Read Northwest Gbaya GIMA 90 Bible Online

GIMA 90 - Northwest Gbaya bible

GIMA 90

¹Kɔfa-sɔ̧ ko Moisɛ, bíí ko Sɔ̧. GASA WAN, ɛ́nɛ́ duka so nɛ́ ŋga fara-hu̧si k’ɛɛ pɛ nɛ pɛ.

²Nɛti h’ɛ́nɛ́ mɛ de o kaya in nù'ɛ in mɔ lɛŋ nɛ ya zaŋ-aa, ɛ́nɛ́ so kànà nɛ́ Sɔ̧ nɛ̀ duk ɓɔnsɛnɛ nɛ̀ ku̧u̧naŋ-a mɛ tɛnɛ.

³Ɓɛɛ k’ɛ̀nɛ̀ tɔ̧́‘e ndé, o bezaŋ Adam a̧ pii ɗoŋ wó, ɓɛɛ mbulɛɛ, wa kifa fuunu;

⁴ɛ́nɛ́ zɔk k’ɛ́nɛ́ pɛ booro sɛn yí‘nɛ́ hee ɔɔ-zɛ kpɔk ga. Pɛ booro yak kɔ‘i yí Sɔ̧ ɓɛlɛm hee zɛ mɛ mboyɛɛ nɛ̀ yaka’ɛ ga.

⁵Bíí sɛ̀n yí‘nɛ́ nɛ́ geemɔ; wa hɔɔ ŋmaa in zɔ̧ nɛ̀ hɔ'ɛ:

⁶mɛ tutuyɛ wa ɓɔa, wa doa, ɓɛɛ mɛ ga̧a̧mɔ wa ɔ̧ka̧ ai a nù.

⁷Nyimsea k’ɛ́nɛ́ dɔɔ yɛ hee wee ga; ŋga nyimsea k’ɛ́nɛ́ pi̧i̧ kíì tɛ yɛ

⁸wen ɛ́nɛ́ ee yɔɔ-kaya k’ɛɛ ti'nɛ́. Hu̧sa̧mɔ k’ɛɛ duka ɓɔn yí‘nɛ́.

⁹Nyimsea k’ɛ́nɛ́ nɔma ŋgimbi k’ɛɛ de dɔ̧-a̧ lɛŋ, ɓɛɛ pɛ duka-a k’ɛɛ yak nɛ haya-a hee gɔma-yí ga.

¹⁰Pɛ duka-a ko bíí de nɛ pɛ ɓu-mɔɔrɔ-ɗoŋ-yiitoo, o wi nɛ̀ a̧a̧ nɛ̀ ŋgai nyɛma duk hɔ tɛ pɛ ɓu-mɔɔrɔ-ɗoŋ-taar mbɛt. Duka-a ko bíí kànà nɛ́ bɔnɛ in san; ɓan na pɛ nɔ‘i yaka, ɓɛɛ ɛɛ bo ɓɔna.

¹¹Nɛ́ o'o iŋa ŋga nyimsea k’ɛ́nɛ́ o? Nɛ́ o'o iŋa bele nɛ tuɓa da̧ k’ɛ́nɛ́ pi̧ tɛ-wi o?

¹²Ɛ́nɛ́ dee h’ɛ́ɛ́ mɛ iŋ ndé, wese duka-a k’ɛɛ dɔk na h’ɛ́ɛ́ mɛ kpa iŋa-mgbara-mɔ kɔ̧ see yɛ.

¹³Ɛ̀nɛ̀ píí ɗoŋ GASA WAN; ge n’ɛnɛ ɓɔn hegɔɔ ge? Ɛ̀nɛ̀ dé ko ha̧ wi-de-tom k’ɛ́nɛ́.

¹⁴Ɛ̀nɛ̀ dún yɛ nɛ̀ kɔ̧ɔ̧mɔ k’ɛ́nɛ́ tɛ kura-a k’ɛɛ mɛ tuyɛ wese kpɔk kpɔk h’ɛ́ɛ́ mɛ ya nɛ̀ tortɛ bíí nɛ̀ gima wese ɓɔnsɛnɛ.

¹⁵Ɛ̀nɛ̀ há̧ ŋgimbi desee h’ɛ́ɛ́ nyɛm nɛ ɗoŋ ŋgimbi dita-see bɔnɛ n’ɛnɛ usa so h’ɛ́ɛ́ nɛti.

¹⁶Ɛ̀nɛ̀ úsí ŋgai k’ɛ́nɛ́ tɛ o wi-de-tom k’ɛ́nɛ́ in gasamɔ k’ɛ́nɛ́ tɛ o bezaŋ-wa mbɛt.

¹⁷Ga̧a̧mɔ ko GASA WAN Sɔ̧ k’ɛɛ a̧ dúk in yɛɛ, ɓɛɛ ɛ̀nɛ̀ dé h’ɛ́ɛ́ mɛ kpa mɔɔ-oi-tom k’ɛɛ.