Read Northwest Gbaya GIMA KO SALOMƆŊ 5 Bible Online

GIMA KO SALOMƆŊ 5 - Northwest Gbaya bible

GIMA KO SALOMƆŊ 5

¹Boko-nya'm, kóò n'am hara, mi yee kpɛɛfɔ kɔ‘m, ɓɛɛ mi mɔi̧ o nyama in o de pɛr do-te kɔ‘m, nyɔŋ nɛ toka ŋgee-gɔrɔ kɔ‘m, nɔ nɛ dɔ̧ɔ̧ in yibere kɔ‘m mbɛt! «Ɛ̀nɛ̀ nyɔ́ŋ mɔ, ɛ̀nɛ̀ nɔ́ mɔ! Ɛ̀nɛ̀ nɔ́ dɔ̧ɔ̧ kɔ̧ɔ̧mɔ ha̧ gbɛ‘nɛ́, o gba de sɛm kɔ‘m!»

²Mi ɔɔ nu, ɓɛɛ yá ba yí‘m na; kà‘m zii wo, ɓɛɛ yaa-dua-see-am a̧ kɔn nu tua'i! «Boko-nya'm, yaa-dua-see-am, yaa-kpɔk, mbe-a-bo-na, kúr hú̧í̧ nu tua ha̧‘m na nde! Zu'm ɓɔɔ nɛ mbɛŋ lɛŋ, buma zu'm ɔ ɗùkùyùkù gee.»

³«Mi kpɔ̧i̧a̧ kɔ‘m laa tɛ‘m yinɛ kaɗi, mi de i̧i̧ mɛ kur mɛ pi̧ laa woyo ɓɔna! Mi fɔra naŋ-am kaɗi, ɓɛɛ mi de i̧i̧ ha̧ naŋ-am mɛ ba ndiŋ woyo ɓɔna!»

⁴Yaa-dua-see-am pi̧i̧ er nɛ woi-tua tɛnɛ pii tɛ‘m, ɓɛɛ see-am to mgbut-mgbut gee.

⁵Soɓee, mi kura mɛ hú̧í̧ nu tua ha̧ yaa-dua-see-am kaɗi. Mi sɔ̧ɔ̧ so nɔ̧́-nyama er-am, ɓɛɛ nɔ̧́-nyama nɛ a̧a̧ tɛ o waza er-am'i ba tɛ kpar nu tua n'am foa'i.

⁶Mi hu̧i̧a̧ nu tua ha̧ yaa-dua-see-am; ɓɛɛ yaa, a̧ bo na. Mi gɔma gbo, ɓɛɛ mi ndak ɗoŋ-aa, kii nɛ a̧ takaɗi, mi kpa a̧ na. Mi saa mɔ ɗoŋ-aa, ɓɛɛ a̧ kɔ̧ sara nú‘m na.

⁷O wi-pɛm-mɔ nɛ yar zik nɛ garo kpaa'm, ɓɛɛ nɛ mɔ'ɔ nɛ wa mbɛra'm, e da̧i̧ tɛ‘m, ɓɛɛ wa ɓar gba-laa tɛ‘m ba yaknɛ. Nɛ́ o wi-pɛm-ŋgárá a̧ dee mɔ‘i.

⁸«Mi ai nú h’ɛ́nɛ́, o boko-be Jerusalɛm: k’ɛ̀nɛ̀ nɛ kpaa yaa-dua-see-am'i, ɓɛɛ nɛ́ ge wen ge ɛ̀nɛ̀ tɛ tɔ̧ ha̧ a̧ ge? Ɛ̀nɛ̀ tɔ̧́ ha̧ a̧‘e, zɛɛ kɔ̧ɔ̧mɔ ba nɛ‘m!»

⁹«Yaa gba de be-zɔŋa’ɛ, yaa-dua-see-mɛ gana o ŋma-a nɛ ge? Yaa-dua-see-mɛ‘i gana bɔɔ o dɔka bíí nɛ ge mɔ ge, sa mɛ ai nú hegɔ'ɛ ge?»

¹⁰Yaa-dua-see-am'i nɛ gbɛ̧-wi boɗoe; kóó sɛn mgbara gba gii wiwii booro ɓu, kana nɛ́ a̧ kpɔk a̧‘i zɔk ɓɛɛ.

¹¹Zu-a nɛ gba de sa̧a̧ lɔr; o mui̧-zu-a ɔ dura ye ŋmaa síp-síp nɛ̀ tu̧-a̧ ɓɔ́tɔ́tɔ́.[10]

¹²O gbaayí-a ɔ gɛɗa ŋgɛlɛlɛ hee o yol nɛ gu zu yì'ɛ ga; gbaayi-a dúk nɛ bu-a kàlàkùlɛ̀ɛ̀ hee duk ɗɔɔ yibere ga.

¹³O zaɗa-a duk hee gba de be fɔ, nɛ‘i guna o te-nyama nɛ pɛr-aa kur sɛnɛ nɛ de-a ga; o ndara nú-a duk hee o gba-dɛŋ nɛ do-a mir, ɓɛɛ nɛ pɛr-aa nun ɓisisi’ɛ ga.

¹⁴O yí-er-a ɔ reɓete hegɔ kini-kini hee kana lɔr nɛ‘i aa o de ta nɛ tok tok mgbara-a ga; zaŋ-aa nɛ gee mbɔɗa nin-fɔrɔ nɛ‘i kpee nɛ o gba de tu̧ ta lɛŋ.[11]

¹⁵O ku-a duk hee mbiŋ-tua nɛ‘i sɛka nɛ ŋga ta, ɓɛɛ ká‘i mbo mɔ nɛ gba de lɔr, bá zú kɔ̧ a̧ ga; a̧ baa yí-wi hee kaya Libaŋ ga; a̧ hɔɔ ŋmaa in gbatui[12] nɛ dee gan o dɔka te lɛŋ.

¹⁶Wen mɛ́ kɔ̧ nú-a nɛ ga̧a̧mɔ; o boko be Jerusalɛm, mɔ nɛ a̧a̧ tɛ-a lɛŋ baa see-am. Yaa-dua-see-am, sɛm kɔ‘m'i, nɛ́ mɔ‘i!