Read Northwest Gbaya O TUA-WEN 31 Bible Online

O TUA-WEN 31 - Northwest Gbaya bible

O TUA-WEN 31

¹Mbɔrɔ ko Lemuɛl, wannu Masa[29] nɛ naa kɔ̧-a̧ tɔ̧ɔ̧ so ha̧ a̧ mɛ kasi nɛ mɔ'ɔ:

²«Nɛ́ ge a̧‘m tɛ tɔ̧ ha̧ mɛ ge, bem kɔ‘m? Ge a̧‘m tɛ tɔ̧ ge, yaa-kpɔk!

³Ká mɛ́ ha̧ ŋgai tɛ-mɛ lɛŋ sitɛ okoo na, in yuwar deemɔ kɔ-mɛ si kɔ̧ er okoo nɛ a̧a̧ nɛ ŋgai mɛ de ha̧ o wannu mɛ tik na.

⁴Lemuɛl, bo nɛ ɔ dee ha̧ wannu mɛ nɔ dɔ̧ɔ̧ na; de ha̧ o be-wan mɛ kɔ̧ kpɔra dɔ̧ɔ̧ na,

⁵wen kà wà gbɛ dɔ̧ɔ̧, tɛ-wa tɛ bi ɗoŋ o heembea, ɓɛɛ wa tɛ gɔn kita zu o geɗek bíí nɛ ɗaŋ-a.

⁶Ɛ̀nɛ̀ há̧ kpɔra dɔ̧ɔ̧ ha̧ wi nɛ bi fio, in ha̧ wi nɛ a̧a̧ nɛ ɗaŋsee,

⁷ha̧ wa nɔ, ha̧ tɛ-wa bi ɗoŋ bɔnɛ in san kɔ-wa'i.

⁸Mɛ̀ tɔ̧́ wen, mɛ̀ yé ɗoŋ o wi nɛ nyɛm mɛ tɔ̧ wen na, in oi nú o wi-kɔsa.

⁹Mɛ̀ hú̧i nú-mɛ, mɛ̀ gɔ́n kita nɛ yuwar-a; mɛ̀ yór ɗoŋ o wi-mɔka-see in o wisan.»

¹⁰Nɛ́ o'o nyɛma kpaa kpasa kóò o? Kpasa kóò gana kísí nɛ gɛnɛ-a ɔ ŋgaya!

¹¹Wíì kɔ̧-a̧ e ta nɛ a̧, ɓɛɛ mɔ beka ɓan a̧ na.

¹²Kóò‘i de mɔ ha̧ wíì kɔ‘i nɛ de-a, nɛ bó nɛ́ nɛ̀ ɗaŋ-a na dam ɗoŋ ŋgimbi kɔ̧-a̧ lɛŋ.

¹³A̧ kii nɛ de zɔ̧-laa in de zɔ̧ goe, ɓɛɛ er tom kɔ̧-a̧ ɔ dee nyɛmna.

¹⁴A̧ pɛ o mɔɔ-nyɔŋ kɔ̧-a̧ tɛnɛ nɛ nyɛi̧a fara hee kombon-de-gɛnɛ ga.

¹⁵A̧ kur ŋgɔn nɛti ha̧ gɔna-ndaa-zan, mɛ gbai kam ha̧ o bíí kɔ̧ tua kɔ̧-a̧ in mɛ usi tom ha̧ o kó-de-tom kɔ̧-a̧.

¹⁶A̧ ta mɔ wen fɔ ɓɛɛ a̧ hi̧fa; ɓɛɛ nɛ́ mɔ n'aa kpa tɛ tom kɔ̧-a̧ a̧ a̧ gun nɛ nyak-dɔ̧ɔ̧ nɛ̀nɛ́.

¹⁷A̧ iŋa nyɔŋa nin-a, in dee tom nɛ ŋgai er-a mbɛt.

¹⁸A̧ zɔka'e tom kɔ̧-a̧ nɛ́ nɔ̀ nɛ de-a, ɓɛɛ lamba kɔ̧-a̧ bi mɛ zaŋzɛ na kpoo nɛ kpoo.

¹⁹A̧ pi̧ nɛ er-a kɔ̧ mɔɔ-pir-garaazi, fan nɛ laa kɔ̧-a̧ nɛ tɛ-a.

²⁰Er-a nik sitɛ o wi-kɔsa na; a̧ hú̧í̧ nɛ er-a ha̧ o wisan.

²¹Kíì gɛ̧ɛ̧ de a̧ wen o bíí kɔ̧ tua kɔ̧-a̧ na, wen wa lɛŋ a̧a̧ nɛ laa zu ŋmaa yiitoo.

²²A̧ iŋa dee o borgo ɓɛɛ o laa-pi̧ kɔ̧-a̧ nɛ de zɔ̧-laa nɛ duk nɛ gbɛ̧-a̧.

²³Mgbara o gasa bíí saaye, wa tu̧ nɛ tɛ wíì kɔ̧-a̧, ɓɛɛ a̧ duka bá nɛ̀ keta in o kuti-wi saaye mbɛt.

²⁴Kóò‘i fan nɛ zɔ̧-laa ɗɔr nɛnɛ, a̧ de nɛ o ndota mɔɔ-hɛr-zaŋ ha̧ o wi-ɗɔr-mɔ.

²⁵Ŋgai in tu̧u̧-tɛ-mɔ duk nɛ o mɔɔ-ɗafi-tɛ kɔ̧-a̧; kíì mɔ mɛ siti de a̧ na.

²⁶A̧ tɔ̧ wen nɛ nú-tum na, ɓɛɛ leɓe-a tɔ̧ nɛ mbɔrɔ kɔ̧ɔ̧mɔ.

²⁷A̧ zɔk mɔ nɛ a̧a̧ kɔ̧ tua kɔ̧-a̧ nɛ de-a, in a̧ kɔ̧ duka-a hegɔ gee, de tom na, na.

²⁸O bem kɔ̧-a̧ zɔn nɛ a̧ nɛ hee ger, ɓɛɛ wíì kɔ̧-a̧ mbɛt tu̧ nɛ tɛ-a tɔ̧ nɛnɛ‘e:

²⁹«Okoo ɔ dɔka de nɛ kpasamɔ, ɓɛɛ war kɔ-mɛ, mɛ gana wa lɛŋ!»

³⁰Mgbɔɗɔmgbɔŋ kpoo-tɛ nɛ geemɔ, déè mbɛt yak yak, ɓɛɛ nɛ okoo nɛ yu kíí GASA WAN a'i tɛ zɔn.

³¹Ɔ dee ha̧ kóò‘i mɛ kpa mɔɔ-oi-tom kɔ‘i; ɓɛɛ bíí lɛŋ a̧ zɔn a̧ tu̧ nɛ tɛ-a.