Read Northwest Gbaya ESAII 11 Bible Online

ESAII 11 - Northwest Gbaya bible

ESAII 11

¹Be te tɛ gbo nɛ gun Jɛse, ɓɛɛ kunin-te'i tɛ gbai nɛ de-a.

²Ɔmi ko GASA WAN tɛ duk zu a̧, ɔmi iŋa-mgbara-mɔ in kɛ̧ɛ̧-mgbara-mɔ, ɔmi tɔ̧ɔ̧-mbɔrɔ in ŋgai; ɔmi iŋamɔ in wan mɛ yu GASA WAN.

³Tom kɔ̧-a̧ nɛ usa mɔ ha̧ o bíí mɛ yu GASA WAN; a̧ beka gɔn kita zu bíí nɛ nú-tum na. A̧ beka tɔ̧ mɔ n'aa zii tɛ tɔ̧a̧-a̧ nɛnɛ na.

⁴A̧ tɛ de mɔ nɛ yuwar-a ha̧ o bíí nɛ zɔk bɔnɛ; a̧ tɛ gɔn kita ko o wi-kɔsa zaŋnu’ɛ nɛ yuwar-a. Wen mɛ nú-a tɛ duk nɛ nyasi-gusi o bíí tɛ nu'i, búk mɛ kɔ̧ nú-a tɛ duk nɛ mɔɔ-gbɛ o wi-ɗaŋ.

⁵Deemɔ nɛ yuwar-a nɛ́ mɔɔ-mar guntir-aa; deemɔ nyɛm nɛ ɗoŋ heembea nɛ́ kanda-hɛr-zaŋ kɔ̧-a̧.

⁶Gbóò tɛ duk kpɔk in be-sami; ɓɛɛ gɔ̧ tɛ ɔ kpɔk fara in o be-gbadua mbɛt. Be-ndai tɛ nyɔŋ mɔ kpɔk in be-dila, ɓɛɛ mɛ nɛ ŋma geɗek bem a̧ tɛ dai wa nɛnɛ.

⁷Ndai in baŋgiiɗoŋ[9] tɛ nyɔŋ mɔ kpɔk fara in ŋmaa; o bem kɔ-wa tɛ ɔ katɛ ŋmaa; dila in ndai tɛ nyɔŋ zɔ̧.

⁸Be zɔɗi-bem tɛ de saa sɛn nu kɔ̧ ko firi; o bem tɛ pi̧ er kɔ̧́ kɔ̧̀ ko kóró mbɛt.

⁹Ŋma ɗaŋmɔ kóó ŋgamɔ beka bo zu sa̧a̧ kaya kɔ‘m na, wen kinii nu lɛŋ duna nɛ iŋamɔ ko GASA WAN, hee mɔ'ɔ nɛ gba-tɔp mɔi̧ nɛ o nana-yì a ɗɔɔ a̧'ɛ ga.

¹⁰Wese'i, bezaŋ Jɛse tɛ kur yor nɛ mɔɔ-usi-mɔ ha̧ o dukbíí zaŋnu’ɛ lɛŋ; tugun bíí tɛ kii a̧, ɓɛɛ fara kɔ̧-a̧ tɛ duk nɛ zɔm gasamɔ.

¹¹Tɛ ŋgimbi'i, GASA WAN tɛ ba er nɛ ŋgɔn war yiitoo-aa woyo mɛ gbo o oi bíí kɔ̧-a̧ nɛ ɓɔna tɛ bara er Asirii in Egiptɛ, ká bá nɛ̀ Patros, Kus, Elam, Sinɛar, Hamat in o wan mɛ see-kisi ɗɔɔ gba-tɔp mɛ mbɛt.

¹²A̧ tɛ de mɔɔ-usi-mɔ ha̧ o tugun bíí, ɓɛɛ a̧ tɛ mɔi̧ o be Israɛl nɛ wa kaia so nɛ bara-biro yaknɛ in o be Juda nɛ pɛsa so dam mgbii-zan naar lɛŋ piiɗoŋ mbɛt.

¹³Aa-see-mɔ ko Efraim tɛ kaɗi, ɓɛɛ o wisɛn ko Juda tɛ kum lɛŋ. Efraim beka a see mɔ ko Juda ɓɔna, in Juda beka sɛn Efraim ɓɔna mbɛt.

¹⁴Wa tɛ tir si zu o be Filistii mɛ yee-wese, ɓɛɛ wa tɛ kai o kpaamɔ ko o be-daŋa-wese. Wa tɛ usi ŋgai kɔ-wa zu Edɔm in Mɔab, ɓɛɛ o be Amɔŋ tɛ mbo zu ha̧ wa.

¹⁵GASA WAN tɛ de ha̧ zɔm yi Egiptɛ mɛ ɔ̧sa̧, ɓɛɛ a̧ tɛ nyɛi̧ er-a zu nana-yì Efrat. Ŋgai ko búk mɛ kɔ̧ nú-a tɛ de ha̧ yi'i mɛ kɛ̧ gba tɛ fara mɔɔrɔ-ɗoŋ-yiitoo, ɓɛɛ o bíí tɛ ku yi'i nɛ oi ndárà naŋ-wa.

¹⁶Ŋma yuwar tɛ gbo wen oi dukbíí kɔ̧-a̧ nɛ ɓɔna sɛn Asirii, hee mɔ'ɔ nɛ o be Israɛl kpaa nɛ yuwar ɓeemɛ tɛ ŋgimbi gboa-a kɔ-wa sɛn nu Egiptɛ ga.