧‘m mɛ de mɔ n’ɛnɛ kɔ̧a̧. Ɛ̀nɛ̀ dé ha̧ see-am mɛ mboɗi duk tɛ‘nɛ́.

¹²Mi de osoko h’ɛ́nɛ́ nɛ̀ see-am lɛŋ, GASA WAN Sɔ̧ kɔ‘m, mi tɛ zɔn nin'nɛ́ wese ɓɔnsɛnɛ

¹³wen ɛ́nɛ́ kɔ̧a̧‘m nyɛmna; Ɛ́nɛ́ daka'm gbonɛ nɛ̀ ɗuka fara ko fio.

¹⁴Ɓɛɛ kinii Sɔ̧, o wi-ŋmaŋ-tɛ kura zu'm; o wi-kii-wen nɛ̀ kɔ̧ɔ̧ mɛ gbɛ‘m yinɛ‘i e'nɛ́ hee geemɔ ga.

¹⁵GASA WAN Sɔ̧, kɔ̧ɔ̧mɔ in deako nɛ́ k’ɛ́nɛ́; see'nɛ́ kur zu bíí nɛ haya-a na wen kɔ̧ɔ̧mɔ in kpasawen k’ɛ́nɛ́ ɔ gasa.

¹⁶Ɛ̀nɛ̀ zík tɛ‘nɛ́ pii tɛ‘m, ɛ̀nɛ̀ dé ko ha̧‘m, ɛ̀nɛ̀ há̧ ŋgai ha̧ wi-de-tom k’ɛ́nɛ́, ɛ̀nɛ̀ kpásí bem ko kó-de-tom k’ɛ́nɛ́.

¹⁷Ɛ̀nɛ̀ úsí ŋma nú kɔ̧ɔ̧mɔ k’ɛ́nɛ́ tɛ‘m wen ha̧ o wi-sɛn-am mɛ zɔk ɓɛɛ ha̧ foe mɛ ba wa, wen nɛ́ ɛnɛ, GASA WAN, a̧ gbak am, nɛ́ ɛnɛ'ɛ ga̧ see-am.