Read Northwest Gbaya EKLEZIASTƐ 9 Bible Online

EKLEZIASTƐ 9 - Northwest Gbaya bible

EKLEZIASTƐ 9

¹Mi taa mɔ tɛ mɔ‘i lɛŋ, ɓɛɛ mi zɔka'e, tom ko wi-iŋ-mgbara-mɔ in o wi-de-mɔ nɛ yuwar-a a̧a̧ er Sɔ̧. Bíí iŋ mgbara kɔ̧ɔ̧mɔ in sɛnmɔ na mbɛt, wen mɔ‘i lɛŋ a̧ beka iŋ nɛ ti na.

²Nɛ́ kpɔk mɔ wen bíí lɛŋ. Mɔ nɛ kpa wi-de-mɔ nɛ yuwar-a kpa wi-ɗaŋ mbɛt; mɔ nɛ kpa de bíí kóó bíí nɛ war-tɛ-a ɔ sa̧a̧ kpa bíí nɛ war-tɛ-a sa̧ na mbɛt. Mɔ nɛ kpa wi nɛ ɗafi sɔ̧ kpa wi nɛ ɗafi sɔ̧ na mbɛt; mɔ nɛ kpa de wi kpa ɗaŋwi mbɛt. Mɔ nɛ kpa wi nɛ kan mɔ nɛ nin Sɔ̧, kpa wi nɛ de kíì káná mɔ mbɛt.

³Ɗaŋmɔ a̧a̧ tɛ mɔ lɛŋ nɛ yak zaŋnu’ɛ; nɛ́ kpɔk mɔ a̧ kpa bíí lɛŋ, ɓɛɛ ɗaŋmɔ duna kɔ̧ see o bezaŋ Adam. Wa de nɛ mgbélé mɔ ŋgimbi nɛ wa duk kpasa; mɛ ɗoŋ, ɓɛɛ wi yaka si mgbara o fio.

⁴Nɛ o a̧ a̧a̧ nɛ be mɔɔ-e-nɛ ta o? Nɛ́ o a'i tɛ hok o? Ŋma be mɔɔ e nɛ ta a̧a̧ kana sɛnɛ wen o wi nɛ ya kpasa: toyo nɛ biti kpasa gana wɔr-dila.

⁵O wi nɛ ya kpasa iŋa'e, wi tɛ fe, ɓɛɛ o fio iŋ kɔ‘i ŋma mɔ na, kóó tikiɗi. Ŋma mɔ nɛ wa tɛ kpa oi tom kɔ-wa, bo na, wen tɛ-wi bìí ɗoŋ wa kaɗi.

⁶Wa fee nɛ oi kɔ̧ɔ̧mɔ kɔ-wa in nɛ oi sɛnmɔ kɔ-wa ká bá nɛ̀ oi aa-see-mɔ kɔ-wa mbɛt. Ŋma mɔ nɛ wa tɛ kpa ɗɔɔ yiwese’ɛ bo ɓɔna.

⁷Mɛ̀ nɛ́ɛ̀ nyɔ́ŋ mɔ kɔ-mɛ nɛ desee, mɛ̀ nɔ́ mɔ kɔ-mɛ nɛ desee, wen Sɔ̧ kpɛka o mɔ nɛ mɛ dea'i kaɗi.

⁸O laa kɔ-mɛ à̧ dúk nɛ bu-a ɓɔnsɛnɛ, ká mɛ́ mbosi sɔ̧ɔ̧ nɔ zu-mɛ na.

⁹Mɛ̀ dúk nɛ desee in kóó kɔ-mɛ tɛ ŋgimbi geemɔ nɛ Sɔ̧ ha̧a̧ ha̧ mɛ ɗɔɔ yiwese’ɛ, wen war mɔ nɛ Sɔ̧ ha̧a̧ ha̧ mɛ sɛn tɛ duka-a kɔ-mɛ in sɛn tɛ tom kɔ-mɛ nɛ mɛ de sɛn ɗɔɔ yiwese’ɛ nɛ mɔ‘i.

¹⁰Mɔ nɛ mɛ kɔ̧ɔ̧ mɛ de, mɛ̀ dé nɛ́ dea-a ɓɛɛ; wen géè na, kóó tom, kóó gɔna-kita, kóó taamɔ, kóó iŋa-mgbara-mɔ bo ye ko o fio nɛ mɛ nɛ si sɛnɛ‘i na.

¹¹Nɛ mɔ'ɔ n'am zɔka mɔɔ nɔ‘i mbɛt: Bó nɛ́ ŋmaŋa bíí a̧ iŋa aa yaa-gan-ŋmaa na; wi-gbin-biro bó nɛ́ ŋga bíí na. Nyɔŋmɔ bó nɛ́ ko o wi-iŋ-mgbara mɔ ɓɛɛ na; mbɔi bó nɛ́ ko o wi-iŋ-mɔ na; bó nɛ́ wi-iŋ-mɔ batɛ a'i zɔk nɛ de yi na; o wi nɔ‘i lɛŋ kana nɛ desee in bɔnɛ a̧ tik zu wa.

¹²Hee mɔ'ɔ nɛ zoro ba nɛ yɔk’ɛ ga, kóó hee mɔ'ɔ nɛ o be nɔ̧́í̧ ba nɛ pɛ́r’ɛ ga, hegɔ bíí iŋ ŋgimbi bɔnɛ kɔ‘i na. Bɔnɛ tik zu o bezaŋ Adam kaɗi sɛka wa naka.

¹³Mi zɔka ŋma mɔ sɛn ɗɔɔ yiwese’ɛ tɛ iŋa-mgbara-mɔ nɛ ɔ gasa yí‘m.

¹⁴Ŋma ye duka so ɓɛɛ bíí ye'i dɔk na; nɛ mɔ'ɔ nɛ ŋma gasa wannu tɛa kɛr ye'i e nu mɛ bi, ɓɛɛ a̧ mbo mɔ kpe nɛ ɗoŋ ye'i.

¹⁵Ŋma ziɓa-wi a̧a̧ so saaye'i, ɓɛɛ wi’ɛi nɛ́ wi-iŋ-mgbara-mɔ; a̧ kpasa o wi saaye'i nɛ̀ iŋa-mgbara-mɔ kɔ̧-a̧, ɓɛɛ nɛ ɗoŋ, tɛ ŋma bíí mbaŋ ɗoŋ wi’ɛi ɓɔna.

¹⁶Mi'e ndé, iŋa-mgbara-mɔ gana ŋgai, ɓɛɛ kà wi-iŋ-mgbara-mɔ nɛ bòò nɛ́ ŋma ziɓa-wi, ɓɛɛ wi ee a̧ tɛ geemɔ, wi kɔ̧ mɛ zii wen kɔ̧-a̧ na.

¹⁷Wí zíí wen ko o wi-iŋ-mgbara-mɔ tɛ ga̧a̧mɔ gan ŋga ger ko ŋma wannu mgbara o wi nɛ̀ bó nɛ̀ kpasa taamɔ na.

¹⁸Iŋa-mgbara-mɔ gana o boi-de-biro, ɓɛɛ yɔɔ-kaya war kpɔk ɗaŋ mɔ nyɛmna.