Read Northwest Gbaya ESAII 16 Bible Online

ESAII 16 - Northwest Gbaya bible

ESAII 16

¹«O be Mɔab, ɛ̀nɛ̀ tóm be-sami nɛ war ŋga-gbárà mɛ, nɛ Sela ha̧ wannu si zu kaya ko boko be Siɔŋ!»

²O boko be Mɔab tɛ bu̧i̧ nɛ nu horo Arnɔŋ hee o nɔ̧́í̧ nɛ‘i ndaka kɔ̧ yaa kɔ-wa yinɛ nɛ̀ bó nɛ̀ tua na ga.

³Nɛ mɔ'ɔ nɛ o be Mɔab aka Jerusalɛm: «Ɛ̀nɛ̀ tɔ̧́ mbɔrɔ h’ɛ́ɛ́, ɓɛɛ ɛ̀nɛ̀ dé mɔ nɛ yuwar-a in yɛɛ, ɛ̀nɛ̀ kpé zu yɛ nɛ gi̧ɔ̧-tɛ‘nɛ́ hee gi̧ɔ̧-te mɛ wese ga. Ɛ̀nɛ̀ tú̧ ndaa o wi nɛ pɛsa, ɓɛɛ k’ɛ́nɛ́ usi oi o wi-yu-mɔ na.

⁴Ɛ̀nɛ̀ é ha̧ o be Mɔab mɛ yu mɔ, mɛ ɔ tɛ nu k’ɛ́nɛ́, ɓɛɛ ɛ̀nɛ̀ yór ɗoŋ wa, wen o wi-gbɛ-wa, wen ŋgimbi nɛ dee ŋgamɔ be tɛɛ kaɗi, o wi-dea-a tɛ kaɗi mbɛt; ɓɛɛ wi-de-ŋgayamɔ zu nu'i tɛ yambali mbɛt.

⁵Damti'i tɛ kpa ŋgai tɛ ga̧a̧mɔ; wi’ɛi tɛ ɔ wan zu damti ko David nɛ see kpɔk, a̧ tɛ duk nɛ bíí nɛ gɔn kita nɛ yuwar-a.»

⁶Ɛɛ zia so nyɛrɛ ŋmaŋa-tɛ ko Mɔab, ŋmaŋa-tɛ kɔ̧-a̧ yaka zale, ŋga-see, gɔɔ-tɛ in ŋgazu, mɔɔ nɔ‘i lɛŋ nɛ geemɔ.

⁷Mɛ nɛ wen hegɔ sa o be Mɔab ai nú wen zu Mɔab; wa lɛŋ ai nɛ nú wen ha̧na waya-nyak-dɔ̧ɔ̧ mɛ Kir-Hɛrɛs; wa ya bembi nɛnɛ nɛ ɗaŋsee.

⁸O fɔ mɛ Hɛsbɔŋ kora ɗaŋ lɛŋ, o nyak-dɔ̧ɔ̧ Sibna nɛ o wannu duka so nɔ gbɛ nɛ wa ɗaŋa. O nyak-dɔ̧ɔ̧ yuu so hɔ Yazɛr, ɓɛɛ gbaa-er-wa yu hɔ ŋga-gbárà mɛ yaknɛ hɔ kur gba-tɔp mɛ mbɛt.

⁹Mi mbɛt, mi hi̧i̧ nɛ kɔ̧a̧ in Yazɛr nɛ hi̧i̧ kɔ̧a̧ wen zu fɔ-nyak-dɔ̧ɔ̧ Sibna. Miikɔ̧a kɔ‘m foka a zu Hɛsbɔŋ in Eleale, wen wi zii hiɗimɔ tortɛ zu mɔi̧a nyak-dɔ̧ɔ̧ in ŋgimbi mɔi̧a-nyɔnɔ kɔ-wa ɓɔna.

¹⁰Desee in tortɛ bo sɛn kpɛɛfɔ ɓɔna, bíí beka hiɗi mɔ bíí nɛ gima kpɛɛfɔ-nyak-dɔ̧ɔ̧ na; bíí beka vati dɔ̧ɔ̧ kɔ̧ mɔɔ-vati-dɔ̧ɔ̧ ɓɔna, hiɗimɔ desee kaɗa mbɛt.

¹¹Mi ta mɔ nɛ tu̧u̧-see wen zu Mɔab; nyak zaŋ-am nɔ̧́í̧ hee nyak koloŋ ga, ɓɛɛ mi gɔfi nɛ mɔ wen zu Kir-Hɛrɛs.

¹²Mɔab pɔkɔsa tɛ nɛa-a sitɛ kusa-fara mɛ, mɛ nɛɛ ai nú kɔ̧ sa̧a̧ fara kɔ‘i, ɓɛɛ mɔ‘i gan a̧.

¹³Mɔ‘i nɛ wen nɛ GASA WAN tɔ̧ɔ̧ so nɛti ɓeemɛ zu Mɔab.

¹⁴Kinii, GASA WAN'e nde: «Hee mɔ'ɔ nɛ bíí tɔ̧ nɛ́ ŋgimbi é nɛ̀ nú in ŋmaa wen dee tom ga, zaŋ pɛ taar ŋgai ko Mɔab nɛ oi gba giiwi kɔ‘i tɛ gbɔsi, ɓɛɛ nɛ́ o bíí nɛ̀ bó nɛ̀ ŋgai na a̧ tɛ ɓɔn.»