Read Northwest Gbaya O TUA-WEN 29 Bible Online

O TUA-WEN 29 - Northwest Gbaya bible

O TUA-WEN 29

¹Wi nɛ‘i gai takaɗi, nɛ de kana nɛ ŋga-see siti, tɛ gbin nduku-nduku hee gɔma-yí ga nɛ nyina-a beka bo na.

²Ɔɔ-wan ko o wi-de-mɔ nɛ yuwar-a nɛ́ desee ko dukbíí; ɓɛɛ ɔɔ- wan ko wi-ɗaŋ nɛ ɗaŋsee kɔ-wa.

³Wi nɛ kii nɛ iŋa-mgbara-mɔ ha̧ nɛ desee ha̧ dáà kɔ‘i, ɓɛɛ wi-ndak-ɗoŋ o kó-de-mɔ nɛ mbɔɗɔnu ɗaŋ nɛ mbɔi kɔ‘i.

⁴Mɛ̀ nɛ́ tɛ deemɔ nɛ yuwar-a a̧ wannu ɗafi nɛ nù kɔ‘i, ɓɛɛ wan nɛ ŋgai kɔ‘i nɛ sede garama yai nɛ ye a taŋ.

⁵Wi-ɔr-ŋma-wi tui nɛ pɛ́r ti ɗɔɔ naŋ-a.

⁶Ɗaŋmɔ ko wi-ɗaŋ nɛ pɛ́r wen-aa, ɓɛɛ wi-de-mɔ nɛ yuwar-a duk kɔ‘i nɛ tortɛ de nɛ nyɛŋɛ.

⁷Wi-de-mɔ nɛ yuwar-a iŋa mgbara bɔnɛ ko wisan, ɓɛɛ wi-ɗaŋ bó nɛ̀ iŋamɔ mɛ iŋ mgbara-a na.

⁸Wi-kai-ndaa-wi pi̧ nɛ wee tɛ ye, ɓɛɛ wi-iŋ-mgbara-mɔ dee ha̧ nyimsea mɛ deŋi.

⁹Kà wi-ta-mɔ de kita in wi nɛ zu bo na laŋ, a̧ nyɛma mɛ kpa tu̧u̧-see, kóó mɛ mam mami, ɓɛɛ ga̧a̧mɔ beka hɔ na mbɛt.

¹⁰O wi-gbɛ-zu sɛn nɛ wi nɛ wen bo zu a̧ na, ɓɛɛ o wi-de-demɔ kii kɔ‘i mɛ gbam yari in wa.

¹¹Wi-bɔkɔ nɔ ŋgiɗi zu nyimsea kɔ‘i na, ɓɛɛ wi-iŋ-mgbara-mɔ kii nɛ yuwar ha̧ nyimsea kɔ‘i mɛ ga̧.

¹²Kà ŋma wan yeŋ zer tɛ wen ndela laŋ, oi o wi-de-tom kɔ̧-a̧ lɛŋ tɛ kifi nɛ o wi-ndela mbɛt.

¹³Wisan in wi-zuzu nyɛma ŋmaa tɛ mɔ'ɔ: mɛ̀ nɛ́ GASA WAN a̧ de ha̧ yí-wa yiitoo lɛŋ mɛ zɔk mɔ.

¹⁴Wannu nɛ gɔn kita zu o wisan nɛ yuwar-a tɛ kpa duka-a tɛ wan siti ɓɔnsɛnɛ.

¹⁵Nyasi in tuɓa da̧ ha̧ nɛ iŋa-mgbara-mɔ, ɓɛɛ bem nɛ‘i e mɛ de mɔ nɛ zu, nɛ́ be-e-foe yí naa kɔ‘i.

¹⁶Kà o wi-ɗaŋ ɔ wan, ɗaŋmɔ dɔk dɔk siti, ɓɛɛ o wi-de-mɔ nɛ yuwar-a tɛ ya nɛ́ sedaako tika-a kɔ-wa.

¹⁷Kà mɛ̀ usi kpasa mɔ ha̧ bem kɔ-mɛ, a̧ beka e foe yí-mɛ na, a̧ tɛ gbak nɛ mɛ batɛ ɛ̧.

¹⁸Kà hɔɔ-zu ko wi-tɔ̧-wen oi nu Sɔ̧ bo na, dukbíí de nɛ mɔ hegɔ soŋkpooŋ yaknɛ, ɓɛɛ toka-de-yoŋgo a̧a̧ zu wi-kasi-heembea.

¹⁹Wí úsí mɔ ha̧ bara nɛ̀ wen mɛ nú-wí na; a̧ tɛ zii kana wen'i ɓɛɛ a̧ beka de mɔ-aa na.

²⁰Mɛ zɔka ŋma wi-tɔ̧-wen putum-putum kaɗi; gana so ee-ta nɛ wi-bɔkɔ bá nɛ̀ a̧.

²¹Kà‘i deli bara nɛ bem mɛ tɛnɛ, a̧ be tɛɛ gasi kaɗi, a̧ beka mbo zu ha̧ dáa-bara kɔ̧-a̧ na.

²²Wi-ŋga-see dak nɛ kpɛri pi̧ nu, ɓɛɛ wan-kura-see de ɗaŋmɔ dee nyɛmna.

²³Ŋmaŋa-tɛ ko bíì tɛ pi̧ buu zu a̧, ɓɛɛ tɛ-wi nɛ a̧a̧ nɛ mɔka-see tɛ tu̧.

²⁴Wi nɛ nyɔŋ kpɔk in wi-zuzu sɛn nɛ tɛ; a̧ a̧ zii bee-mɔ‘i, ɓɛɛ a̧ gbar wi-zuzu'i na mbɛt.

²⁵Kíì tui nɛ pɛ́r ha̧ bíí, ɓɛɛ wi nɛ e ta nɛ GASA WAN duk kɔ‘i keɗeŋ.

²⁶O dɔka bíí kii nɛ zɔnamɔ ko wan kɔ-wa, ɓɛɛ nɛ GASA WAN a̧ ha̧ mɔɔ-oi-tom ko bíí kpɔk kpɔk ha̧ wan-aa.

²⁷See o wi-de-mɔ nɛ yuwar-a tu̧ see zu o wi-ɗaŋ nyɛmna, ɓɛɛ see wi-ɗaŋ tɛɛ tu̧ see zu wi-de-mɔ nɛ yuwar-a mbɛt.