Read Northwest Gbaya EKLEZIASTƐ 7 Bible Online

EKLEZIASTƐ 7 - Northwest Gbaya bible

EKLEZIASTƐ 7

¹De hu̧ra-nin gana de nɔ̧́-sɔ̧-tɛ; wese-fio gana wese-ko-bem.

²Nɛɛ fio gana nɛa-a fara gbaŋa, wen mɔ nɛ tɛ kpa bíí lɛŋ nɛ fio. O wi nɛ ya kpasa a̧ e see tɛ mɔ‘i.

³Duka-a nɛ ɗaŋsee gana duka-a nɛ mami, wen wi nɛ kai sɔnti nyɛma mɛ duk nɛ desee.

⁴Tɔ̧ɔ̧-mbɔrɔ ko o wi-iŋ-mgbara-mɔ a̧a̧ sɛnɛ ha̧ o bíí fara-fio; nɛ̀ war taamɔ ko o wi nɛ̀ bó nɛ̀ kpasa taamɔ na nɛ́ fara-de-saa.

⁵Zia mbɔrɔ ko o wi-iŋ-mgbara mɔ gana zia gima ko o wi nɛ̀ bó nɛ̀ kpasa taamɔ na.

⁶Mami ko wi nɛ̀ bó nɛ̀ kpasa taamɔ na duk hee zɔ̧ a̧ fu̧ tɛ wee ɗɔɔ kpánà ga; ŋma geemɔ nɛ́ mɔ‘i mbɛt.

⁷Kpaa ŋgai mɛ usi bɔnɛ ha̧ bíí nɛ mɔɔ-pi̧-dawa zu wi-iŋ-mgbara-mɔ; ɓɛɛ yee bíí nɛ̀ sede nɛ mɔɔ-ɗaŋ-taamɔ ko bíí.

⁸Kaɗa mɔ gana ku̧u̧ naŋ mɔ; de nɔɔ-ŋgiɗi gana ŋmaŋa-tɛ.

⁹Ká mɛ e ha̧ see-mɛ mɛ nyim nɛ haya-a na, wen nyimsea nɛ mɔ ko o wi nɛ̀ bó nɛ̀ kpasa taamɔ na.

¹⁰Ká mɛ ak mɔ‘e ndé, wen ge o wese nɛ yaka so dee gan ɛ̧ɛ̧ nɔ'ɔ ge nde, na, wen pɛrti akamɔ hegɔ bó nɛ́ akamɔ ko wi-iŋ-mgbara-mɔ na.

¹¹Iŋa-mgbara-mɔ hɔɔ ŋmaa in ŋma de mɔɔ-oi; iŋa-mgbara-mɔ nɛ mɔɔ-gbak-bíí lɛŋ nɛ ya ɗɔɔ yiwese’ɛ.

¹²Iŋa-mgbara-mɔ gbak wi gbak hee mɔ'ɔ nɛ sede gbak nɛ wi’ɛ ga. Demɔ ko iŋamɔ nɛ mɔ'ɔ: iŋa-mgbara-mɔ kpasi wi kpasi.

¹³Mɛ̀ zɔ́k tom ko Sɔ̧. Nɛ o'o tɛ nyafi mɔ nɛ Sɔ̧ bira o?

¹⁴Kà wese desee nɛ hɔa, nɛ̀ mɛ̀ dúk nɛ desee; kà wese ɗaŋsee nɛ hɔa, ɓɛɛ mɛ̀ tá mɔ ndé, Sɔ̧ dee ɛ̧ɛ̧ wese’ɛ in ɓii-aa mbɛt, wen ká bíí tɛɛ iŋ mɔ nɛ tɛ hɔ nɛ ɗoŋ.

¹⁵Tɛ duka-a kɔ‘m mbɔɗɔnu’ɛ nɛ̀ gba̧a̧-a̧ bo na’ɛ, mi zɔka mɔ lɛŋ: wi-de-mɔ nɛ yuwar-a yɔ yɔɔ nɛ oi deemɔ kɔ‘i nɛ yuwar-a, in wi-ɗaŋ nɛ̀ dúk dúk kpasa nɛ gɔn-ta kɔ‘i.

