Read Northwest Gbaya GIMA KO SALOMƆŊ 6 Bible Online

GIMA KO SALOMƆŊ 6 - Northwest Gbaya bible

GIMA KO SALOMƆŊ 6

¹Yaa gba de be-zɔŋa’ɛ, yaa-dua-see-mɛ‘i yaka bɔɔ si dee, h’ɛ́ɛ́ kii a̧ in mɛɛ ge nde?

²Yaa-dua-see-am tɛ zir si kpɛɛfɔ kɔ‘i, si fara n'aa guna o de te-nyama sɛnɛ‘i, ha̧ a̧ mɛ dai mɔ kpɛɛfɔ‘i, in ha̧ a̧ mɛ ɓi o mira do gba-dɛŋ.

³Mi duk nɛ ko yaa-dua-see-am, ɓɛɛ a̧ duk nɛ kɔ‘m; nɛ́ sɛn fara'i a̧ a̧ dai mɔ-dai kɔ̧-a̧ nɛ poo o gba-dɛŋ nɛnɛ.

⁴Daŋ-ká-wese-bia, yaa-wiyɛ kɔ‘m, mɛ́ yora zɔŋa hee ye Tirsa ga; mɛ́ duk hee Jerusalɛm ga; mɛ́ nɛ́ mɔɔ-gɔn-hiɗi-wi.

⁵Mɛ̀ bá yí-mɛ tɛ‘m yinɛ, wen tɛ‘m mɔk mɔk tɛ zɔka'm nɛ mɛ zɔk'i. O mui̧-zu-mɛ duk hee gii gbadua nɛ gbin piinɛ nɛ zu kaya Galad mɛ ga.

⁶O gba̧a̧-nin-mɛ ɔ ndáká-ndáká hee gii sami nɛ daŋ nɛ fara-zui-wa’ɛ ga. Wa lɛŋ gbama yiitoo-yiitoo, kóó ŋma kpɔk mɛ duk ɛnɛ-wi bo na.

⁷Nɛ̀ ɗɔɔ laa-kpe-yí-mɛ mɛ tɛnɛ, o zaɗa-mɛ ya hee reeta kii kóɓò ga.

⁸Kóó wannu kaia so ko-wan ɓu-mɔɔrɔ-ɗoŋ-kpɔk, in o ŋma okoo[13] ɓu-mɔɔrɔ-ɗoŋ-taar, ká bá nɛ̀ o be-zɔŋa nɛ‘i beka tɔr pi nu na,

⁹daŋ-ká-wese-bia, yaa-tɛ-pondo kɔ‘m kpɔk'i nyɛma'm. A̧ nɛ kpɔk-bem, yaa-dua-see naa kɔ̧-a̧, nɛ o boko-bem zɔn tɔ̧ nɛnɛ‘e, «Mɔ a̧ bá nɛ a̧!» Nàao wannu in o kóò kɔ̧-a̧ zɔn nɛ kóò‘i tɔ̧ nɛnɛ‘e:

¹⁰«Mɔɔ, koo'i nɛ̀ daŋ ká mɔ gɔna mbɛliyɛ, nɛ̀ nyɛk hee nyaŋa-zɛ ga, in nɛ̀ ba hee wese ga, ɓɛɛ kà a̧ zɔk mɔ pii tɛ‘nɛ́, tɛ‘nɛ́ mɔka gbɛlɛsuwɛɛ‘i, duk hee ge?»

¹¹Mi zira si kpɛɛfɔ-te, ha̧‘m mɛ zɔk o be te nɛ hɔ sɛn mgbara ɗɔŋgɔ mɛ, ha̧‘m mɛ zɔk mɔ kà o nyak-dɔ̧ɔ̧ nɛ́ ɓɔa, in kà o kóɓò nɛ́ doa.[14]

¹²Nɛ mɔ'ɔ nɛ mɛ dee ha̧ taamɔ kɔ‘m mɛ sakali, ɓɛɛ tɛ‘m mɔk; boko be-wan![15]