Read Northwest Gbaya O TUA-WEN 17 Bible Online

O TUA-WEN 17 - Northwest Gbaya bible

O TUA-WEN 17

¹Gana so nyɔŋa wa̧a̧-kpoo[13] zaŋ ga̧a̧mɔ, bá nɛ̀ nyɔŋa zɔm zɔr-zɔr-kpòó kɔ̧ tua nɛ kpɛri a̧a̧ sɛnɛ.

²Wi-de-tom nɛ̀ zaŋ ɔ gɔna tɛ ɔ wan zu o be-wan-tua nɛ de nɛ mɔɔ-mgbele; a̧ tɛ kɛ̧ mɔɔ-oi in nya kɔ-wa.

³Nɛ́ wee a'i nɔ̧́í̧ nɛ bu-mbɔi in lɔr ha̧ mɛ sa̧, ɓɛɛ war ko see-wi nɛ GASA WAN a̧ we.

⁴Wi-ɗaŋ yeŋ nɛ zer tɛ ɗaŋ wen; zer wi-ndela ɓɔn ŋgɔn wen kɔɓa o ndiŋ wen.

⁵Wi nɛ mam wisan mam nɛ Wi nɛ dee a̧ mbɛt; wi nɛ mam wi-kɔsa tɛ kpa mɔɔ-oi-aa zɔ̧i̧i̧.

⁶Mɔɔ-e-nɛ-ta ko o sɔkawi nɛ o be-koo-wa, ɓɛɛ tɛ̀ bem tu̧ wen dáà in naa kɔ‘i.

⁷De nú-wen bo nɛ mɔ ko wi-bɔkɔ na, ɓɛɛ nú gasawi bá nɛ̀ ndela na.

⁸Mbɔi nɛ mɔ hee nyina-pɛm-tɛ ga, wen wi nɛ a̧a̧ nɛnɛ; kóó nɛ ge fara ge n'aa tɛ nɛ sɛnɛ ge, a̧ tɛ kpa mɔ.

⁹Wi to nɛ zɔ̧ a zu ɗɔr dɔr nɛ̀ doe; ká tɛ-wi mbaŋ ɗoŋ ɗɔr'i ha̧ nyɛr mɛ de wi ɓɔna.[14]

¹⁰Gaia wi nɛ zaŋ ɔ gɔna dee gan gusa wi-bɔkɔ tɛ nyasi gɔmŋmaa.

¹¹Wi-ɗaŋ kii kana kɔ‘i nɛ dee ŋgazu ɓɛɛ, ɓɛɛ betom nɛ tɛ we ti a̧ nɛ́ wi-de-ŋgamɔ.

¹²Gana so kpaa ŋmaa in naa-koe-nam nɛ‘i gbɛɛ o bem kɔ̧-a̧, gan kpaa ŋmaa in wi-bɔkɔ ŋgimbi de mɔɔ-mgbele kɔ‘i.

¹³Ɗaŋmɔ beka yu kɔ̧ tua ko wi nɛ kifi er demɔ nɛ ɗaŋmɔ na.

¹⁴Aa naŋ kpɛri nɛ mɔ hee gbina gba-zu ga; mɛ̀ wɛ́r kɔ-mɛ tɛ-mɛ nɛti sɛka kpɛri tika.

¹⁵Baa wi-ɗaŋ hee wi-de-mɔ nɛ yuwar-a ga, kóó wi-de-mɔ nɛ yuwar-a hee wi-ɗaŋ ga, nɛ mɔ yiitoo nɛ de tɛ GASA WAN na.

¹⁶Ŋma san ko wi-bɔkɔ tɛ mbɔi nɛ ge? Ha̧ a̧ mɛ hi̧fi nɛ iŋa-mgbara-mɔ naa kóó ha̧ a̧ mɛ de nɛ ge? Zɔk a̧ bo kɔ̧-a̧ nɛ iŋamɔ na.

¹⁷Nduti kɔ̧ɔ̧mɔ ko sɛm bo na, ɓɛɛ war-a ko nya-wi mɛ nɛ tɛ ŋgimbi nɛ bɔnɛ kpa mɛ ɓɛɛ.

¹⁸Nɛ́ mgbelewi a̧ ba er kan nɛ mɔ ɓɛɛ ee ziŋina oi nú nyamandoi ko ŋma-a.

¹⁹Wi-kɔ̧-kpɛri nɛ wi-kɔ̧-ɗaŋmɔ, ɓɛɛ wi-gasi-zu kii nɛ tika-a.

²⁰Wi-ruŋgu beka kpa de duka-a na, ɓɛɛ ɗaŋmɔ tɛ tik zu wi-tɔ̧ ɗaŋ nú-wen.

²¹Wi nɛ ko wi-bɔkɔ tɛ kpa nɛ dita-see; ɓɛɛ desee ko dáà ko wi nɛ kɔ̧ zaŋ gɔn na, bo na.

²²Desee ha̧ nɛ haya-tɛ, ɓɛɛ tu̧u̧-see pi̧ nɛ gɛ̧ɛ̧mɔ tɛ-wi.

²³Wi-ɗaŋ kpɛk nɛ mɔ nɛ‘i ye nɛ a̧ ha̧ a̧ mɛ gɔn kita nɛ ɗaŋ-a.

²⁴Wi zɔk iŋa-mgbara-mɔ ko bíí sɛn sɔnti-a, ɓɛɛ yí wi-bɔkɔ zɔk kɔ‘i mɔ a zu ŋmaa.

²⁵Be-bɔkɔ tu̧ nɛ see dáà kɔ‘i, ha̧ nɛ dita-see ha̧ naa kɔ‘i mbɛt.

²⁶Usa bɔnɛ ha̧ wi-de-mɔ nɛ yuwar-a de na, in gusa o tu̧u̧-tɛ-bíí nyɛm yi mɔɔ-dee na.

²⁷Zaŋ wi-kom-wen tɔ̧ nɛnɛ ɔ gɔna, in wi nɛ nak tɛ tɛ tɔ̧ɔ̧ wen na, nɛ kpasa bíí.

²⁸Kóó nɛ wi-bɔkɔ mbɛt, kà à̧ duk nɛ oi nú-a, a̧ tɔ̧ wen na, wi nyɛma mɛ zɔk a̧ hee wi-iŋ-mgbara-mɔ ga, kóó hee wi-gɔna-kɔ̧-zaŋ ga mbɛt.