Read Northwest Gbaya O TUA-WEN 22 Bible Online

O TUA-WEN 22 - Northwest Gbaya bible

O TUA-WEN 22

¹De hu̧ra-nin dee gan kpaa zɔm mbɔi, in kɔ̧ɔ̧mɔ gana bu-mbɔi kóó lɔr.

²Wanmbɔi in wisan yak ŋmaa na: mɛ nɛ GASA WAN a̧ dee wa yiitoo lɛŋ.

³Wi-iŋ-mgbara-mɔ zɔk ɗaŋmɔ ɓɛɛ hu̧sa̧, ɓɛɛ o wi-si-kafɛ ɗɔŋ kɔ‘i ɗɔŋ siti mɛ tik tɛ bɔnɛ.

⁴Mɔɔ-oi mɔka-see nɛ yuu kíí GASA WAN, nɛ kpaamɔ in zɔnamɔ ká bá nɛ̀ duka-kpasa.

⁵O tɛn in o pɛr a̧a̧ sɛn yuwar ko o ɗaŋwi, ɓɛɛ bíí nɛ kɔ̧ɔ̧ mɛ duk kpasa yu kɔ‘i mɔ‘i yuu.

⁶Mɛ̀ tɔ̧́ mbɔrɔ ha̧ bem kɔ-mɛ nɛ ku̧u̧naŋ-a, hegɔ kóó a̧ sɔka so, a̧ beka e duk na.

⁷Nɛ́ wanmbɔi a̧ ɔ wan zu wisan, ɓɛɛ wi-ba-nyamandoi nɛ bara ko wan-ha̧-nyamandoi'i.

⁸Wi-de-ɗaŋ tɛ kpa mɔɔ-oi ɗaŋmɔ nɛ yí,[23] ɓɛɛ ɓira-te n'aa gusi nɛ ŋma-a'i tɛ gbin a nu er-a.

⁹De yoŋgo a̧a̧ zu wi nɛ zɔk bíí nɛ de-a, wen n'aa gbak nɛ wisan nɛ nyɔŋmɔ.

¹⁰Mɛ̀ ndák wi-zɛkɛɗi-wi, ɓɛɛ ndaa kpɛri gɔna: ndaa dara in o zaŋa-wen tɛ gɔn lɛŋ.

¹¹Wi nɛ kɔ̧ɔ̧ mɛ ba sɛm in wannu a̧ duk nɛ sa̧a̧-see in nɛ kɔ̧ɔ̧mɔ.

¹²Gbaayí GASA WAN duk zu iŋamɔ, ɓɛɛ a̧ yai nɛ wen ko wi-de-ɗaŋmɔ a nu.

¹³Wi-tɛɛri'e: «Ŋma dila a̧a̧ zan sɛn yuwar'i; a̧ tɛ gbɛ‘m!»

¹⁴Nú o ɗaŋ okoo nɛ́ ɗuka lim; wi nɛ see GASA WAN nyim zu wa tɛ tik sɛnɛ.

¹⁵See obem nɛ see-mgbele, ɓɛɛ mbɔrɔ-nyasi tɛ ba see-aa yinɛ tɛ mgbélé taamɔ.

¹⁶Nukura wisan nɛ ha̧a̧ mbɔi ha̧ a̧; ha̧a̧mɔ ha̧ wanmbɔi nɛ pi̧i̧ san zu-wi nɛ tɛ-wi woyo.

¹⁷Mɛ̀ yéŋ zer-mɛ, mɛ̀ zíí tɔ̧ɔ̧ mbɔrɔ ko o wi-iŋ-mgbara-mɔ, ɓɛɛ mɛ̀ é see-mɛ sɛnɛ, a̧ mɛ zii mgbara-a.

¹⁸Mɛ tɛ kpa desee tɛ kasa a̧ e kɔ̧ see-mɛ, ha̧ wa mɛ duk nú-mɛ ɓɔnsɛnɛ,

¹⁹wen ha̧ mɛ mɛ e ta nɛ GASA WAN; nɛ mɔ‘i sa'm mbaŋ tɛ-mɛ sɛnɛ sɔsɔɔ.

²⁰Mɛ nɛ wen mɛ a̧‘m yɔra nɛ o tua-wen nɔ'ɔ ɓu-taar’ɛ, wen tɔ̧ɔ̧ mbɔrɔ in usa iŋa-mgbara-mɔ ha̧ mɛ.

²¹Mi yɔra wa wen ha̧ mɛ mɛ iŋ gba̧a̧ kpasawen in kifa-nú nɛ de-a tɛ akamɔ ko o wi nɛ tom mɛ.

²²Ká mɛ ɓɔŋ mɔ ko wi-kɔsa wen nɛ a̧ nɛ wisan na; ká mɛ nukuri wi-bɔnɛ tɛ kita na mbɛt.

²³Wen GASA WAN tɛ ye ɗoŋ wa, ɓɛɛ a̧ tɛ ba duka-kpasa tɛ o wi-kai-mɔ er-wa yinɛ.

²⁴Ká mɛ gbam yari in wi-nyimsea na, kóó wi-de-ŋgamɔ na mbɛt,

²⁵wen ká mɛ tɛɛ ndak ɗoŋ yuwar deemɔ kɔ-wa, ká mɔ‘i tɛɛ duk nɛ pɛ́r wen duka-kpasa kɔ-mɛ.

²⁶Ká mɛ ba er kan nɛ mɔ, e nɛ ziŋina oi nú wi-ba-nyamandoi na,

²⁷ŋmafara wen ká mɛ tɛɛ kpa mɔɔ-yoɓi nɛnɛ na, ká wa tɛɛ zuɗi gado ɗɔɔ mɛ yinɛ.

²⁸Ká mɛ ɗɔŋ gba̧‘a̧ gbìsí-nu nɛ o zɔmdáa kɔ-mɛ ee so yinɛ ba e siti na.

²⁹Mɛ́ zɔka ŋma gɔna-kɔ̧-zaŋ bíí fara de tom kɔ‘i kaɗi? A̧ nyɛma mɛ nɛɛ dee tom ha̧ o wannu, bá nɛ̀ duka-a hee ŋma tum gee wi-de-tom ga.