Read Northwest Gbaya O TUA-WEN 24 Bible Online

O TUA-WEN 24 - Northwest Gbaya bible

O TUA-WEN 24

¹Ká mɛ́ e see-mɛ tɛ o wi-ɗaŋ na; in ká mɛ́ gbam yari in wa na,

²wen see-wa ta nɛ ɗaŋmɔ ɓɛɛ, nú-wa mbɛt tɔ̧ kana nɛ ɗaŋ wen.

³Wi nyɛma mɛ mbo tua nɛ iŋa-mgbara-mɔ; wi nyɛma mɛ de ha̧ tua'i mɛ nɔ nɛ yuwar taamɔ.

⁴Mɛ̀ nɛ́ tɛ iŋamɔ a'i nyɛma mɛ dun nɛ o gɔna-bɛr-tua'i nɛ o demɔ nɛtɛ nɛtɛ nɛ bíí kɔ̧ɔ̧ nyɛmna.

⁵Wi-iŋ-mgbara-mɔ in wi-iŋ-mɔ nɛ́ bíí nɛ duna nɛ ŋgai, ɓɛɛ wi nɛ a̧a̧ nɛ iŋamɔ kpa nɛ ŋgai gan kuti-a war yiitoo.

⁶Mɛ̀ nɛ́ sɛn tɛ taa mɔ nɛ de-a a̧ mɛ tɛ gbin nɛ biro, in mɛ̀ nɛ́ sɛn tɛ tɔ̧ɔ̧ mbɔrɔ ko o dɔka bíí a'i gbin nɛ biro.

⁷Kia-a mɛ kpa iŋa-mgbara-mɔ ɔ gasa hee zɔm kaya ga wen wi-bɔkɔ; sɛn nu garo ye a̧ nyɛm mɛ hú̧í̧ nú tɔ̧ wen ɓukui ŋgimbi ba keta na.

⁸Wi nɛ ba nɛ keta ɗaŋmɔ, wa sa nin-a'e wi-ɔr-wi.

⁹Taamɔ́-bɔkɔ nɛ́ ɗaŋwi, in wi-zɛkɛɗi-wi nɛ́ ɗaŋmɔ yí bíí lɛŋ.

¹⁰Kà mɛ̀ nɔ ŋgiɗi wese tu̧u̧-see na, mɛ̀ nɛ́ mɔ nɛ tɔ̧, ŋgai bo gee boa-a tɛ mɛ na.

¹¹Mɛ̀ gbó o wi nɛ a̧a̧ kɔ̧ zɔɓɔ-fio yinɛ; mɛ̀ kpásí o wi nɛ wa gbur yaknɛ mɛ gbɛ,

¹²ɓɛɛ ká mɛ́ tɔ̧‘e: «Mi iŋ so kɔ‘m mɔ nɛ yaka'i na,» na. Bo nɛ wi nɛ zɔk kɔ‘i nɛ mɔ kɔ̧ see-wi a̧a̧ sɛnɛ na? War kɔ̧-a̧, a̧ zɔka taamɔ kɔ-mɛ, ɓɛɛ a̧ iŋa. Nɛ a̧ a̧ tɛ ha̧ mɔɔ-oi-tom ko bíí kpɔk kpɔk nyɛm nɛ ɗoŋ mɔ nɛ‘i dea.

¹³Bem kɔ‘m, gɔrɔ ɔ dee mɛ nyɔŋ; be nɔ̧́-gɔrɔ tɛ ɔ ga̧a̧ kɔ̧ war ger-mɛ.

¹⁴Nɛ hegɔ mbɛt a̧ iŋa-mgbara-mɔ tɛ duk nɛnɛ wen mɛ: kà mɛ kpa a̧, sɔnti-mɛ tɛ sa̧ wen mɔ mɛ siti, ɓɛɛ ee-ta kɔ-mɛ beka tik nu sɔɔ gee na.

¹⁵Ká mɛ́ de mɔɔ-gɔn-zaŋ hee wi-ɗaŋ ga wen baa tua ko wi-de-mɔ nɛ yuwar-a na, ká mɛ́ ɗaŋ fara-duk kɔ̧-a̧ na,

¹⁶wen kóó wi-de-mɔ nɛ yuwar-a yoo so nù war mɔɔrɔ-ɗoŋ-yiitoo, a̧ tɛ kur kana ŋgɔn, ɓɛɛ ko o wi-ɗaŋ, ŋgamɔ tɛ de ha̧ wa mɛ tik.

