Read Northwest Gbaya GIMA 9 Bible Online

GIMA 9 - Northwest Gbaya bible

GIMA 9

¹Gima ko David ha̧ wan-duk-zu-gima; gima nɛ̀ mɔɔ-dɔm in kunde.

²Mi tɛ de osoko h’ɛ́nɛ́ nɛ̀ see-am lɛŋ, GASA WAN, mi tɛ zɔn o demɔ k’ɛ́nɛ́ lɛŋ.

³Mi de nɛ nyɛŋɛ wen desee kɔ‘m duk tɛ‘nɛ́; mi bíí nɛ gima zɔn nɛ̀ nin'nɛ́, Sɔ̧ nɛ̀ duk ŋgɔn mɛ.

⁴O wisɛn kɔ‘m yu nɛ mɔ yak; wa tira yɔɔ-mɔ ɓɛɛ wa fe ti'nɛ́‘i.

⁵Ɛnɛ duka so zu damti-ɓa-wen k’ɛ́nɛ́ kɛ̧ nɛ̀ mgbara wen kɔ‘m nɛ yuwar-a wen gɔna-kita k’ɛ́nɛ́ duk nɛ yuwar-a.

⁶Sɔ̧, ɛ́nɛ́ nasa o wi nɛ iŋ‘nɛ na, ɛ́nɛ́ kuma o wi-de-ŋgazu, ɛ́nɛ́ bìì nin-wa yinɛ kpoo nɛ kpoo.

⁷Ŋgai ko o wisɛn kaɗa kaɗi, mɔ kɔ-wa ɗaŋa nɛ oi; ɛnɛ ɗaŋa o gasa ye kɔ-wa nɛ̀ tɛ-wi beka mbaŋ ɗoŋ o ye nɔ‘i ɓɔna.

⁸GASA WAN tɛ duk zu damti kɔ‘i ɓɔnsɛnɛ; a̧ ɗafa damti wen gɔna kita kaɗi.

⁹A̧ tɛ ɓa wen zu nù'ɛ tɛ deemɔ nɛ yuwar-a kɔ̧-a̧; a̧ tɛ gɔn kita zu o dukbíí nɛ yuwar-a.

¹⁰GASA WAN a̧ duk nɛ́ fara-hu̧si-tɛ ko o wi-bɔnɛ; a̧ a̧ duk nɛ́ de ŋga fara-hu̧si-tɛ kɔ-wa tɛ ŋgimbi-bɔnɛ.

¹¹O wi-iŋ-nin'nɛ́ a̧ e ta nɛ̀ ɛnɛ, GASA WAN; wen k’ɛ́nɛ́, bó nɛ́ ɛ́nɛ́ e o wi-kii'nɛ́ ee duk na.

¹²Ɛ̀nɛ̀ bíí gima zɔn nɛ GASA WAN nɛ duk kɔ‘i zu Kaya Siɔŋ mɛ‘i; ɛ̀nɛ̀ wé ɗoŋ o gasamɔ kɔ̧-a̧ ha̧ o dukbíí.

¹³A̧ e ha̧ tɔk-tɛ bíí mɛ a nù sɔɔ géè na; tɛ-a bi ɗoŋ aia-nú ko o wi-kɔsa na mbɛt.

¹⁴GASA WAN, ɛ̀nɛ̀ dé ko ha̧‘m, ɛ̀nɛ̀ zɔ́k bɔnɛ kɔ‘m. Ɛ́nɛ́ baa'm nú fio yinɛ

¹⁵ha̧‘m mɛ zɔn gasamɔ k’ɛ́nɛ́ sɛn nú tua ko boko be Siɔŋ; mi duk nɛ̀ desee wen n’ɛnɛ kpasa'm.

¹⁶O wi nɛ̀ iŋ Sɔ̧ na aia a kɔ̧ lim nɛ̀ wa gɔna nɛ̀ tɛ-wa; wa baa pɛ́r kɔ-wa nɛ̀ wa tuia nɛ̀ er-wa.

¹⁷GASA WAN dee ha̧ o bíí mɛ iŋ a̧ tɛ gɔna kita kɔ̧-a̧; wi-ŋgazu dee tom kɔ‘i, ɓɛɛ nɛ mɔ'ɔ nɛ GASA WAN dee ha̧ tom'i mɛ hɛr a̧ woyo.

¹⁸O wi-ŋgazu, o wi nɔ‘i lɛŋ nɛ̀ tɛ-wa bìí ɗoŋ Sɔ̧'ɛ, wa a̧ si ɗoŋ si ye ko o fio;

¹⁹wen tɛ-wi beka bi ɗoŋ o wisan na ɓɔnsɛnɛ, ee-ta ko o wi-kɔsa nɛ̀ Sɔ̧ beka ɓɔn sɔɔ géè na mbɛt.

²⁰GASA WAN, ɛ̀nɛ̀ mísí̧ in wa ɓɛɛ ká ŋma bíí gan zu'nɛ́ na! Ɛ̀nɛ̀ gɔ́n kita zu o wi-iŋ‘nɛ́ na.

²¹GASA WAN, ɛ̀nɛ̀ pí̧ gasa kíì tɛ o wi-iŋ‘nɛ́ na, ɛ̀nɛ̀ úsí ha̧ wa ndé, wa nɛ́ géé bíí sɔɔ géè.