Read Northwest Gbaya EKLEZIASTƐ 2 Bible Online

EKLEZIASTƐ 2 - Northwest Gbaya bible

EKLEZIASTƐ 2

¹Mi taa mɔ ɓɛɛ mi tɔ̧ ndé, mi tɛ pi̧ tɛ‘m tɛ desee in de duka-a wo! Mɔ‘i nɛ́ geemɔ mbɛt.

²Ɓɛɛ mi tɔ̧, mami nɛ́ mɔɔ-mgbélé sɔɔ géè; desee de kɔ‘i nɛ ge?

³Mi tɔ̧a̧ mi tɛ e tɛ‘m tɛ nɔɔ dɔ̧ɔ̧, ɓɛɛ mi beka e iŋa-mgbara-mɔ kɔ‘m so'i duk na mbɛt, mi beka de mgbélé mɔ na mbɛt. Mi tɔ̧a̧ mi tɛ de nɛ́ zɛŋ ha̧‘m mɛ zɔk kana mɔ nɛ o bezaŋ Adam nyɛma mɛ de sɛn ɗɔɔ yiwese’ɛ ŋgimbi nɛ wa biti duk kpasa.

⁴Mi dee o gasa tom. Mi mboo o tua, mi guna o nyak-dɔ̧ɔ̧.

⁵Mi waa o fɔ nyɔnɔ, ɓɛɛ mi wa o fɔ gún nɛ o te nɛ‘i nyɔŋ waya-a nyɔŋ sɛnɛ nɛtɛ nɛtɛ nɛ dɔka-a.

⁶Mi za̧a̧ o gɔna-yì ha̧‘m mɛ ɗu a tɛ o bɔr-te kɔ‘m.

⁷Mi hi̧fa o bara okoo in wiwii nɛ dɔka-a mbɛt. Mi a̧a̧ so nɛ̀ o wi-de-tom in o gasa mɔ-dai kɔ‘m in o geɗek-a nɛ dɔka-a gan o bíí lɛŋ nɛ ɔɔ wan nɛti ha̧‘m sɛn Jerusalɛm.

⁸Mi ndɛma bu-mbɔi in lɔr; o mbɔi ko o wannu in o wan mɛ zika-nù. Mi a̧a̧ so nɛ̀ o wiwii in o kó-bii-gima bá nɛ̀ o okoo nɛ duk nɛ́ mɔɔ-ha̧-desee ha̧ o bezaŋ Adam.

⁹Mi gana o wi nɛ ɔɔ so wan nɛti ha̧‘m sɛn Jerusalɛm lɛŋ, ɓɛɛ nɛ́ iŋa-mgbara-mɔ kɔ‘m a̧ gbaka'm.

¹⁰Mɔ nɛ yí‘m zɔka lɛŋ, kà mɔ‘i nɛ dee tɛ‘m kaɗi, ɓɛɛ mi dee mɔ‘i. Mi bɛ̧ ŋma mɔ nɛ see-am kɔ̧a̧ na, ɓɛɛ mi kpaa desee tɛ tom kɔ‘m n'am dee so'i lɛŋ. Mɔ n'am kpaa oi tom kɔ‘m nɛ mɔ‘i.

¹¹Mi taa mɔ sɛn tɛ tom n'am dee so nɛ er-am'i in bɔnɛ n'am zɔka so tɛ dee tom'i, ɓɛɛ mɔ lɛŋ nɛ́ geemɔ; nɛ́ géé ndaka ɗoŋ búk sɔɔ géè. Ŋma kpasamɔ nɛ‘i kpa ɗɔɔ yiwese’ɛ bo kɔ‘i na.

¹²Mi zɔka mɔ sitɛ o mɔɔ nɔ'ɔ: iŋa-mgbara-mɔ, mgbélé in bɔkɔ; nɛ́ ge a̧ mbe wan nɛ kpaia gba̧‘a̧-a̧ tɛ de ge? A̧ tɛ de nɛ́ kpɔk mɔ nɛ bíí dee so nɛti kaɗi.

¹³Mi zɔka kɔ‘m'e iŋa-mgbara-mɔ gana bɔkɔ hee mɔ'ɔ nɛ sa̧a̧mɔ gana nɛ tum’ɛ ga.

