Read Northwest Gbaya GIMA KO SALOMƆŊ 2 Bible Online

GIMA KO SALOMƆŊ 2 - Northwest Gbaya bible

GIMA KO SALOMƆŊ 2

¹Kɔ‘m, mi hɔɔ ŋmaa in do-te bɔkɔ-nu Sarɔŋ mɛ; mi duk hee gba-dɛŋ mgbara ɗɔŋgɔ ga.

²Sɛm kɔ‘m, mɛ́ dúk mgbara o dɔka zɔŋa hee gba-dɛŋ mgbara tɛn ga.

³Yaa-dua-see-am duk mgbara o dɔka be-ŋgaiwi hee ndìà[3] mgbara o dɔka te kɔ̧ kombo ga. Duka ɗɔɔ gi̧ɔ̧-a̧ pi̧ nɛ tortɛ tɛ‘m; waya-a ɔ nɛ nyɔ̧ɔ̧ nú‘m.

⁴A̧ mgbɔa'm nɛ́ɛ̀ yé nɛ fara-nɔ-mɔ k’ɛɛ, ɓɛɛ mɔ nɛ yɔra fara'i usa'e, «kɔ̧ɔ̧mɔ».

⁵Ɛ̀nɛ̀ há̧ nɛ makala waya nyak-dɔ̧ɔ̧ ha̧‘m, ha̧ gba̧a̧-tɛ‘m ŋgai; ɛ̀nɛ̀ há̧ nɛ gbɛ̧ waya-ndìà[4] ha̧‘m nyɔŋ, ha̧ see-am ga̧; wen zɛɛ kɔ̧ɔ̧mɔ daka'm pi̧ nu.

⁶A̧ ee er-a mɛ gale ɗɔɔ zu'm, ɓɛɛ a̧ hɛr am nɛ wii-er-a!

⁷«O boko-be Jerusalɛm, mi kana mɔ nɛ nin kalamba in zambɛrɛ h’ɛ́nɛ́, k’ɛ́nɛ́ aŋ wee kɔ̧ɔ̧mɔ mgbara yɛ a ŋgɔn na, hɔ ŋgimbi nɛ ŋgimbi-a tɛ nyɛm sɛnɛ sɛ.»

⁸Tiger yaa-dua-see-am a̧ de mɔ‘i! Zɔk a̧ n'aa tɛ mɛ‘i! A̧ ndɔr nɛ̀ zu o kaya, kpíɗí nɛ̀ zu o zu-tɔ̧́ tɛ nɛnɛ.

⁹Yaa-dua-see-am hɔɔ ŋmaa in kalamba ká bá nɛ̀ daŋa yoŋga zambɛrɛ. A̧ nɛ mɔ'ɔ; a̧ yor ɗoŋ ŋgeŋ k’ɛɛ, zɔk nɛ mɔ nɛ woi-tua; a̧ gɛɗi nɛ mɔ nɛ mgbara mɔɔ-kpe-woi-tua.

¹⁰Yaa-dua-see-am bíí nɛ gima tɔ̧ nɛnɛ ha̧‘m'e: «Yaa-wiyɛ, dua-see-am, mɛ̀ kúr, mɛ̀ tɛ́ ɛ̀ɛ̀ yak!

¹¹Ŋgimbi gɛ̧ɛ̧ yaka kaɗi; kórò gɔna mbɛt kaɗi.

¹²Wi zɔk nɛ o do-te sɛn fara lɛŋ, ŋgimbi haya-tɛ hɔɔ kaɗi; ɓɛɛ wi zii nɛ hiɗimɔ ko o kerŋgeɗe zu nu k’ɛɛ.

¹³O mbui waya-mbɔra[5] a̧ gbɛ̧ tɛnɛ‘i, pɛr do waya-nyak-dɔ̧ɔ̧ kur nɛ de-a tɛnɛ ɓisisi. Yaa-wiyɛ, dua-see-am, mɛ̀ kúr, mɛ̀ tɛ́ ɛ̀ɛ̀ yak wa!

¹⁴Mɛ́ dé mɔ hee gbaku̧i nɛ hu̧si nɛ mgbara ta in o kaya nɛnɛ'ɛ ga; mɛ̀ gbó pii zan ha̧‘m zɔk yí-mɛ, mɛ̀ tɔ̧́ wen ha̧‘m zii tiger-mɛ a'i, wen tiger tɔ̧ɔ̧-wen kɔ-mɛ ɔ dee nyɛmna, saŋa yí-mɛ dee tɛ‘m nyɛmna mbɛt.»

¹⁵«Ɛ̀nɛ̀ kái o gba-toyo nɔ'ɔ, wa nɛ o be saɗi-ɗaŋ-nyak-dɔ̧ɔ̧ k’ɛɛ nɛ biti doa-a’ɛ!»

¹⁶Yaa-dua-see-am duk nɛ kɔ‘m, ɓɛɛ mi duk nɛ kɔ̧-a̧; a̧ dai mɔ-dai kɔ̧-a̧ nɛ poo o gba-dɛŋ nɛnɛ.

¹⁷Mɛ̀ píí ɗoŋ nɛ oi ndaa wese, ká tum ba nu! Yaa-wiyɛ, dua-see-am, mɛ̀ dúk hee kalamba in yoŋga zambɛrɛ, nɛ hɔ zaŋgule nɛ zu o kaya nɛnɛ'ɛ ga.