Read Northwest Gbaya ESAII 14 Bible Online

ESAII 14 - Northwest Gbaya bible

ESAII 14

¹GASA WAN tɛ de ko ha̧ Jakob, ɓɛɛ a̧ tɛ hok Israɛl woyo, ha̧ wa mɛ si ɗoŋ tɛ nu kɔ-wa. O gɔni-duk tɛ si ye zu wa, ɓɛɛ wa lɛŋ tɛ ya zaŋ ŋmaa in o be nutua ko Jakob.

²O ŋma dukbíí tɛ kpɛk mɛ kai o be Israɛl sinɛ ɗoŋ tɛ nu kɔ-wa woyo. Ɓɛɛ o be Israɛl tɛ de o wiwii in o okoo nɛ bara tɛ nu nɛ GASA WAN ha̧a̧ ha̧ wa'i. Wa tɛ de bɔnɛ in o wi nɛ dee so wa nɛ bara, ɓɛɛ wa kifa ɔ wan zu o bíí nɛ nasa so wa.

³Israɛl wese nɛ GASA WAN be tɛɛ́ ha̧ ɔma-tɛ ha̧ mɛ ɗoŋ bɔnɛ, dita-see in ŋga tom-bara nɛ mɛ duka so mɛ de'i,

⁴mɛ tɛ bìì gima’ɛ zu wannu Babilɔŋ: Ŋga-wi dee bɔɔ hee ge kinii’ɛ ge? Ŋga-wi kifa geemɔ!

⁵GASA WAN gbina nyasi ko o wi-ɗaŋ in te ko o wi-duk-zu bíí.

⁶Ŋga-wi duka so usi nɛ bɔnɛ ha̧ o bíí mbɛr nɛ wa nɛ ŋga nyimsea, nɛ ko bo na, de nɛ ŋgamɔ in wa.

⁷Ɓɛɛ nu lɛŋ duk kɔ‘i sɛ́ɛ́m hiɗi nɛ mɔ nɛ desee.

⁸O zawaya in o gbatui Libaŋ de nɛ tortɛ tɔ̧ nɛnɛ‘e: «Dika nɛ mɛ yee nɛ ɗɔɔ nu, ŋma bíí tɛ mɛ gɔm yɛ ɓɔna.»

⁹Fara ko o fio ɗɔɔ nu mɛ fo nɛ tɛ, mɛ tɛ̀ɛ́ kpɛk mɛ; a̧ tuna o ŋga-wi nɛ fee so, ɓɛɛ o wan ko o dukbíí nɛ fee so kura ŋgɔn zu damti kɔ‘i mbɛt.

¹⁰Ɓɛɛ wa lɛŋ a nú tɛ wen'e nde: «Oo nɛ mɛ'ɛ tɛɛ kpa yɛ'ɛ? Ɛɛ nyɛma ŋmaa in mɛɛ kinii kaɗi!»

¹¹Mɔɔ-wan kɔ-mɛ in koloŋ nɛ wa mbɛr so, bíí nɛ gima ha̧ mɛ'ɛ zira si fara ko o fio mɛ kaɗi; o dɔk mɔi̧a ŋmaa mboɗi tɛ-mɛ ɓɛɛ kpe zu mɛ.

¹²Wannu Babilɔŋ, mɛ duk so kɔ-mɛ tok nɛnɛ hee sɔra ga; dee hee ge sa wa baa mɛ gɔn pi̧ taŋ pii mbɔɗɔnu’ɛ ge? Mɛ yaa-gan so o tugun bíí'ɛ!

¹³Mɛ tɔ̧ɔ̧ so'e, wi tɛ daŋ si yiwese mɛ, ɓɛɛ wi ɔɔ wan si ŋgɔn zu o sɔra nɛ Sɔ̧ dea; wi tɛ ɗafi damti kɔ‘i nɛ́ɛ̀ e zu kaya fara mɔi̧a-a nɛ war zu-zan mɛ;

¹⁴wi tɛ daŋ duk zu tu̧-zan, wen ha'i mɛ hɔ ŋmaa in Wan nɛ duk kɔ‘i ŋgɔn mɛ‘i’ɛ.

¹⁵Dee bɔɔ hee ge sa mɛ zira si fara ko o fio kɔ̧ ɗuka kɔ̧ mɛ‘i ge?

¹⁶O wi nɛ mbaɗi mɛ ta nɛ mɔ, tɔ̧ nɛnɛ‘e: «Wi’ɛ nɛ dee so ha̧ nù mɛ nak, ɗaŋ nɛ o wan,

¹⁷de so nɛnɛ ha̧ nu mɛ kifi ŋga-gbárà, in ha̧ o ye kɔ-wa mɛ ɗaŋ kifi bɛɛ-oi, wi’ɛ nɛ kɔ̧ so mɛ gbo o wi-zɔɓɔ na’ɛ, nɛ mɛ nde?»

¹⁸O wannu ko o tugun bíí nɛ fee so lɛŋ ɔm nɛ tɛ, kóó o nde kɔ̧ pɛsi-fio kɔ‘i nɛ desee.

