Read Northwest Gbaya O TUA-WEN 23 Bible Online

O TUA-WEN 23 - Northwest Gbaya bible

O TUA-WEN 23

¹Kà mɛ̀ nyɔŋ mɔ in ŋma gasawi, mɛ̀ mbó zu mɛ ti wi nɛ a̧a̧ ti mɛ.

²Kà mɛ̀ nɛ́ boo nɛ́ wi-ɗaɗa, mɛ̀ dák nú-ɗaɗa[24] kɔ-mɛ‘i.

³Ká mɛ́ yeŋ war nyɔŋmɔ kɔ̧-a̧ na; wen nɛ nyɔŋmɔ-ɔr-wi.

⁴Ká mɛ́ ɗaŋ ŋgai tɛ-mɛ lɛŋ kii nɛ mbɔi na; mɛ̀ é taamɔ kɔ-mɛ wen-aa duk.

⁵Yí-mɛ be tɛɛ zɔk mbɔi, ɓɛɛ ɓɛlɛm, a̧ bo na, wen mbɔi iŋa dea-a ha̧ wɔr-ɓaa mɛ hɔ. A̧ tɛ bu̧i̧ yak si yiwese hee zua ga.

⁶Ká mɛ́ nyɔŋ kam ko wi-a-see-mɔ na; ká mɛ́ yeŋ war nyɔŋmɔ kɔ̧-a̧ na mbɛt,

⁷wen a̧ duk hee wi nɛ ee zú wen kɔ‘i kaɗi ga. A̧ tɛ tɔ̧ ha̧ mɛ: «Mɛ̀ nyɔ́ŋ mɔ, mɛ̀ nɔ́ mɔ wa!» Ɓɛɛ kɔ̧ see-aa bo kɔ‘i in mɛɛ na.

⁸Mɛ tɛ ɔ̧i̧ mɔ nɛ mɛ nyɔŋa'i lɛŋ a nu, ɓɛɛ wɔ tɛ-mɛ busa tɛ nyɔ̧ɔ̧ wen nɛ mɛ tɔ̧ɔ̧ so'i.

⁹Ká mɛ́ tɔ̧ mbɔrɔ ha̧ wi-bɔkɔ na, wen a̧ beka iŋ mgbara de taamɔ kɔ-mɛ‘i na.

¹⁰Ká mɛ́ ɗɔŋ gba̧‘a̧ gbìsí-nu e siti na, in ká mɛ ye kpɛɛfɔ ko o be-oi na,

¹¹wen wi-yor-ɗoŋ-wa ɔ ŋgaya; nɛ a̧ a̧ tɛ kur in mɛɛ ye nɛ ɗoŋ wa.

¹²Mɛ̀ é see-mɛ tɛ usamɔ, in mɛ̀ yéŋ zer-mɛ tɛ iŋa-mgbara-mɔ.

¹³Ká mɛ́ ɓu kaara e ndaa o bem na; mɛ̀ gúsí wa nɛ nyasi, wa beka fe na.

¹⁴Tɛ gusa wa nɛ mɛ gusi nɛ nyasi'i, mɛ kpasi nɛ wa tɛ fio.

¹⁵Bem kɔ‘m, kà kɔ̧ zaŋ-mɛ nɛ gɔna, ɓɛɛ war kɔ‘m, tortɛ tɛ ba'm.

¹⁶Ŋgimbi nɛ mɛ tɛ tɔ̧ wen nɛ yuwar-a, kiitɛ‘m lɛŋ tɛ de nyɛŋɛ.

¹⁷Ká mɛ́ a see mɔ ko o ɗaŋwi nɛ kɔ̧ see-mɛ na, ɓɛɛ mɛ̀ yú kɔ-mɛ nɛ GASA WAN wese lɛŋ.

¹⁸Wen nɛ mbetɛ, ŋma mɔ nɛ tɛ nɛ ɗoŋ a̧a̧ sɛnɛ, ɓɛɛ ee-ta kɔ-mɛ beka tik nu gee na.

