Read Northwest Gbaya EKLEZIASTƐ 4 Bible Online

EKLEZIASTƐ 4 - Northwest Gbaya bible

EKLEZIASTƐ 4

¹Mi zɔka ŋgamɔ lɛŋ nɛ bíí de in ŋmaa sɛn zu nu’ɛ. Kɔ̧̀à̧ ko o wi nɛ zɔk bɔnɛ ɔ ŋgúr-ŋgúr, ɓɛɛ ŋma wi-ga̧-see-wa bo na. O wi-nasi-bíí a̧a̧ kɔ-wa nɛ ŋgai nyɛmna, ɓɛɛ o wi nɛ zɔk nɛ bɔnɛ bó nɛ̀ wi-ga̧-see-wa na.[2]

²Mi zɔna o fio nɛ fee kaɗi gan o wi nɛ biti duk kpasa.

³Zu-a woyo, nɛ́ bíí nɛ wa tɛ ko hɔ̧ɔ̧ na à̧ dúk nɛ desee gan, wen a̧ tɛ zɔk ɗaŋ tom nɛ de zu nù'ɛ hɔ̧ɔ̧ na.

⁴Mi zɔka tom nɛ bíí de nɛ ŋgai wen kpaa mɔ; wa de wen aa-see-mɔ in o ŋmaa. Ɓɛɛ mɔ lɛŋ nɛ́ geemɔ, nɛ́ géé ndaka ɗoŋ búk sɔɔ géè.

⁵Wi nɛ̀ bó nɛ̀ kpasa taamɔ na nɛ̀ mɔi̧ er kɔ̧ dee tom na, gbɛ nɛ tɛ;

⁶kɔ̧ er-wi kpɔk nɛ̀ duna nɛ̀ ga̧a̧mɔ gana er yiitoo nɛ de tom ndak nɛ ɗoŋ búk sɔɔ géè.

⁷Mi zɔka ŋma geemɔ sɛn ɗɔɔ yiwese’ɛ woyo:

⁸ŋma bíí duk ɛ̀nɛ̀, sɛm kɔ̧-a̧ bo na, bem bo na, ŋma nya-a̧ bo na mbɛt. A̧ beka ɔm tɛ-a tɛ tom na; kpaamɔ kɔ̧-a̧ nyɛm yi-a na mbɛt. Ɓɛɛ ha̧ a̧ mɛ ak tɛ-a'e, wi zɔk bɔɔ bɔnɛ-tom hegɔ wen o ndé wo’ɛ, bo na mbɛt. Mɔ‘i nɛ́ geemɔ in tom-takaɗi mbɛt.

⁹Duka-a in ŋmaa yiitoo gana duka-a ɛ̀nɛ̀; bíí yiitoo tɛ kpa mɔ tɛ tom kɔ-wa nɛ wa de in ŋmaa nɛ de-a.

¹⁰Wen kà ɓii bíí nɛ tika, bɔnɛ a̧a̧ zu wi nɛ duk ɛ̀nɛ̀. Kà a̧ tik, wi-ba-a̧ e ŋgɔn bo na.

¹¹Kà wa ɔ yiitoo, ɓɛɛ tɛ-wa baa wee. Kà bíí ɔ ɛ̀nɛ̀, tɛ-a tɛ ba bɔɔ wee hee ge?

¹²Kà bíí nɛ duka ɛ̀nɛ̀, ŋma bíí tɛ nyɛm mɛ gan zu-a; a̧ kà wa nɛ yaa yiitoo kaɗi, kpɔk bíí nyɛm mɛ gan zu wa na.

¹³Ŋma be-ŋgaiwi nɛ a̧a̧ nɛ iŋa-mgbara-mɔ, kóó a̧ so nɛ́ wisan, a̧ gana wannu nɛ oi sɔki kɔ‘i nɛ̀ bó nɛ̀ kpasa taamɔ na, nɛ̀ kɔ̧ mɛ zii mbɔrɔ na.

¹⁴Kòò bem’ɛi gboo so nɛ kɔ̧ zɔɓɔ mɛ ye tɛ wan, kòò a̧ so nɛ wisan nɛ mɔ'ɔ n'aa ɔ̀ɔ́ nɛ̀ wan,

¹⁵mi zɔka'e bíí lɛŋ nɛ̀ɛ́ ɗoŋ bem’ɛi ŋgimbi n'aa baa nɛ fara oi kuti wi’ɛi.

¹⁶A̧ duk zu bíí nɛ dɔka-a, bo nɛ mɔɔ tɔr na, ɓɛɛ ŋma wese see dukbíí kɔ̧-a̧ tɛ ɗaŋ zu a̧ mbɛt. Mɔ lɛŋ kana nɛ́ geemɔ, nɛ́ géé ndaka ɗoŋ búk sɔɔ géè.

¹⁷Mɛ̀ zɔ́k naŋanɔ kɔ-mɛ ŋgimbi nɛ mɛ nɛ sɛn kɔ̧ Tua ko Sɔ̧. Mɛ̀ ɗɔ́ŋ pii ti, mɛ̀ zíí wen, bo nɛ wen ɗafa-sɔ̧ hee o ŋma wi nɛ̀ bó nɛ̀ kpasa taamɔ na ga na, wen o wi nɛ̀ bó nɛ̀ kpasa taamɔ na iŋ ndé, nɛ́ ɗaŋmɔ a̧ wa de na.