Read Northwest Gbaya EKLEZIASTƐ 12 Bible Online

EKLEZIASTƐ 12 - Northwest Gbaya bible

EKLEZIASTƐ 12

¹Ŋgimbi ŋgaiwi kɔ-mɛ, tɛ-mɛ'ɛ mbaŋ ɗoŋ wi nɛ dee mɛ nɛti sɛka wese bɔnɛ hɔa in nɛti ha̧ ŋgimbi nɛ mɛ tɛ tɔ̧‘e: «Wɔ duka-kpasa gbɛ‘m ɓɔna.»

²Wen ŋgimbi tɛ hɔ nɛ wese, sa̧a̧mɔ, nyaŋa-zɛ in o sɔra tɛ bi, ɓɛɛ tu̧-zan tɛ pii ɗoŋ oi kórò mbɛt.

³Ŋgimbi tɛ hɔ nɛ tɛ o wi-pɛm-tua tɛ nak, nɛ ɗoŋ o ŋga bíí tɛ bir, nɛ o okoo beka hɔ̧n fuu ɓɔna, wen nɛ wa dɔk na; nɛ déè ko o okoo-zɔk-mɔ nɛ woi-tua beka bo ɓɔna;

⁴ŋgimbi nɛ nu tua tɛ kpe kaɗi, nɛ‘i beka zii giti o mɔɔ-hɔ̧n-mɔ ɓɔna, nɛ hiɗimɔ ko nɔ̧́í̧ tɛ tun wi, ɓɛɛ ká o be zɔŋa-bii-gima kpee ger;

⁵ŋgimbi'i, kíì daŋa kaya tɛ de wi, wí tɛ́ nɛ̀ nɔ̀ nɛ̀ kíì; ŋgimbi'i ɓɛɛ te-amande[4] ɓɔa kaɗi, waya zɔmɔ[5] mbaŋa kaɗi, ɓɛɛ gba-dɔya nyɔŋa mɔ zaŋ sur kaɗi mbɛt, wen bíí nɛ si kɔ̧ tua n'aa tɛ duk sɛnɛ ɓɔnsɛnɛ; okoo-hi̧i̧-fio yar kana nɛ yuwar nɛnɛ pɛm nɛ ŋgimbi'i mbɛt.

⁶Ŋgimbi'i, nyak hɛr bu-mbɔi tɛ bur, be-yee nɛ‘i dee nɛ lɔr tɛ mbaŋ, kpánà tɛ gba fara ɗu yi, mɔɔ-ba-yi tɛ ɗaŋ nú gɔna-yì;

⁷fuunu tɛ si ɗoŋ tɛ nù hee mɔ'ɔ n'aa duka so nɛti ga, ɓɛɛ ɔmi tɛ si ɗoŋ tɛ Sɔ̧ nɛ ha̧a̧ so a̧ tɛnɛ.

⁸Ekleziastɛ hee ndé, oee zɔm geemɔ wa! Mɔ lɛŋ nɛ́ geemɔ!

⁹Ŋma mɔ mɛ e zu iŋa-mgbara-mɔ ko Ekleziastɛ woyo mɛ nɛ wen n'aa usa iŋamɔ kɔ̧-a̧ ha̧ dukbíí. Ɗoŋ n'aa kia o gba̧a̧ tua-wen kaɗi, a̧ ɗafa ɗoŋ wa nɛ de-a.

¹⁰A̧ kia ha̧ a̧ mɛ yɔr o mɔ nɛ yɔka-a, a̧ kia ha̧ a̧ mɛ yɔr kpasawen ha̧ bíí mɛ zii nɛ sa̧a̧-a̧. Nɛ́ o kpasawen nɛ mbetɛ.

¹¹Wen ko o wi-iŋ-mgbara-mɔ duk hee sɛɛ-gɔrɔ ga, in o wi-yɔr-kalata ya hee o be-te nɛ wa mgboia ga; mɛ nɛ ha̧a̧mɔ ko ŋma wi-dai-mɔ kpɔk.

¹²Bem kɔ‘m, ká mɛ e ŋma mɔ zu-a na. Tom yɔra kalata nɛ́ ŋma tom nɛ kaɗi na, ɓɛɛ yambaia mɔ nɛ ŋgaya-a de ha̧ tɛ-wi mɛ mbɔi mbɛt.

¹³Sɔŋkur wen zu mɔ nɛ‘i tɔ̧ɔ̧ lɛŋ nɛ mɔ'ɔ: mɛ̀ yú kíí Sɔ̧, ɓɛɛ mɛ̀ kásí o geŋa kɔ̧-a̧, wen ɓaa mɔ ko bíí nɛ́ mɔ‘i.

¹⁴Sɔ̧ tɛ gɔn kita zu mɔ lɛŋ nɛ bíí dea; kóó nɛ́ demɔ, kóó nɛ́ ɗaŋmɔ.