Read Northwest Gbaya EKLEZIASTƐ 10 Bible Online

EKLEZIASTƐ 10 - Northwest Gbaya bible

EKLEZIASTƐ 10

¹O fio zi̧ de ndiŋ dee, ɓɛɛ wa dee ha̧ nɔ̧́ ko wi-de-nɔ̧́-nyama mɛ kpa̧i̧; kale-a mbɛt, mɔɔ-mgbele tikiɗi gana zu iŋa-mgbara-mɔ in hura-nin.

²Taamɔ ko wi-iŋ-mgbara-mɔ mgbɔ wan-aa mgbɔɔ nɛnɛ sitɛ de fara, ɓɛɛ taamɔ ko wi nɛ̀ bó nɛ̀ kpasa taamɔ na mgbɔ nɛ wan-aa si ɗaŋ fara.

³Kà wi nɛ̀ bó nɛ̀ kpasa taamɔ na nɛ nɔ yuwar, ɓɛɛ taamɔ kɔ̧-a̧ dee ha̧ bíí lɛŋ mɛ iŋ‘e a̧ nɛ wi nɛ̀ bó nɛ̀ kpasa taamɔ na.

⁴Kà see wannu nyim in mɛ̀ɛ́, ká mɛ́ e fara-tom kɔ-mɛ duk na, wen nɔɔ-ŋgiɗi dor wi dor tɛ dee o gasa ɗaŋmɔ.

⁵Ŋma ɗaŋmɔ n'am zɔka ɗɔɔ yiwese’ɛ nɛ mɔ'ɔ: mɛ nɛ ŋma yɔɔ-kaya ko o wannu;

⁶o wi nɛ̀ bó nɛ̀ kpasa taamɔ na ya kɔ-wa tɛ gasa fara, ɓɛɛ o wanmbɔi yaa si ɗɔɔ;

⁷bara daŋ kɔ‘i nɛ nyaŋa, ɓɛɛ be-wan nɛɛ kɔ‘i nɔ nɛ naŋ hee bara ga.

⁸Wi nɛ za̧ kɔ̧, ŋma ɓɛɛ nɛ a̧ a̧ tɛ tik kɔ̧ n'aa za̧a̧‘i; wi nɛ gbin gasa ŋgeŋ, kana nɛ a̧ a̧ gɔ́k tɛ nyɔŋ.

⁹Wi nɛ hú̧í̧ ta, kana nɛ o ta nɔ‘i a̧ e da̧i̧ tɛ-a; wi nɛ mbaŋ nɛ gua a̧ kasi zu wen ká a̧ tɛɛ ba da̧i̧.

¹⁰Kà nu kpi̧i̧ kɔ-mɛ nɛ tɔ̧ɔ̧ na, ɓɛɛ kà'ì nɛ́ bɛŋa nú-a na, mɛ́ tɛ́ dè tom nɛ ŋgaya-a; kà'ì de tom nɛ iŋa-mgbara-mɔ, ɓɛɛ wi kpaa mɔɔ-oi-aa.

¹¹Kà gɔ́k nɛ́ nyɔŋa wi-ɔr-gɔ́k, nɛ́ ge a̧ wi-ɔr-gɔ́k'i tɛ kpa oi tom kɔ‘i ge?

¹²Wen nɛ gbo nɛ nú wi-iŋ-mgbara-mɔ nɛ mɔ nɛ ɔ dee tɛ bíí nyɛmna; ɓɛɛ wen nɛ gbo nɛ nú wi nɛ̀ bó nɛ̀ kpasa taamɔ na de ha̧ a̧ mɛ yɔ.

¹³Ku̧u̧naŋ wen kɔ̧-a̧ nɛ mgbélé in sɔŋkur wen kɔ̧-a̧ duna nɛ ɗaŋ mɔɔ-mgbélé.

¹⁴Wi nɛ̀ bó nɛ̀ kpasa taamɔ na bur wen nɛ nú-tum géè; bíí íŋ mɔ nɛ tɛ́ hɔ na, ɓɛɛ nɛ o'o tɛ tɔ̧ mɔ nɛ tɛ hɔ oi-aa ha̧ a̧ o?

¹⁵Tom ko wi nɛ̀ bó nɛ̀ kpasa taamɔ na mbɔi nɛ a̧ sɔɔ géè; a̧ iŋ géé iŋa yuwar mɛ nɛ nɛnɛ si saaye na.

¹⁶Bɔnɛ a̧a̧ zu ŋma nù nɛ̀ wannu'i nɛ́ géé obem in o be-wan mɛ sɛnɛ ya kɔ-wa de nɛ gbaŋa nɛ tuyɛ.

¹⁷Ɓɛɛ nɛ̀ kɔ-mɛ, nù, nɛ̀ wannu kɔ-mɛ nɛ́ tu̧u̧-tɛ-bíí'ɛ, nɛ̀ o be-wan kɔ-mɛ nyɔŋ mɔ nɛ ŋgimbi-a ha̧ wa mɛ kpa ŋgai, nɛ̀ bó nɛ́ wɔ-nɔɔ-dɔ̧ɔ̧ gbɛ nɛ́ wa na’ɛ, desee a̧a̧ zu mɛ.

¹⁸Kà‘i de tom nɛ tɛɛri, kpaakpee-tua tɛ gbin; kà‘i ɗafi zu tua na, tua'i tɛ hui.

¹⁹Ɓɛɛ fara-nyɔŋ-mɔ nɛ́ fara mami, nɛ́ dɔ̧ɔ̧ a̧ pi̧ desee tɛ-wi, nɛ́ sede a̧ ha̧ mɔ lɛŋ ha̧ bíí.

²⁰Kóó nɛ kɔ̧ see-mɛ, ká mɛ́ fom wannu na; kóó nɛ kɔ̧ gɔna-bɛr-tua-ɔɔ kɔ-mɛ, ká mɛ́ fom wanmbɔi na; wen ŋma be nɔ̧́í̧ tɛ ba wen-aa yaknɛ, ŋma be nɔ̧́í̧ nɛ bu̧i nɛ ŋgɔn mɛ tɛ dali wen-aa nɛnɛ ha̧ bíí.