Read Northwest Gbaya O TUA-WEN 16 Bible Online

O TUA-WEN 16 - Northwest Gbaya bible

O TUA-WEN 16

¹Ko bíí nɛ́ ee-zu-mɔ, ɓɛɛ nɛ Sɔ̧ a̧ ha̧ kifa-nú.

²Bíí zɔk yuwar mɔ kɔ‘i lɛŋ ɔ dee, ɓɛɛ nɛ́ GASA WAN a̧ we see-wi.

³Mɛ̀ é deemɔ kɔ-mɛ er GASA WAN, ɓɛɛ ee-zu-mɔ kɔ-mɛ tɛ hɔ gba̧a̧.

⁴O mɔ nɛ GASA WAN taa de nɛnɛ lɛŋ a̧a̧ nɛ tom kɔ‘i kpɔk kpɔk; wi-ɗaŋ mbɛt duk wen wese bɔnɛ.

⁵GASA WAN sɛna wi-ŋmaŋ-tɛ; nɛ mbetɛ, wi’ɛi tɛ kpa mɔɔ-oi-ɗaŋmɔ kɔ‘i.

⁶Nɛ́ tɛ dee demɔ in mboozu a̧ ɗaŋmɔ kɔ‘i bi nɛnɛ; ɓɛɛ nɛ́ tɛ yuu kíí GASA WAN a'i bɛ̧ nɛ dee ɗaŋmɔ.

⁷Kà GASA WAN kpɛk naŋanɔ ko ŋma bíí kaɗi, ɓɛɛ a̧ dee ha̧ see o wisɛn ko wi’ɛi mɛ ga̧ zu a̧.

⁸Gana so kpaa mɔ tikiɗi tɛ dee mɔ nɛ yuwar-a, bá nɛ̀ kpaa mɔ nɛ dɔka tɛ zuzu.

⁹See bíí ndak nɛ pata mɔ n'aa ta, ɓɛɛ nɛ GASA WAN a̧ usi yuwar ha̧ a̧.

¹⁰Kpasawen a̧a̧ ndàrá-nú wannu; ŋgimbi-gɔn-kita a̧ beka kɛ̧ mgbara bíí na.

¹¹O de mɔɔ-we-mɔ nɛ ko GASA WAN; o dita mɔɔ-we-mɔ kɔ̧ ŋgoɓo lɛŋ nɛ kɔ̧-a̧.

¹²Dee ɗaŋmɔ nɛ gasa ɗaŋmɔ sɛn ti o wannu, wen damti yor nɛ nɔa-a tɛ dee mɔ nɛ yuwar-a.

¹³Desee ko wannu a̧a̧ zu wi-tɔ̧-wen nɛ yuwar-a, wen a̧ kɔ̧ɔ̧ nɛ o wi-tɔ̧-kpasawen.

¹⁴Nyimsea ko wannu nɛ mɔɔ-gbɛ-fio, ɓɛɛ wi-iŋ-mgbara-mɔ nyɛma mɛ ha̧ ga̧a̧-see ha̧ a̧.

¹⁵Mami ko wannu ha̧ nɛ duka-kpasa, ɓɛɛ deako kɔ̧-a̧ duk hee kórò-ŋma-puɗu ga.

¹⁶Kpaa iŋa-mgbara-mɔ gana kpaa de lɔr, in kpaa iŋamɔ gana kpaa bu-mbɔi.

¹⁷Wi-de-mɔ nɛ yuwar-a e nɛ yuwar ɗaŋmɔ duk, wen wi nɛ zɔk naŋanɔ kɔ‘i nɛ de-a, zɔk nɛ duka-kpasa kɔ‘i nɛ de-a mbɛt.

¹⁸Tika-a nɛ́ mɔɔ-oi-ŋmaŋa-tɛ, mɔɔ-oi-gɔɔ-tɛ nɛ́ kɔ̧ɔ̧ naŋ.

¹⁹Gana so a'i duk in o wi-ya-si-ɗɔɔ nɛ mɔka-see, bá nɛ̀ kɛ̧ɛ̧ mɔɔ-oi-tom in o wi-gasi-zu.

²⁰Wi nɛ zii ŋma wen ɓɛɛ taa mɔ sɛnɛ nɛ de-a, duk kɔ‘i nɛ de-a; wi-e-ta nɛ GASA WAN tɛ duk tɛ bɔtɛ.

²¹Nɛ́ wi nɛ kɛ̧ mgbara mɔ nɛ de-a a'i sa'e, wi-iŋ-mɔ; nɛ́ tɔ̧ɔ̧ mbɔrɔ nɛ̀ kɔ̧ɔ̧mɔ a'i yeŋ zer sɛnɛ batɛ.

²²Iŋa-mgbara-mɔ ha̧ nɛ tugun duka-kpasa ko o wi nɛ a̧a̧ nɛnɛ, ɓɛɛ sap mgbélé ko wi nɛ̀ bó nɛ̀ kpasa taamɔ na á kana nɛ́ yí-see wan-aa.[11]

²³Wi-iŋ-mgbara-mɔ ta mɔ nɛti sɛka tɔ̧ɔ̧ wen; nɛ́ hegɔ sa wen kɔ̧-a̧ tik nu gee na.

²⁴De nú-wen nɛ́ ɔ̧ɔ̧-nyɔ̧ɔ̧-mɔ hee gɔrɔ ga; a̧ nɛ́ ɔ̧ɔ̧-nyɔ̧ɔ̧-mɔ kɔ̧ nú-wí in mɔɔ-hai-tɛ.

²⁵Ŋma yuwar a̧a̧ sɛnɛ nɛ ŋma bíí ta kɔ‘i'e, ɔ dee wen wi, ɓɛɛ mɛ ɗoŋ, ba nɛ a̧ sitɛ fio.

²⁶Nɛ́ wɔ a̧ de ha̧ wi-de-tom mɛ de tom; nɛ nú-a a̧ ir a̧ si sɛnɛ.

²⁷Ee-zu-mɔ ko wi-tɛɛri nɛ wen dee ɗaŋmɔ, ɓɛɛ ndara nú-a nɛ gee wee-dar-zɔ̧.

²⁸Wi-ɗaŋ dak nɛ kpɛri pi̧ nu, ɓɛɛ wi-ruŋgu kɛ̧ nɛ mgbara o sɛm.

²⁹Wi-de-ŋgamɔ ɔr nɛ sɛm kɔ‘i, wen mgbɔɔ a̧ pi tɛ ɗaŋ war.

³⁰Wi nɛ gu er yí kii mɛ de nɛ mɔɔ-búù, ɓɛɛ wi nɛ nyɔŋ er nú dee ɗaŋmɔ kaɗi.

³¹Mbui nɛ̀ hɔ́ zu bíí usi nɛ tu̧u̧-tɛ-mɔ, ɓɛɛ mɛ nɛ tɛ deemɔ nɛ yuwar-a a'i kpa nɛnɛ.

³²Wi nɛ see nyim nɛ haya-a na gana wi-gbin-biro; wi nɛ a̧a̧ nɛ see gana wi-bi-ye.

³³Wi pi̧ tani wen iŋa mɔ mɛ siti,[12] ɓɛɛ nɛ GASA WAN a̧ ha̧ kifa-nú.