Read Northwest Gbaya GIMA KO SALOMƆŊ 8 Bible Online

GIMA KO SALOMƆŊ 8 - Northwest Gbaya bible

GIMA KO SALOMƆŊ 8

¹Mɛ̀ bo so nɛ bu̧i-nya'm, kpɔk nu bere kɔ‘m, h’ɛ́ɛ́ mɛ kpa so ŋmaa zan, ha̧‘m mɛ hɛr mɛ nɔ yí-see-am ga, bíí beka ku̧i̧ so'm na.

²Mi tɛ̀ɛ́ mgbɔ mɛ́ si kɔ̧ tua ko naa kɔ‘m, ɓɛɛ nɛ́ hi̧i̧ á̧ mɛ́ tɛ̀ɛ́ usi mɔ ha̧‘m. Mi tɛ̀ɛ́ de há̧ mɛ́ mɛ́ nɔ de pɛr dɔ̧ɔ̧, ɓɛɛ mi ha̧a̧ nɛ́ ɔ̧ɔ̧ nyɔ̧ɔ̧ yí-waya-kóɓɔ̀[19] kɔ‘m ha̧ mɛ mbɛt.

³A̧ ee er-a mɛ gale ɗɔɔ zu'm, ɓɛɛ a̧ hɛr am nɛ wii-er!

⁴«Mi kana mɔ ti'nɛ́, o boko be Jerusalɛm, k’ɛ́nɛ́ aŋ wee kɔ̧ɔ̧mɔ mgbara yɛ a ŋgɔn na hɔ ŋgimbi nɛ ŋgimbi-a tɛ nyɛm sɛnɛ sɛ.»

⁵Nɛ́ ge okoo ge a̧ daŋ kɔ‘i nɛ ŋga-gbárà, ɛk nɛ tɛ nɛ yaa-dua-see-aa tɛnɛ'ɛ ge? Mi tuna mɛ́ ti ndìà,[20] fara nɛ naa kɔ-mɛ baa so zaŋ-mɛ, ko nɛ mɛ ɗɔɔ-a'i.

⁶Mɛ̀ hɛ́r am ndaɗi yí-see-mɛ hee dap nɛ‘i gɔn, ɓɛɛ ká̧ bi na’ɛ ga; mɛ̀ bá‘m ndaɗi ɓaa-mɛ hee dap ga mbɛt; wen kɔ̧ɔ̧mɔ ŋgaia gan fio. Gɔya zu kɔ̧ɔ̧mɔ e bíí na, hee mɔ'ɔ nɛ fio e nɛ bíí na’ɛ ga. Kɔ̧ɔ̧mɔ duk tɛ-wi hee wee nɛ nyɛk’ɛ ga, kɔ̧ɔ̧mɔ ba wi hee kórò ga.

⁷O gasa yi beka nyɛm mɛ bi wee kɔ̧ɔ̧mɔ na, kin nana-yì beka ba a̧ bin nɛ yi na mbɛt. Kóó wi ha̧a̧ so mɔɔ-kɔ̧-tua kɔ‘i lɛŋ wen kɔ̧ɔ̧mɔ, mɔ nɛ‘i tɛ kpa oi-aa nɛ zɛkɛɗa-wi ko o bíí.

⁸Boko nya-ɛɛ a̧a̧ sɛnɛ, ɓɛɛ a̧ biti nɛ geɗek-a, ber-aa tɛ sui hɔ̧ɔ̧ na. Nɛ ge ɛ̀ɛ̀ tɛ de ha̧ a̧ wese nɛ wii tɛ tɛ mɛ har a̧ ge?

⁹Kà à̧ à̧ duk so nɛ ŋgárá gaa, ɛ́ɛ́ tɛ̀ɛ́ de so fara-pɛm-mɔ nɛ bu-mbɔi e zu a̧; a̧ kà à̧ à̧ bo so nɛ nú-garo gaa, ɛ́ɛ́ tɛ̀ɛ́ kai so nɛ o gasa te gbatui ŋgasi nɛ nú-a.

¹⁰Kɔ‘m, mi nɛ ŋgárá, ɓɛɛ o ber-am nɛ fara-pɛm-mɔ; ɓɛɛ sɛn yi-a mi duk nɛ wi-ga̧-see-aa.

¹¹Salomɔŋ a̧a̧ so nɛ fɔ-nyak-dɔ̧ɔ̧ kɔ‘i sɛn Bal-Hamɔŋ; nɛ mɔ'ɔ n'aa ee er o wi-de-tom-aa, ɓɛɛ kóó o nde tɛ ha̧ sede n'aa kpaa zu ɗɔra o waya nyak-dɔ̧ɔ̧‘i ha̧ a̧, tɛ kɔya bu-mbɔi booro.

¹²Kɔya bu-mbɔi booro'i nɛ kɔ-mɛ, Salomɔŋ, ɓɛɛ nɛ̀ war ko fɔ-nyak-dɔ̧ɔ̧, kɔya bu-mbɔi gɔmŋmaa-yiitoo nɛ ko wi-de-tom; ɓɛɛ nɛ̀ war ko fɔ-nyak-dɔ̧ɔ̧ kɔ‘m, nɛ́ mɔ kɔ‘m nɛ tɛ‘m.

¹³Yaa-wiyɛ, mɛ́ nɛ̀ duk nu see fɔ'ɛ, o sɛm kɔ‘m yeŋ nɛ zer sitɛ mɛ; mɛ̀ tɔ̧́ wen ha̧‘m zii tiger-mɛ!

¹⁴«Yaa-dua-see-am, mɛ̀ yú mɔ yak! Mɛ̀ dúk hee kalamba in yoŋga zambɛrɛ nɛ hɔ zaŋgule nɛ zu o kaya nɛ de pɛr do-te nun sɛnɛ'ɛ ga.»