Read Northwest Gbaya EKLEZIASTƐ 3 Bible Online

EKLEZIASTƐ 3 - Northwest Gbaya bible

EKLEZIASTƐ 3

¹Mɔ lɛŋ a̧a̧ nɛ ŋgimbi kɔ‘i; tom nɛ‘i de zaŋnu lɛŋ, ŋgimbi-a a̧a̧ kana sɛnɛ.

²Ŋgimbi wen kóó bem a̧a̧ sɛnɛ, ɓɛɛ ŋgimbi fio a̧a̧ sɛnɛ mbɛt. Ŋgimbi guna mɔ a̧a̧ sɛnɛ, ŋgimbi zuɗa mɔ nɛ‘i guna a̧a̧ sɛnɛ mbɛt.

³Ŋgimbi gbɛɛ bíí a̧a̧ sɛnɛ, ŋgimbi wen aa nyina yí-da̧i̧ a̧a̧ sɛnɛ mbɛt. Ŋgimbi gbina tua a nu a̧a̧ sɛnɛ, ŋgimbi wen mboa-a a̧a̧ sɛnɛ mbɛt.

⁴Ŋgimbi hi̧a̧ kɔ̧a̧ a̧a̧ sɛnɛ, ŋgimbi mama mami a̧a̧ sɛnɛ mbɛt. Ŋgimbi aia-nú a̧a̧ sɛnɛ, ŋgimbi yɔɔ yɔyɛ a̧a̧ sɛnɛ mbɛt.

⁵Ŋgimbi kaia ta a taŋ a̧a̧ sɛnɛ, ŋgimbi wen mɔi̧a ta a̧a̧ sɛnɛ mbɛt. Ŋgimbi hɛra ŋmaa a̧a̧ sɛnɛ, ŋgimbi nɛ‘i hɛr ŋmaa na a̧a̧ sɛnɛ mbɛt.

⁶Ŋgimbi kia mɔ a̧a̧ sɛnɛ, ŋgimbi ha̧ mɔ mɛ yɔ a̧a̧ sɛnɛ mbɛt. Ŋgimbi kasa mɔ a̧a̧ sɛnɛ, ŋgimbi baa mɔ pi̧ taŋ a̧a̧ sɛnɛ mbɛt.

⁷Ŋgimbi a̧ka̧ mɔ a̧a̧ sɛnɛ, ŋgimbi fura mɔ a̧a̧ sɛnɛ mbɛt. Ŋgimbi duka-a nɛ oi-nú a̧a̧ sɛnɛ, ŋgimbi tɔ̧ɔ̧ wen a̧a̧ sɛnɛ mbɛt.

⁸Ŋgimbi kɔ̧ɔ̧ ŋmaa a̧a̧ sɛnɛ, ŋgimbi sɛna ŋmaa a̧a̧ sɛnɛ mbɛt. Ŋgimbi biro a̧a̧ sɛnɛ, ŋgimbi ga̧a̧mɔ a̧a̧ sɛnɛ mbɛt.

⁹Nɛ́ ge mɔ ge a̧ wi-de-tom kpa oi tom kɔ‘i ge?

¹⁰Mi zɔka tom nɛ Sɔ̧ ha̧a̧ ha̧ o bezaŋ Adam mɛ de;

¹¹tom lɛŋ a̧a̧ nɛ ŋgimbi-a. Sɔ̧ ha̧a̧ taamɔ ha̧ bíí mɛ iŋ yaka-a nɛ ŋgimbi yak mbɛt, ɓɛɛ bíí nyɛm mɛ iŋ tugun deemɔ ko Sɔ̧ nɛ ku̧u̧ naŋ-a hɔ tɛ sɔŋkur-aa na.

¹²Mi iŋa'e ŋma demɔ ko bíí, yak zu desee nɛ‘i kpa duk nɛnɛ tɛ bɔtɛ, ŋgimbi nɛ‘i biti nɛ̀ kpasa, bo na.

¹³Mɔ nɛ‘i nyɔŋ in mɔ nɛ‘i nɔ, sɛka desee nɛ‘i kpa tɛ tom nɛ‘i de, nɛ́ Sɔ̧ a̧ ha̧ mɔɔ nɔ‘i lɛŋ.

¹⁴Mi iŋa'e mɔ nɛ Sɔ̧ de lɛŋ tɛ duk ɓɔnsɛnɛ; ŋma mɔ nɛ‘i tɛ pi̧ zu tom kɔ̧-a̧, bo na, in ŋma mɔ nɛ‘i tɛ ba tɛ tom kɔ̧-a̧ yinɛ, bo na mbɛt. Sɔ̧ de mɔ‘i hegɔ ha̧ bíí mɛ yu a̧.

¹⁵Mɔ nɛ duk kinii duka so nɛti kaɗi; mɔ nɛ tɛ hɔ, hɔɔ so kaɗi mbɛt, ɓɛɛ Sɔ̧ baa mɔ nɛ yaka kaɗi pii ɗoŋ woyo.

¹⁶Ŋma mɔ n'am zɔka zu nu’ɛ woyo nɛ mɔ'ɔ: nɛ́ fara-gɔn-kita in fara nɛ̀ deemɔ nɛ yuwar-a tɛ̀ɛ́ duk so sɛnɛ à̧ ɗaŋ dúk sɛnɛ.

¹⁷Nɛ mɔ‘i sa'm tɔ̧‘e, Sɔ̧ tɛ gɔn kana kita zu wi-de-mɔ nɛ yuwar-a in wi-ɗaŋ mbɛt, wen ŋgimbi mɔ lɛŋ a̧a̧ sɛnɛ, ɓɛɛ tom lɛŋ a̧a̧ nɛ ŋgimbi-a.

¹⁸Ɓɛɛ mi ta mɔ woyo zu o bezaŋ Adam ndé: «Sɔ̧ kɔ̧ɔ̧ mɛ we nɛ wa ha̧ wa mɛ iŋ‘e, wi ya hee saɗi ga.»

¹⁹Kpɔk mɔ nɛ kpa bíí'ɛ nɛ́ kpɔk mɔ‘i a̧ kpa saɗi mbɛt: i̧i̧ nɛ́ fea, ɛ̧ɛ̧ fea mbɛt. Wa a̧a̧ nɛ kpɔk ɔmi hee ŋmaa ga. Bíí gan saɗi nɛ̀ ŋma mɔ na, wen mɔ lɛŋ nɛ́ geemɔ.

²⁰Mɔ lɛŋ nɛ́ si kpɔk fara; mɔ lɛŋ tɛ̀ɛ́ nɛ̀ tɛ́ fuunu, ɓɛɛ mɔ lɛŋ tɛ si kana ɗoŋ tɛ fuunu.

²¹Nɛ́ o'o iŋa'e war ɔmi ko o bezaŋ Adam daŋ kɔ‘i daŋ si yiwese, ɓɛɛ ko saɗi zir kɔ‘i zir si ɗɔɔ nù o?

²²Mi iŋa kɔ‘m'e, ŋma demɔ nɛ bíí kpa, gan zu kpaa desee zu tom n'aa de, bo na; wen war mɔ kɔ̧-a̧ nɛ mɔ‘i. Nɛ́ o'o tɛ ba a̧ piinɛ ɗoŋ, wen zɔka mɔ nɛ tɛ de oi-aa woyo o?