¹⁶Ká mɛ́ dé mɔ nɛ yuwar-a batɛ na; ká mɛ́ kii mɛ iŋ mgbara mɔ batɛ na mbɛt, ká mɛ tɛɛ gbɛ tɛ-mɛ géè.

¹⁷Ká mɛ usi ndé, mɛ́ nɛ́ wi-ɗaŋ batɛ na; ká mɛ duk nɛ wi nɛ̀ bó nɛ̀ kpasa taamɔ na, na mbɛt, ká mɛ tɛɛ fe nɛti ha̧ ŋgimbi kɔ-mɛ.

¹⁸Mi zɔka kɔ‘m ndé, a'i kasi mɔɔ nɔ‘i yiitoo'i, ɓɛɛ ká'í e duk na wen wi nɛ yu kíí Sɔ̧ beka de mɔ yak zale na.

¹⁹Iŋa-mgbara-mɔ ha̧ ŋgai ha̧a̧ ha̧ wi-iŋ-mgbara-mɔ gan ŋgai ko o ŋma wan ɓu nɛ ɔ wan tɛ ŋma kpɔk gasa ye.

²⁰Ŋma bíí nɛ de mɔ nɛ yuwar-a zu nu’ɛ ɓɛɛ nɛ de kɔ‘i ɗaŋmɔ na, bo na.

²¹Ɓɛɛ ká mɛ́ zii wen ko o wi-dali-wen na; ŋma ɓɛɛ wa tɔ̧ɔ̧ ha̧ mɛ ndé, wi-de-tom kɔ-mɛ da̧a̧ mɛ,

²²ɓɛɛ kɔ-mɛ, mɛ iŋa nɛ kɔ̧ɔ̧ see-mɛ ndé, mɛ da̧a̧ o ŋma bíí nɛ dɔka-a mbɛt.

²³Mi wee mɔ lɛŋ nɛ iŋa-mgbara-mɔ, mi usa tɛ‘m ndé, mi nɛ wi-iŋ-mgbara-mɔ, ɓɛɛ mi kia iŋa-mgbara-mɔ takaɗi.

²⁴Mi kia gba̧a̧ mɔ nɛ a̧a̧ sɛnɛ takaɗi, ɓɛɛ mi kpa na, wen gba̧a̧ mɔ nɛ́ ɗuka mɔ nyɛmna nɛ‘i beka nyɛm mɛ kpa ndaa-a na.

²⁵Mi ee see-am tɛ kia mɔ tɛ iŋa-mgbara-mɔ in tɛ taamɔ nɛ yuwar-a mbɛt hɔ tugun-aa mɛ, in ha̧‘m mɛ iŋ ndé, ɗaŋ nɛ́ mɔɔ-mgbélé nɛ ɗáŋ taamɔ ko bíí.

²⁶Mi zɔka ndé okoo nɛ duk nɛ pɛ́r ha̧a̧ ɗaŋsee ha̧ bíí gan ɗaŋsee-fio; kɔ̧ɔ̧mɔ mɛ kɔ̧ see-aa nɛ yɔk, ɓɛɛ o er-a nɛ nyak. Wi nɛ dee tɛ Sɔ̧ ba pɛ́r ko okoo na, ɓɛɛ nɛ wi-de-ɗaŋmɔ a̧ ba pɛ́r kɔ̧-a̧.

²⁷Ɓɛɛ sa mi Ekleziastɛ tɔ̧: mɔ n'am kpaa tɛ-wa ha̧‘m mɛ kpa taamɔ nɛ́ mɔ‘i.

²⁸Mi kia mgbara o mɔ nɛtɛ nɛtɛ, ɓɛɛ mi kpa ŋma mɔ sɛnɛ na. Mgbara o wiwii booro, mi kpaa nɛ kpasa-bíí kpɔk ɓɛɛ; ɓɛɛ mgbara o okoo lɛŋ, mi kpa ŋma kpasa-a na, kóó kpɔk.

²⁹Mɔ kpɔk n'am kpaa nɛ mɔ'ɔ: Sɔ̧ dee bíí nɛ de-a, ɓɛɛ nɛ bíí a̧ kia dɔka sakala-mɔ a zu.