¹⁷Ká tortɛ ba mɛ wen nɛ̀ wisɛn kɔ-mɛ yoo nu na, in ká nyɛŋɛ pi̧ mɛ wen n'aa tira yɔɔ-mɔ na mbɛt,

¹⁸wen ká GASA WAN tɛɛ zɔk, ká see-aa ɗaŋ, ká nyimsea kɔ̧-a̧ tɛɛ yu zu wi’ɛi.

¹⁹Ká see-mɛ kur zu o wi nɛ de ɗaŋmɔ na; ká mɛ́ a see mɔ ko o wi-ɗaŋ na;

²⁰wen mɔ ko wi-de-ɗaŋmɔ bo siti na; in lamba ko o wi-ɗaŋ tɛ bi.

²¹Bem kɔ‘m, mɛ̀ yú GASA WAN in wannu, ká mɛ́ ye ɗoŋ o bíí nɛ kɔ̧ɔ̧ mɛ kpai mɔ nɛ mbe-a na;

²²wen kifa-er zu wa nɛ́ hee gɔma-yí ga, ɓɛɛ nɛ o'o iŋa bɔnɛ nɛ Sɔ̧ in wannu tɛ pi̧ zu wa o?

²³O ŋma usamɔ ko o wi-iŋ-mgbara-mɔ nɛ mɔɔ nɔ'ɔ woyo: Yee-ɗoŋ-bíí tɛ kita de na.

²⁴Wi-gɔn-kita nɛ tɔ̧ ha̧ wi nɛ wen baa a̧‘e: «Wen bo zu mɛ na,» fom ko giiwi tɛ ba a̧; o tugun bíí tɛ pi̧ búù zu a̧,

²⁵ɓɛɛ o wi nɛ tɛ gɔn kita nɛ yuwar-a zu wi nɛ wen baa a̧ tɛ ya nɛ de-a, ɓɛɛ de yoŋgo in de zɔnamɔ tɛ duk zu wa.

²⁶Kifa-nú nɛ̀ sa̧a̧-see usi nɛ kpasa deemɔ ko kpasa sɛm.

²⁷Mɛ̀ dé tom kɔ-mɛ mɛ́ zan nɛti; mɛ̀ wá fɔ kɔ-mɛ nɛti; hɔ-ɗoŋ-aa, ɓɛɛ mɛ̀ dé tua kɔ-mɛ.

²⁸Ká mɛ́ de sedaako-ndela zu ŋma-mɛ na; mɛ́ kɔ̧ɔ̧ so ha̧ wen kɔ-mɛ mɛ duk nɛ ɔramɔ nde?

²⁹Ká mɛ́ tɔ̧‘e: «Hee mɔ'ɔ n'aa dee hegɔ in am ga, mi tɛ de in a̧ hegɔ mbɛt, mi tɛ kifi er mɔ ha̧ bíí nyɛm nɛ ɗoŋ tom ko wi’ɛi,» na.

³⁰Mi ɓira nɛ̀ ká̧ fɔ ko wi-tɛɛri, in nɛ̀ ká̧ fɔ-nyak-dɔ̧ɔ̧ ko wi nɛ nɔɔ-ŋgiɗi bo na;

³¹ɓɛɛ fɔ‘i kpee nɛ̀ tɛn-dara, tɛn hura fɔ‘i lɛŋ, ɓɛɛ be ɓoramɔ-ta gbina a nu mbɛt.

³²Ŋgimbi n'am zɔka mɔ‘i, mi taa mɔ, mi mbaɗa mɔ, ɓɛɛ mɔ‘i ha̧ taamɔ ha̧‘m:

³³mɛ nɛ wen zu be ɔɔ ya, be zura ya mɔi̧ nɛ er a zu ŋmaa nyafi nɛ tɛ ɗɔɗɔɗɔ;

³⁴kà mɛ de hegɔ ɓɛɛ san tɛ tik zu mɛ hee wi-yar-gee ga, in kaɓa mbɛt tɛ tik zu mɛ hee ŋma wi-ɓar-mɔ ga.