Read Northwest Gbaya ESAII 18 Bible Online

ESAII 18 - Northwest Gbaya bible

ESAII 18

¹Nu nɛ‘i zii giti biro sɛnɛ kur nana-yì Kus mɛ‘i,

²mɛ̀ tóm o betom nɛ zu gba-tɔp nɛ o be kombon nɛ zu yi nɛnɛ, o haya betom, ɛ̀nɛ̀ má yi nɛ haya-a sitɛ o kusa bíí nɛ tɛ-wa ɔ yɔka, sitɛ o ŋga zuduk bíí nɛ‘i yu hɔ sɔŋkur nu mɛ, ɛ̀nɛ̀ sí ɗoŋ sitɛ o yaa-ŋgo-biro, si fara nɛ yi kɛ̧ɛ̧ nu k’ɛ́nɛ́ sɛnɛ.

³Ɛ́nɛ́ lɛŋ nɛ ɔ zu nu'i, ɛ̀nɛ̀ zɔ́k GASA WAN nɛ duk zu kaya mɛ‘i, ɛ̀nɛ̀ zíí dɔma zak nɛ wa dɔm'i.

⁴Ɓɛɛ nɛ mɔ'ɔ nɛ GASA WAN tɔ̧ɔ̧ ha̧‘m: «Fara n'am duk sɛnɛ‘i, mi zɔk mɔ hee kutu tɛ ŋgimbi-gbɛŋa-tɛ ŋgimbi-mɔi̧a-nyɔnɔ ga.»

⁵Ŋgimbi-mɔi̧a-nyɔnɔ, nɛ nyɔnɔ dɛma kaɗi, nɛ o do-a be tɛ̀ɛ́ ai a nu ha̧ waya-a mɛ gbɛ̧, ɓɛɛ wi tɛ ɓir o gbaa-er-a nɛ mɔɔ-gɔn-mɔ, ɓɛɛ wi kaia yinɛ.

⁶O bíí tɛ bɛ̧ wɔr-wa, ha̧ o ŋga nɔ̧́í zu kaya in o saɗi zu nu mɛ nyɔŋ wa. O nɔ̧́í-bɛɛ tɛ̀ɛ́ nyɔŋ wɔr-wa zakati nɛ nu, ɓɛɛ o saɗi nyɔŋa wɔr-wa mɛ ɓar mbɛt.

⁷Ɓɛɛ nɛ tɛ ŋgimbi'i, a̧ dukbíí nɔ‘i tɛ ba nɛ ha̧a̧mɔ nɛnɛ ha̧ GASA WAN nɛ a̧a̧ nɛ ŋgayamɔ lɛŋ. Dukbíí‘i ɔ kusa in tɛ-wa ɔ yɔka. Wa nɛ́ dukbíí nɛ‘i yu yuu hɛ̧ɛ̧ hegɔ hɔ nduti-nu mɛ; mɛ nɛ nu nɛ‘i zii gba̧a̧-wen kɔ̧-a̧ na nɛ mbɔli nɛ wisɛn kɔ‘i, ɓɛɛ o nana-yì hura nu'i mbɛt. Wa tɛ ba ha̧a̧mɔ‘i nɛnɛ si fara nɛ GASA WAN nɛ a̧a̧ nɛ ŋgayamɔ lɛŋ duk sɛnɛ zu kaya Siɔŋ mɛ.