Read Northwest Gbaya EKLEZIASTƐ 11 Bible Online

EKLEZIASTƐ 11 - Northwest Gbaya bible

EKLEZIASTƐ 11

¹Mɛ̀ pí̧ brɛt kɔ-mɛ zu yì, kà dé ká mɛ́ nɛ̀ɛ̀ bá woyo.

²Mɛ̀ kɛ̧́ ŋma mɔ nɛ mɛ́ kpaa ha̧ bíí mɔɔrɔ-ɗoŋ-yiitoo, kóó ha̧ bíí mɔɔrɔ-ɗoŋ-taar, wen mɛ iŋ ɗaŋmɔ nɛ tɛ hɔ zu nù na.

³Kà zan tu̧ kpɔ̧ɔ̧-kpɔ̧ɔ̧ kaɗi, mɛ́ ɗoŋ, ɓɛɛ kórò hɔa. Kà ŋma te mbii tik nu si war ká̧-zan-mɛ́-ɗɔɔ, kóó si war ká̧-zan-mɛ́-ŋgɔn, a̧ ɓɔn kana fara n'aa tika nù sɛnɛ‘i.

⁴Kà ŋma bíí pɛm mɔ ha̧ búk yu kaŋ sɛ wó, a̧ beka pɛ mɔ na; kà ŋma bíí tɔ̧‘e ha'i pɛm mɔ ha̧ tura-zan a̧ yak sɛ wo, a̧ beka mɔi̧ mɔ na.

⁵Wi iŋ fara nɛ ɔmi duka-kpasa tɛ nɛnɛ‘i na, wi iŋ mgbara mɔ ko bem nɛ gasi nɛnɛ sɛn kɔ̧ zaŋ naa kɔ‘i’ɛ na mbɛt. Hegɔ, wi beka iŋ ndaa tom ko Sɔ̧ nɛ de mɔ lɛŋ'ɛ na mbɛt.

⁶Mɛ̀ pɛ́ kpar-mɔ kɔ-mɛ mɛ tutuyɛ, ɓɛɛ mɛ ga̧a̧mɔ ká mɛ́ duk géè na mbɛt, wen mɛ iŋ tom nɛ tɛ gbak mɛ na, mɛ iŋ wan nɛ̀ tɛ gbak mɛ mgbara wa yiitoo'i na; ŋmafara wa yiitoo'i lɛŋ tɛ hɔ gba̧a̧ ndé, mɛ iŋ na.

⁷Sa̧a̧mɔ dee tɛ bíí nyɛmna; zɔka wese nɛ de mɔ nyɛmna.

⁸Kà zɛ́ ŋma bíí nɛ dɔka zaŋnu’ɛ, wi’ɛi a̧ duk nɛ desee ɓɔnsɛnɛ, ɓɛɛ a̧ a̧ iŋ‘e wese ɗaŋsee ɔ kana dɔka mbɛt; mɔ nɛ tɛ hɔ lɛŋ nɛ́ geemɔ.

⁹Ŋgaiwi, mɛ̀ dúk nɛ desee ŋgimbi nɛ mɛ biti nɛ ŋgai; mɛ̀ kpá desee ŋgimbi daŋa ŋgaiwi kɔ-mɛ, mɛ̀ dé mɔ nɛ see-mɛ kɔ̧a̧ lɛŋ in mɔ nɛ yí-mɛ́ zɔka nɛ dee tɛ-mɛ, ɓɛɛ mɛ̀ íŋ kana ndé, Sɔ̧ tɛ gɔn kita zu mɛ tɛ mɔɔ nɔ‘i lɛŋ.

¹⁰Ká mɛ e ha̧ see-mɛ mɛ ɗaŋ na, mɛ̀ fó ɗaŋmɔ tɛ-mɛ yinɛ, wen ŋgimbi ŋgaiwi kɔ-mɛ nɛ mui̧-zu-mɛ biti nɛ tu̧-a̧ nɛ́ geemɔ lɛŋ.