¹⁹Ɓɛɛ nɛ war kɔ-mɛ, wa pi̧i̧ mɛ nyɛi̧ nɛ pɛsi-fio kɔ-mɛ, hee ŋma ndiŋmɔ ga; hee o wi nɛ wa gbɛɛ nɛ gba-paa ga, hee gee fio-mɔ ga; wa siŋa mɛ pi̧ zu sɔkɔr-ta hee ŋma ɗaŋ wɔr-mɔ mɛ i̧si̧ ga.

²⁰Mɛ beka ndaɗi in wa kɔ̧ pɛsi ɓɔna, wen mɛ ɗaŋa so nu kɔ-mɛ, ɓɛɛ mɛ kum dukbíí kɔ-mɛ lɛŋ; wi beka'i zii nin pɛrti o wi-ɗaŋ hegɔ ɓɔna ndo ndo ndo.

²¹Ɛ̀nɛ̀ kíí war mɛ kum o bem lɛŋ wen zu ɗaŋmɔ ko o dáà kɔ-wa, wen ká wa tɛɛ kur mɛ bi nu, de nɛ ye, nyɛɓi nɛnɛ dam zu nu’ɛ ɓɔna.

²²«Mi tɛ misi̧ in wa, GASA WAN nɛ a̧a̧ nɛ ŋgayamɔ lɛŋ tɔ̧ɔ̧ hegɔ! Mi tɛ ɗaŋ nin Babilɔŋ in oi o bíí yinɛ, bezaŋ beka bo na, pɛ́r-nam kɔ-wa beka bo ɓɔna mbɛt.

²³Fara kɔ-mɛ tɛ duk nɛ yí-ɓɔtɛ in fara-yar ko desa; mi tɛ mbii Babilɔŋ nɛ gbɛ̧; GASA WAN nɛ a̧a̧ nɛ ŋgayamɔ lɛŋ tɔ̧ɔ̧ hegɔ!»

²⁴GASA WAN nɛ a̧a̧ nɛ ŋgayamɔ lɛŋ kana mɔ ɓɛɛ tɔ̧: «Mɔ‘i n'am taa so'i tɛ de kana; mɔ n'am tɔ̧ɔ̧ kaɗi tɛ hɔ gba̧a̧.

²⁵Mi tɛ ɗaŋ Asirii yinɛ tɛ nu kɔ‘m, mi tɛ mbɔli a̧ zu o kaya kɔ‘m. Mɔɔ-ba-tui kɔ̧-a̧ tɛ yu zu o bíí kɔ‘m, tui beka duk zu kóŋgó-ɓaa ɓɔna.»

²⁶Mɔ nɛ GASA WAN taa mɛ de zu nu’ɛ lɛŋ, in ŋgamɔ n'aa kɔ̧ɔ̧ mɛ de in o tugun bíí lɛŋ a̧‘i.

²⁷Kà GASA WAN nɛ a̧a̧ nɛ ŋgayamɔ lɛŋ nɛ ee zu mɔ, ɓɛɛ nɛ o'o tɛ ɗaŋ ee-zu-mɔ‘i o? Kà a̧ nɛ nyɛi̧a er-a, ɓɛɛ nɛ o'o tɛ dak er-a'i si ɗoŋ o?

²⁸Wen nɛ GASA WAN tɔ̧ɔ̧ ŋgimbi fio ko wannu Ahaz nɛ mɔ'ɔ:

²⁹Ɛnɛ o be Filistii lɛŋ, k’ɛ́nɛ́ de nyɛŋɛ wen nɛ nyasi nɛ usi so bɔnɛ h’ɛ́nɛ́ gbina na; wen kà ŋma gɔ́k fe, ɓɛɛ kui gɔ́k'i tɛ mbaŋ nɛ ndiɓa nɛ bu̧i bu̧i.

³⁰O wi-kɔsa tɛ nyɔŋ mɔ tɛ kɔ‘i, ɓɛɛ o wisan ɔma tɛ̀ nɛ̀ de-a. Mi tɛ de ha̧ o bezaŋ-mɛ mɛ zɔk bɔnɛ-wɔ, ɓɛɛ mi tɛ gbɛ o oi-aa nɛ tɛ ɓɔn.

³¹Nu tua, mɛ̀ áí nú ŋgaɓo, ye, mɛ̀ híɗí mɔ! O be Filistii lɛŋ, tɛ‘nɛ́ a̧ nak nɛ kíì! Wen zi-wee tɛ kur nɛ zu-zan mɛ tɛnɛ, ɓɛɛ ŋma bíí nɛ tɛ yor ti o dɔka wi-biro kɔ̧-a̧ bo na.

³²Wi tɛ kifi nú ha̧ o betom nɛ tɛɛ nɛ Filistii, hee ge? Mɛ̀ nɛ́ GASA WAN a̧ mboo Siɔŋ wen ha̧ o wisan mgbara dukbíí kɔ̧-a̧ nɛ ya si ɗɔɔ nɛ ga̧a̧-a̧ mɛ ya nɛ de-a.