Read Northwest Gbaya ESAII 17 Bible Online

ESAII 17 - Northwest Gbaya bible

ESAII 17

¹Wen nɛ tɔ̧a̧ zu Damas nɛ mɔ'ɔ. Damas beka duk nɛ ye ɓɔna; a̧ tɛ kifi nɛ́ gee bɛɛ-oi.

²O be ye mɛ katɛ a̧ lɛŋ tɛ kifi bɛɛ-oi, fara'i tɛ kifi duk nɛ fara-nyɔŋ-mɔ ko o ndai. Wa tɛ ɔm tɛ-wa hi̧i̧ ɓɛɛ ŋma bíí beka ndak wa na.

³O ŋga tua lɛŋ nɛ ya sɛn Efraim tɛ ɗaŋ in mɔɔ-wan ko Damas mbɛt; bíí tɛ usi bɔnɛ ha̧ oi o bezaŋ Aram hee mɔ'ɔ nɛ wa usa so ha̧ o be Israɛl ga. GASA WAN nɛ a̧a̧ nɛ ŋgayamɔ lɛŋ a̧ tɔ̧ hegɔ.

⁴Ŋgai ko Jakob tɛ kaɗi wese'i; ɓɛɛ a̧ tɛ ɔ̧k nɛ oi ŋmaŋi kɔ̧-a̧‘i.

⁵Wese'i tɛ duk hee mɔ'ɔ nɛ‘i gbin nɛ kan-te mboŋgo, ɓɛɛ wi nuka kiitɛ-a’ɛ ga, kóó hee mɔ'ɔ nɛ‘i pɛfi nɛ gba̧a̧ fon mgbara ɗɔŋgɔ Refaim’ɛ ga.

⁶O oi bíí tɛ ɓɔn, hee mɔ'ɔ nɛ‘i ɓi nɛ waya-te-nɔ̧́ ɓɛɛ ká o waya-a ɓɔna kɔ̧ te-a’ɛ ga: o waya-a yiitoo kóó taar ɓɔna kɔ̧ te-a, koo waya-a naar kóó mɔɔrɔ ɓɔna kɔ̧ gbaa-er-a’ɛ ga. Mɛ nɛ mi GASA WAN nɛ a̧a̧ nɛ ŋgayamɔ lɛŋ, Sɔ̧ ko Israɛl a̧ tɔ̧ wen’ɛ.

⁷Wese'i bíí tɛ zik tɛ mɛ zɔk mɔ sitɛ Wi-de-a, nɛ̀ duk nɛ́ Sa̧a̧ Wi ko Israɛl,

⁸ɓɛɛ a̧ beka zɔk mɔ si o fara-dɔ-ha̧a̧mɔ n'aa dee nɛ er-a ɓɔna; a̧ beka mbaɗi mɔ n'aa dee nɛ er-a hee o sɛka-te nɛ duk nɛ sɔ̧ kɔ̧-a̧, in fara-dɔ-fuu-nyama na.

⁹Wese'i, o bíí tɛ gbin e ye kɔ-mɛ duk hee mɔ'ɔ nɛ o be Amɔŋ in o be Hiv dee so ti o be Israɛl ga. Ɓɛɛ fara'i tɛ duk nɛ ŋga-gbárà.

¹⁰Israɛl, tɛ-mɛ bìí ɗoŋ Sɔ̧ Wan-kpasi-mɛ, in Kam-ta ɛk tɛ-mɛ mbɛt! Wen mɛ duka mɛ gun nɛ de te, ɓɛɛ tɛ mɔ‘i mɛ guna te ko o gɔni-duk.

¹¹Wese nɛ mɛ guna nɛ wa, a̧ mɛ dee ha̧ wa gasi nɛnɛ, kà mɔ tɛ sa̧ mɛ tutuyɛ, ɓɛɛ mɛ de ha̧ wa mɛ do; kà ŋgimbi-mɔi̧-nyɔnɔ tɛ hɔ, ɓɛɛ nyɔŋmɔ yambali lɛŋ, e nɛ ŋga nyimmɔ nɛ nyina-a bo na.

¹²Ho! Oi zɔm tiger o gba giiwi nɛ de mɔ tɛnɛ hee giti som gba-tɔp ga! Giti naŋ o tugun bíí nɔ̧́í̧ tɛnɛ hee nana-yì nɛ fok nɛ ŋgai ga!

¹³O tugun bíí mgbimgbi hee nana-yì ga! A̧ de nɛ ŋmaa in wa, ɓɛɛ a̧ ndak wa pɛsi nduɗɛɛ, hee fuunu zu kaya mɛ ga, in hee gba-búk kórò ga mbɛt.

¹⁴Kà zɛ de, ɓɛɛ wa pi̧i̧ kíì tɛ-wi, mɛ gɔna ndaa-zan, ɓɛɛ wa yaka! Mɔɔ-oi ko o wi nɛ kai mɔ zu̧ nɛ mɔ k’ɛɛ a̧‘i.