¹⁴Wi-iŋ-mgbara-mɔ iŋa yuwar n'aa ba, ɓɛɛ wi nɛ bó nɛ̀ kpasa taamɔ na nɛ́ kɔ‘i nɔ nɛ̀ nú-tum, zu-a'i wa yiitoo lɛŋ tɛ fe kana.

¹⁵Mi taa mɔ tɛ mɔ‘i ɓɛɛ mi tɔ̧: «Mɔ nɛ kpaa wi nɛ̀ bó nɛ̀ kpasa taamɔ na’ɛ tɛ kpa kana mi mbɛt; ɓɛɛ dɔka iŋa-mgbara-mɔ kɔ‘m'i tɛ de nɛ ge ha̧‘m ge? Mɔ‘i nɛ́ geemɔ mbɛt.»

¹⁶Kpɔk fea-a nɛ wi-iŋ-mgbara-mɔ fe’ɛ nɛ mɔ'ɔ nɛ wi nɛ̀ bó nɛ̀ kpasa taamɔ na fe mbɛt’ɛ, ɓɛɛ tɛ-wi bìí ɗoŋ wa yiitoo lɛŋ. Wen ge sa mɔ de hegɔ ge?

¹⁷Nyɛr duka-a kpasa dea'm, wen mɔ nɛ yak ɗɔɔ yiwese’ɛ lɛŋ de na. Mɔ lɛŋ nɛ́ geemɔ, nɛ́ ndaka ɗoŋ búk sɔɔ géè.

¹⁸Wɔ o tom n'am dee sɛn mbɔɗɔnu’ɛ gbɛ‘m ɓɔna, wen mi tɛ e lɛŋ ha̧ bíí nɛ tɛ duk oi-am.

¹⁹Kóó wi’ɛi tɛ duk nɛ́ wi-iŋa-mgbara mɔ náà, kóó wi nɛ̀ bó nɛ̀ kpasa taamɔ na ndé, o'o iŋa o? Mɛ nɛ a̧ a̧ tɛ ɔ wan zu mɔ lɛŋ n'am dee nɛ iŋa-mgbara-mɔ kɔ‘m ɗɔɔ yiwese’ɛ. Mɔ‘i kana nɛ́ geemɔ mbɛt.

²⁰See-am ɗaŋa tɛ zɔm tom n'am dea lɛŋ sɛn mbɔɗɔnu’ɛ.

²¹Wi nɛ̀ dee tom nɛ̀ iŋa-mgbara-mɔ, nɛ̀ iŋamɔ, nɛ̀ mɔ kɔ̧-a̧ hɔ nɛ́ gba̧a̧ tɛ́ e kana mɔ kɔ‘i ha̧ ŋma bíí nɛ de tom-aa kóó tikiɗi na. Mɔ‘i nɛ́ geemɔ in gasa ɗaŋmɔ mbɛt.

²²Nɛ́ ge a̧ tɛ ɓɔn ha̧ wi’ɛi oi tom lɛŋ n'aa dea nɛ see kpɔk zaŋnu’ɛ ge?

²³O wese kɔ̧-a̧ lɛŋ nɛ wese nyimmɔ, ɓɛɛ tom kɔ̧-a̧ nɛ dita-see; kóó mɛ zɛ, see wi’ɛi ga̧ na; mɔ‘i nɛ́ geemɔ mbɛt.

²⁴Ŋma demɔ ko bíí nɛ gana nyɔŋa mɔ in nɔɔ mɔ bá nɛ̀ kpaa desee zu tom kɔ‘i bo na, wen mi zɔka'e, o mɔɔ nɔ‘i lɛŋ tɛ nɛ kɔ̧ er Sɔ̧ nɛ mbetɛ.

²⁵Sɔ̧‘e ndé, nɛ́ ge bíí ge a̧ tɛ nyɔŋ mɔ kpa nɛ desee, nɛ wi Sɔ̧, wi iŋ na ge?

²⁶Mɛ̀ nɛ́ Sɔ̧ a̧ ha̧ iŋa-mgbara-mɔ, iŋamɔ in desee ha̧ bíí nɛ dee tɛ-a, ɓɛɛ a̧ dea ha̧ o wi nɛ de tɛ-a na mɛ kii mbɔi, mɔi̧ nɛnɛ e ha̧ wi nɛ dee tɛ-a'i. Mɔ‘i nɛ́ geemɔ, nɛ́ géé ndaka ɗoŋ búk sɔɔ géè.