¹⁹Bem kɔ‘m, mɛ̀ zíí wen kɔ‘m, zaŋ-mɛ a̧ gɔn, ɓɛɛ mɛ tɛ ba yuwar kɔ-mɛ tan ti mɛ.

²⁰Ká mɛ́ duk mgbara o wi-gbɛ-dɔ̧ɔ̧ na, in o wi-de-wɔ mur-kpoo na,

²¹wen san tik tik zu o wi-gbɛ-dɔ̧ɔ̧ in o wi-de-wɔ mur-kpoo, ɓɛɛ tɛɛri de dee ha'i mɛ pi̧ a̧ka̧ laa.

²²Mɛ̀ zíí mbɔrɔ ko dáà kɔ-mɛ nɛ kóó mɛ‘i, ɓɛɛ ká mɛ e naa kɔ-mɛ tɛ geemɔ wen n'aa sɔka kaɗi na.

²³Mɛ̀ kásí kpasawen, ká mɛ́ ɗɔr a̧ siti na; nɛ́ kalemɔ mbɛt wen iŋa-mgbara-mɔ, usamɔ in iŋamɔ.

²⁴Dáà ko wi-de-mɔ nɛ yuwar-a tɛ de nyɛŋɛ kpíɗí nɛnɛ nɛ desee; wi nɛ ko wi-iŋ-mgbara-mɔ tɛ kpa desee.

²⁵See dáà in naa kɔ-mɛ a̧ de zu mɛ; naa kɔ-mɛ a̧ duk zaŋ desee.

²⁶Bem kɔ‘m, mɛ̀ é ta-mɛ nɛ‘m; mɛ̀ zɔ́k ɗoŋ deemɔ kɔ‘m.

²⁷Nɛ́ kpasawen'e, kó-de-mɔ nɛ mbɔɗɔnu nɛ gasa lim, ɓɛɛ gɔni okoo nɛ ɗuka gɔna-yi nɛ nú-a ɔ mɔi̧a.

²⁸Kóò‘i mbɛt pɛm nɛ mɛ hee wi-de-ɗaŋmɔ ga; a̧ nyɛɓi nɛ ɗaŋmɔ mgbara bíí.

²⁹«Ho!» nɛ̀‘i tɔ̧'ɛ, wi tɔ̧ zu o? «Iŋ so!» mbɛt nɛ̀‘i tɔ̧'ɛ, wi tɔ̧ wen o? O aia-nú nɛ́ wen o? Zaŋa tum-wen siti siɗoŋ nɛ́ wen o? Gbaayí nɛ zɔk mɔ sa̧ na tiɗiɗi nɛ́ wen o?

³⁰Mɛ̀ nɛ́ wen o wi nɛ fara-duk kɔ-wa nɛ ká̧ dɔ̧ɔ̧ in o wi nɛ kɔ̧ɔ̧ kɔ‘i nɛ wéé mbe ŋga dɔ̧ɔ̧ nɛtɛ nɛtɛ.

³¹Ká mɛ́ pɛm nɛ gbɛ̧ yi dɔ̧ɔ̧, nɛ dui nɛ de-a sɛn kɔ̧ ɗele in nɛ fok war ger-wi nɛ de-a'i na!

³²Wen mɛ ɗoŋ, a̧ gɔm wi hee gɔ́k ga, da̧-a̧ kana hee da̧ kóró ga.

³³Yí-mɛ tɛ zɔk o ŋma mɔ nɛtɛ, ɓɛɛ see-mɛ tɛ ta mɛ e nɛ zu o mɔ nɛ sa̧ na.

³⁴Mɛ tɛ duk hee ŋma bíí a̧ ɔ nu kɔ̧ kombon zu gba-tɔp, ɓɛɛ yi duk pi̧ nɛnɛ nɛ oi-aa ga.

³⁵Mɛ tɛ tɔ̧‘e: «Wa gusa'm, ɓɛɛ nyim tɛ‘m na! Wa wɔŋga'm, ɓɛɛ mi zii kɔ‘m ŋma mɔ na! Yí‘m tɛ gɔn bɔɔ mɛ gese ge ha̧‘m ak mbe-a a̧‘m nɔ woyo ge?»