Read Northwest Gbaya O TUA-WEN 9 Bible Online

O TUA-WEN 9 - Northwest Gbaya bible

O TUA-WEN 9

¹Iŋa-mgbara-mɔ dee tua kɔ‘i; a̧ sɛka o mbiŋ mɔɔrɔ-ɗoŋ-yiitoo.

²A̧ gɔna o saɗi, gi dɔ̧ɔ̧, ɓɛɛ ɗafi taŋe-nyɔŋ-mɔ mbɛt.

³A̧ toma okoo-de-tom kɔ̧-a̧ si kusa-fara saaye, a̧ hee mbéá‘e:

⁴«Wi-iŋ-mɔ-na a̧a̧ sɛnɛ nde? Wa a̧ gbo nɛ war hɛ̧ɛ̧!» A̧ tɔ̧ɔ̧ ha̧ wi-nɛ-zu-bo-na'e:

⁵«Ɛ̧̀nɛ̀ nɛ́, ɛ̀nɛ̀ nyɔ́ŋ brɛt kɔ‘m; ɛ̀nɛ̀ nɔ́ dɔ̧ɔ̧ n'am gia.

⁶Ɛ̧̀nɛ̀ é mgbélé taamɔ duk h’ɛ́nɛ́ mɛ ya kpasa; ɛ̀nɛ̀ bá nɛ yuwar iŋamɔ.»

⁷Wi nɛ tɔ̧ mbɔrɔ ha̧ wi-si-kafɛ ba nɛ tɛ e tɛ geemɔ; wi nɛ sa wi-ɗaŋ ha̧ a̧ mɛ e ɗaŋmɔ kɔ̧-a̧ duk, kpa nɛ dara e zu.

⁸Ká mɛ́ tɔ̧ mbɔrɔ ha̧ wi-si-kafɛ na, ká a̧ tɛ̀ɛ́ sɛn mɛ́; kà mɛ̀ gai wi-iŋ-mgbara-mɔ, ɓɛɛ a̧ tɛ kɔ̧ mɛ.

⁹Mɛ̀ há̧ mɔ ha̧ wi-iŋ-mgbara-mɔ, ha̧ a̧ iŋ mgbara mɔ gan kuti-a; mɛ̀ úsí mɔ ha̧ wi-de-mɔ nɛ yuwar-a, ha̧ iŋamɔ kɔ̧-a̧ mɛ gasi.

¹⁰Yuu kíí GASA WAN nɛ ku̧u̧naŋ Iŋa-mgbara-mɔ; tu̧u̧ tɛ-a mbɛt nɛ mɔ ko o sa̧a̧ bíí.

¹¹Wen nɛ́ Iŋa-mgbara-mɔ a̧ tɛ de ha̧ zɛ duka-a kɔ-mɛ mɛ dɔk siti, in ha̧ pɛ-mɛ mɛ dɔk siti mbɛt.

¹²Kà kɔ̧ zaŋ-mɛ nɛ gɔna, nɛ́ wen zu-mɛ; ɓɛɛ kà mɛ́ nɛ́ boo nɛ́ wi-si-kafɛ, nɛ́ mɛ́ ɛnɛ-mɛ kpɔk a̧ mɔɔ-oi-aa tɛ kpa.

¹³Mgbélé nɛ́ okoo-fo-mɔ nɛ̀ de mɔɔ-bɔkɔ, taamɔ bo zu na.

¹⁴A̧ duk ká̧ nu tua kɔ̧-a̧, sɛn gɔn kiti zu o ɓoramɔ saaye

¹⁵mɛ sa nɛ o wi-ɓir-war, nɛ ɓir mɔ kɔ‘i ɓir yak'e:

¹⁶«O wi-iŋ-mɔ-na a̧a̧ sɛnɛ nde? Wa a̧ gbo nɛ war hɛ̧ɛ̧!» Ɓɛɛ a̧ tɔ̧ɔ̧ ha̧ wi-nɛ-zu-bo-na'e:

¹⁷«O yi nɛ‘i zu̧ zu̧u̧ ɔ dee, o nyɔŋmɔ nɛ‘i zu̧ zu̧u̧ ɔ nyɔ̧ɔ̧ nyɛmna.»

¹⁸Ɓɛɛ wa iŋ kɔ-wa'e, fio a̧a̧ fara'i na, wa iŋ‘e o wi nɛ kóò‘i saa ba nɛ war si ɗoŋ fio na.